រាជធានីភ្នំពេញ ៖ ស្ត្រីវ័យចំណាស់ម្នាក់បានជិះម៉ូតូម៉ាកស្កុបពីមីនីមួយគ្រឿងមកពីលក់ផ្កានៅព្រះអង្គដងកើវិញ ក្នុងគោលបំណងត្រលប់ទៅផ្ទះ លុះជិះដល់ពាក់កណ្ដាលផ្លូវ ក៏ស្រាប់តែលេចមុខជនសង្ស័យម្នាក់ជិះម៉ូតូមួយគ្រឿងមកធ្វើសកម្មភាពឆក់យកកាបូបស្ពាយចំហៀងរបស់គាត់តែម្តង តែមិនសម្រេច បណ្ដាលជនរងគ្រោះឲ្យដួលម៉ូតូ រួចអូសតាមថ្នល់រងរបួសរលាតដៃដៃជើងសន្លប់មួយសន្ទុះធំ បង្កឱ្យមានការភ្ញាក់ផ្អើលកាលពីម៉ោង12និង30នាទីរំលងអធ្រាត្រឈានចូលថ្ងៃទី៤ ខែសីហា ឆ្នាំ2020 នៅតាមបណ្ដោយផ្លូវលេខ289 ជិតស្ពានអាកាស5មករា សង្កាត់ផ្សារដេប៉ូ3 ខណ្ឌទួលគោក។
យោងតាមប្រភពពីស្ត្រីរងគ្រោះបានប្រាប់ឱ្យដឹងថា មុនកើតហេតុ រូបគាត់ទើបតែត្រឡប់មកពីលក់ផ្កានៅព្រះអង្គដងកើ មុខព្រះបរមរាជវាំង ក្នុងសង្កាត់ជ័យជំនះ ខណ្ឌដូនពេញ ក្នុងគោលបំណងត្រលប់ទៅផ្ទះវិញនៅម្ដុំស្តុបផ្សារមាន់អាំង ដោយជិះម៉ូតូមួយគ្រឿងម៉ាកស្កុបពីមីនី ពណ៌ទឹកក្រូច ធ្វើដំណើរតាមបណ្ដោយមហាវិថីសហព័ន្ធរុស្ស៊ី។
ស្ត្រីរងគ្រោះបន្តថា ពេលមកដល់ក្រោមស្ពាន5មករា ក៏បត់ស្តាំចូលផ្លូវ289 លុះមកដល់ចំណុចកើតហេតុខាងលើ ក៏ស្រាប់តែលេចមុខជនសង្ស័យម្នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ មិនចាំស៊េរី ធ្វើដំណើរបញ្ច្រាស់ទិសដៅជាមួយគាត់មកក្នុងល្បឿនយឺតៗ តែពេលមកដល់ជិតគាត់ស្រាប់តែជនសង្ស័យរូបនេះបានបន្ថែមល្បឿនម៉ូតូ ហើយក៏លូកដៃឆក់យកកាបូបស្ពាយចំហៀងពណ៌ខ្មៅពីគាត់តែមិនបានសម្រេច ។
ស្ត្រីរងគ្រោះបន្តទៀតថា ប៉ុន្តែនៅគ្រានោះ បណ្ដាលឲ្យគាត់ដួលម៉ូតូ រួចអូសតាមថ្នល់ បណ្តាលឱ្យរូបគាត់រងរបួសរលាត់ដៃជើងសន្លប់មួយសន្ទុះធំតែម្តង តែក៏ត្រូវបានប្រជាពលរដ្ឋដែលធ្វើដំណើរឆ្លងកាត់ទីនោះប្រទះឃើញ ក៏បាននាំគ្នាជួយសង្គ្រោះបឋម ដោយលាបប្រេងកូឡា និងប្រេងខ្យល់ ទើបគាត់ដឹងខ្លួនវិញ ចំណែកទ្រព្យសម្បត្តិនៅក្នុងកាបូបរបស់គាត់នោះមិនបានបាត់បង់អ្វីទេ ។ រីឯជនសង្ស័យ បន្ទាប់ពីធ្វើសកម្មភាពមិនបានសម្រេចក៏បានបន្ថែមល្បឿនម៉ូតូរត់គេចខ្លួនបាត់ស្រមោលទៅ ។
ក្រោយពេលកើតហេតុ កម្លាំងល្បាតនៃអធិកាដ្ឋានខណ្ឌទួលគោក ក៏បានចុះមកដល់កន្លែងកើតហេតុភ្លាមៗផងដែរ ហើយស្ត្រីរងគ្រោះ គាត់ក៏មិនបានទៅដាក់ពាក្យបណ្ដឹងអ្វីឡើយ បន្ទាប់ពីធូរស្រាលពីរបួស គាត់ក៏បានជិះម៉ូតូត្រលប់ទៅផ្ទះវិញ ដោយកម្លាំងល្បាតខណ្ឌទួលគោក ក៏បានជិះតាមពីក្រោយជួយជូនស្ត្រីរងគ្រោះត្រលប់ទៅផ្ទះវិញ ដើម្បីព្យាបាលរបួស ៕
ចែករំលែកព័តមាននេះ