ពុទ្ធបរិស័ទទាំងឡាយធ្លាប់បានឮហើយនូវពាក្យខាងលើនេះ ដែលអ្នកស្រុកតែងនិយាយថា «កុំស៊ីបាយមុនលោកប្រយ័ត្នបាប» តើពាក្យនេះជាការពិត ឬក៏យ៉ាងណា ? សូមសាធុជនទាំងឡាយឈ្វេងយល់នូវអត្ថន័យដែលមានពិតប្រាកដជាក់ដូចតទៅ៖ នៅក្នុងគម្ពីរធម្មបទដ្ឋកថា បាននិយាយពីរឿងពួកប្រេតរបស់ព្រះបាទពិម្ពិសារមួយក្រុម បានបំពេញទានមានវត្ថុមិនស្អាតបរិសុទ្ធ…
ពុទ្ធបរិស័ទទាំងឡាយធ្លាប់បានឮហើយនូវពាក្យខាងលើនេះ ដែលអ្នកស្រុកតែងនិយាយថា «កុំស៊ីបាយមុនលោកប្រយ័ត្នបាប» តើពាក្យនេះជាការពិត ឬក៏យ៉ាងណា ? សូមសាធុជនទាំងឡាយឈ្វេងយល់នូវអត្ថន័យដែលមានពិតប្រាកដជាក់ដូចតទៅ៖
នៅក្នុងគម្ពីរធម្មបទដ្ឋកថា បាននិយាយពីរឿងពួកប្រេតរបស់ព្រះបាទពិម្ពិសារមួយក្រុម បានបំពេញទានមានវត្ថុមិនស្អាតបរិសុទ្ធ ពោលគឺស៊ីបាយមុនលោក លុះធ្វើមរណកាលទៅបានទៅកើតក្នុងបេតវិស័យ គឺកើតជាប្រេត សោយទុក្ខវេទនាអស់កាលដ៏យូរអង្វែង គឺតាំងពីមុនភទ្ទកប្បយើងនេះទៅទៀត ។ លុះមកដល់ភទ្ទកប្បយើងនេះមានព្រះពុទ្ធត្រាស់ដឹងធម៌ប្រាំព្រះអង្គគឺ កុក្កសន្ធោ កោនាគមនោ កស្សបោ សមណគោត្តម និងអរិយមេត្តេយ្យ ។ នៅសល់តែមួយព្រះអង្គទៀតដែលមិនទាន់បានត្រាស់ គឺព្រះអរិយមេត្តេយ្យ ដែលលោកកំពុងបំពេញបារមីនៅឋានតុសិតសព្វថ្ងៃនេះ ។
ព្រះពុទ្ធព្រះនាមកុក្កសន្ធោ បានត្រាស់ដឹងឡើងមុនគេក្នុងភទ្ទកប្បនេះ ពួកប្រេតទាំងនោះក៏នាំគ្នាទៅសួរថា បពិត្រព្រះអង្គដ៏ចម្រើន ចុះយើងខ្ញុំទាំងឡាយកាលណាទើបបានអាហារបរិភោគ ។ ព្រះអង្គទ្រង់ត្រាស់ថា ចាំសួរព្រះពុទ្ធជាន់ក្រោយចុះ ក្នុងសាសនាតថាគតនេះអ្នកទាំងឡាយមិនត្រូវបានអាហារបរិភោគទេ។ លុះផែនដីដុះបានមួយយោជន៍ឡើង ព្រះពុទ្ធព្រះនាមកោនាគមនោបានត្រាស់ដឹង ពួកប្រេតទាំងនោះក៏បាននាំគ្នាទៅសួរទៀត ព្រះអង្គក៏បានត្រាស់ដូចព្រះពុទ្ធមុនដែរ ។ លុះដល់ព្រះពុទ្ធព្រះនាមសមណគោត្តមយើងនេះបានត្រាស់ដឹងឡើងក្នុងលោក ពួកប្រេតទាំងនោះបាននាំគ្នាទៅសួរព្រះអង្គ ហើយព្រះអង្គត្រាស់ថា អ្នកទាំងឡាយត្រូវបានអាហារបរិភោគក្នុងសាសនាតថាគតនេះហើយ តែចាំមើលពេលណាដែលព្រះបាទពិម្ពិសារជាញាតិរបស់អ្នកទាំងឡាយថ្វាយទានដល់តថាគតនឹងញ៉ាំងអាហារឱ្យសម្រេចដល់អ្នកទាំងឡាយ អ្នកទាំងឡាយនឹងបានអាហារបរិភោគក្នុងពេលនោះ ។
លុះព្រះបាទពិម្ពិសារបានថ្វាយទានក្នុងថ្ងៃដំបូង ហើយមិនបានផ្សាយផលទៅឱ្យពួកញាតិ ក៏ស្រាប់តែពួកប្រេតទាំងឡាយនោះយំស្រែកទ្រហឹងអឺងកងក្នុងរាត្រីនោះ ជាសំឡេងគួរឱ្យព្រឺព្រួចភ័យខ្លាចពេកណាស់ ដែលស្ថិតនៅពាសពេញព្រះរាជដំណាក់ ។ លុះព្រឹកឡើងព្រះបាទពិម្ពិសារក៏បានយាងទៅកាន់វត្តវេឡុវ័ន ហើយសួរព្រះសម្ពុទ្ធពីហេតុការណ៍យប់នោះ ព្រះអង្គទ្រង់ត្រាស់ថា ពួកប្រេតជាញាតិរបស់ព្រះអង្គនាំគ្នាយំស្រែករកអាហារ ព្រោះពួកប្រេតទាំងនោះត្រូវបានអាហារបរិភោគក្នុងសាសនាតថាគតនេះហើយ។ ព្រះរាជាគ្រាន់តែបានដឹងហេតុយ៉ាងដូច្នេះហើយ ក៏បានចាត់ចែងធ្វើបុណ្យទានម្តងទៀតមានបាយ ទឹក នំចំណី ត្រី សាច់ សំពត់អាវស្បៃជាដើមដល់ព្រះសង្ឃទាំងឡាយមានព្រះពុទ្ធជាប្រធាន ព្រះអង្គក៏បានអនុមោទនាដោយ តិរោកុឌ្ឌសូត្រ ស្រេចហើយ ពួកប្រេតទាំងនោះក៏ទទួលផលក្នុងពេលនោះ ហើយក៏បានរួចចាកអំពីប្រេតវិស័យទៅកើតក្នុងសុគតិភពអស់ទៅ ។
រឿងនេះលើកយកមកបំភ្លឺឱ្យឃើញអំពីទំនាក់ទំនងជាមួយបុណ្យភ្ជុំបិណ្ឌ ហើយជារឿងដែលគួរយកជាប្រមាណក្នុងកិច្ចកុសលបាន ។
សូមបញ្ជាក់ផងដែរថា មនុស្សដែលស្លាប់ទៅមិនមែនសុទ្ធតែចាប់កំណើតជាប្រេតទាំងអស់នោះទេ អ្នកធ្វើល្អតែងទៅកើតក្នុងសុគិតភពមានឋានទេវលោកជាដើម ហើយកុសលផលបុណ្យដែលញាតិធ្វើក្នុងរដូវភ្ជុំបិណ្ឌនេះក៏ទៅជួយសណ្តោងលើកអ្នកល្អទាំងនោះឱ្យរឹងរឹតតែសុខចម្រើនទ្វេឡើងថែមទៀត សូមកុំមានទស្សនៈយល់ច្រឡំ ។ សាន សារិន
ចែករំលែកព័តមាននេះ