រាជធានីភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានលើកឡើងនូវកង្វល់ធំមួយ ពាក់ព័ន្ធនឹងបញ្ហាកង្វះទឹក…
រាជធានីភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានលើកឡើងនូវកង្វល់ធំមួយ ពាក់ព័ន្ធនឹងបញ្ហាកង្វះទឹក និងកម្ពស់ទឹកនៅទន្លេមេគង្គ មានកម្រិតទាបនៅឡើយ ដែលអាចជះឥទ្ធិពលដល់ការងារបង្កបង្កើនផលក្នុងឆ្នាំនេះ។ ដូច្នេះថ្នាក់ដឹកនាំក្រសួងបានស្នើទៅដល់ប្រទេសស្វីស តាម រយៈលោក Markus Buerli នាយកការិយាល័យសហប្រតិបត្តិការស្វីស និងភ្នាក់ងារកុងស៊ុលស្វីសប្រចាំព្រះរាជាណាចក្រកម្ពុជា នៅឯកិច្ចប្រជុំមួយនារសៀលថ្ងៃទី៣ ខែកញ្ញា ឆ្នាំ២០២០ នៅទីស្តីការក្រសួង។
លោករដ្ឋមន្ត្រី បានបញ្ជាក់ថា រដ្ឋាភិបាលនៃប្រទេសស្វីស កន្លងមកបាន និងកំពុងផ្តល់កិច្ចសហប្រតិបត្តិការ យ៉ាងល្អប្រសើរជាមួយកម្ពុជាលើគ្រប់វិស័យ ជាពិសេសវិស័យកសិកម្មដោយភាគីស្វីស បានបន្តការអនុវត្តគម្រោង ប្រើប្រាស់ប្រព័ន្ធព័ត៌មានផ្កាយរណបជាមូលដ្ឋាន និងការធានារ៉ាប់រង ដំណាំស្រូវក្នុងប្រទេសកម្ពុជា RIICE តាំងពីឆ្នាំ២០១២។ ដោយទទួលបានលទ្ធផលជាផ្លែផ្កា ភាគីស្វីសបានបន្តការអនុវត្តគម្រោងនេះជាមួយក្រសួងកសិកម្ម រុក្ខាប្រមាញ់ និងនេសាទ ដែលបច្ចុប្បន្ននេះបានឈានដល់ជំហានទី៣ (២០១៩-២០២១) ក្នុងគោលបំណងគ្រប់គ្រង គ្រោះធម្មជាតិដែលប៉ះពាល់ដល់ផលិតកម្មដំណាំស្រូវ និងស្វែងយល់ព័ត៌មានទិន្នន័យមួយចំនួនទៀត ដូចជាផ្ទៃដីដាំដុះជាក់ស្តែង ពេលវេលាចាប់ផ្តើមរដូវដាំដុះកម្រិតកំពូលនៃរដូវដាំដុះ ការព្យាករណ៍ទិន្នផល ពាក់កណ្តាលរដូវ ការប៉ាន់ស្មានទិន្នផលពេលប្រមូលផល និងការវាយតម្លៃការបាត់បង់ដោយសារ គ្រោះធម្មជាតិ។
លោក វេង សាខុន បានបញ្ជាក់ថា បច្ចេកវិទ្យា និងព័ត៌មានទាំងអស់នេះ គឺមានសារៈសំខាន់ណាស់សម្រាប់មន្ត្រីជំនាញក្នុងការផ្តល់ទិន្នន័យនិងព័ត៌មានដល់ប្រជាកសិករ ហើយពិតជាស្របតាមផែនការយុទ្ធសាស្ត្រអភិវឌ្ឍន៍វិស័យកសិកម្មរបស់ក្រសួងក្នុងការជំរុញការអនុវត្តទំនើបកម្មកសិកម្ម យន្តុបនកម្មកសិកម្ម ការធ្វើកសិកម្មដែលធន់នឹងការប្រែប្រួលអាកាសធាតុ ការធ្វើផែនទីកំណត់តំបន់ដាំដុះ ជាពិសេសលើកកម្ពស់ខ្សែផលិតកម្មកសិកម្ម និងតម្លៃបន្ថែម។ លោករដ្ឋមន្ត្រីបានបន្តថា ហេតុនេះ លោក «បានស្នើដល់ភាគីស្វីស បន្តផ្តល់កិច្ចសហការដល់ក្រសួង លើការងារខាងលើ និងពិនិត្យលទ្ធភាពពង្រឹងសមត្ថភាពមន្ត្រី និងប្រជាកសិករ កសាងហេដ្ឋារចនាសម្ព័ន្ធ គាំទ្រ ដូចជាប្រព័ន្ធស្រោចស្រពដើម្បីឆ្លើយតបទៅនឹងបញ្ហាកង្វះទឹកបង្កដោយការប្រែប្រួលអាកាសធាតុ និងជំរុញការសិក្សា ស្រាវជ្រាវនិងផលិតពូជគ្រឹះ ដើម្បីរួមគ្នាអភិវឌ្ឍន៍វិស័យនេះឲ្យកាន់តែរីកចម្រើន ថែមមួយកម្រិតទៀត» ។
លោក Markus Buerli បានថ្លែងថា លោកក៏ឯកភាពចំពោះកង្វល់របស់ លោករដ្ឋមន្ត្រី ពាក់ព័ន្ធនឹងបញ្ហាកង្វះទឹក និងកម្ពស់ទឹកនៅទន្លេមេគង្គមានកម្រិតទាបនៅឡើយ ដែលអាចជះឥទ្ធិពលដល់ការងារបង្កបង្កើនផលក្នុងឆ្នាំនេះ។ ហេតុដូច្នេះ ភាគីស្វីសកំពុងធ្វើការ ពិភាក្សាជាមួយដៃគូអភិវឌ្ឍន៍មួយដែលកំពុងប្រតិបត្តិការនៅកម្ពុជាផងដែរ ដើម្បីរៀបចំគម្រោង ឧបត្ថម្ភរយៈពេលខ្លី ផ្តោតសំខាន់ទៅលើការកសាងហេដ្ឋារចនាសម្ព័ន្ធគាំទ្រ និងប្រព័ន្ធស្រោចស្រព ដល់កសិករ។
មួយវិញទៀត ដោយពិនិត្យឃើញថា កិច្ចសហប្រតិបត្តិការរវាងភាគីទាំងពីរ ក្នុងអនុវត្តគម្រោង RIICE ទទួលបានលទ្ធផលយ៉ាងល្អប្រសើរ ភាគីស្វីសនឹងបន្តកិច្ចសហប្រតិបត្តិការ ជាមួយក្រសួង ដោយគ្រោងនឹងចុះកិច្ចព្រមព្រៀងលើការអនុវត្តគម្រោងមួយផ្សេងទៀត ដែលជាគម្រោងជំរុញខ្សែច្រវាក់ផលិតកម្មដំណាំសាកវប្បកម្ម ហៅថាគម្រោងបន្លែ ផ្លែឈើកម្ពុជា CHAIN ជំហានទី៣ ពីខែមករា ឆ្នាំ២០២១ ដល់ ខែធ្នូ ឆ្នាំ២០២២ ។ ក្នុងកិច្ចប្រជុំនេះ ភាគីទាំងពីរក៏បានលើក ប្រធានបទមួយចំនួនទៀតមកពិភាក្សាផងដែរ ដូចជាវឌ្ឍនភាពនៃការធ្វើវិសោធនកម្មច្បាប់ជលផល និងច្បាប់ព្រៃឈើផងដែរ៕ ដោយ៖ ស្រី គំនិត
ចែករំលែកព័តមាននេះ