ខេត្តកំពង់ឆ្នាំង ៖ លោក អិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង នៅព្រឹកថ្ងៃទី០៣ ខែកញ្ញា ឆ្នាំ២០២០នេះ បានចេញដីកាបង្គាប់ឲ្យឃុំខ្លួនឈ្មោះ ញឹក ផល ដាក់ពន្ធនាគារជាបណ្តោះអាសន្ន ពាក់ព័ន្ធនឹងការគំរាម និងប្រើប្រាស់អាវុធខុសច្បាប់ ក្រោយមានជម្លោះពាក្យសម្តីតិចតួច នៅតាមដងផ្លូវ ។
បើតាមលោកឧត្ដមសេនីយ៍ទោ ខូវ លី ស្នងការ នៃស្នងការដ្ឋាននគរបាលខេត្តកំពង់ឆ្នាំង បានអោយដឹងថា កម្លាំងសមត្ថកិច្ច តាមស្រាវជ្រាវក្នុងរឿងនេះ រហូតឈានដល់ការចាប់ខ្លួនកូនប្រុសលោកឧកញ៉ាបាន នៅវេលាម៉ោងជាង១រំលងអាធ្រាតុ ឈានចូលថ្ងៃទី០១ ខែកញ្ញា ឆ្នាំ២០២០ ពីបទ កាន់កាប់ដឹកជញ្ជូនអាវុធដោយគ្មានការអនុញ្ញាត និងគំរាមកំហែងភាគីម្ខាង ជាសាធារណៈ ។ ហើយនៅព្រឹកថ្ងៃទី០៣ ខែកញ្ញា ឆ្នាំ២០២០ នេះ តុលាការខេត្តកំពង់ឆ្នាំង ក៏បានចេញដីកាបង្គាប់ឲ្យឃុំខ្លួន លោក ញ៉ឹក ផល ជាបណ្ដោះអាសន្ន រង់ចាំការសម្រេចជាថ្មី ។
សូមរម្លឹកថា កូនប្រុសលោកឧកញ៉ា ទាញកាំភ្លើង AK គំរាមបុរសម្នាក់ជិះម៉ូតូនៅខេត្តកំពង់ឆ្នាំង នៅវេលាម៉ោង៤ និង៤៥នាទី រសៀលថ្ងៃទី៣១ ខែសីហា ឆ្នាំ២០២០ នៅចំណុចផ្លូវចូលចម្ការអំពៅ របស់ក្រុមហ៊ុនលោកឧកញ៉ា ញ៉ឹក ផន (ហៅកៅ) ស្ថិតក្នុងភូមិថ្នល់កែង ឃុំក្បាលទឹក ស្រុកទឹកផុស ខេត្តកំពង់ឆ្នាំង មានជម្លោះពាក្យសម្តីគ្នា រវាងឈ្មោះ ញឹក ផល អាយុ៣៨ឆ្នាំ មានទីលំនៅភូមិថ្នល់កែង ឃុំក្បាលទឹកស្រុកទឹកផុស ដែលគេស្គាល់ថា ជាកូនប្រុសរបស់លោកឧកញ៉ា ញឹក ផន (ហៅកៅ) ជាមួយនឹងភាគីម្ខាងទៀត ឈ្មោះ ប្រាក់ សំបាន ដែលជាអ្នកជិៈម៉ូតូ ។
ក្នុងហេតុការជម្លោះពាក្យសំដីនោះ ឈ្មោះ ញឹក ផល បានឈានដល់ទាញយកកាំភ្លើងអាកា ពីក្នុងរថយន្តម៉ាកម៉ាស្តា ពាក់ស្លាកលេខ ភ្នំពេញ 2AD.0819 មកគំរាមភាគីអ្នកជិៈម៉ូតូ លើភាគីអ្នកជិៈម៉ូតូឈ្មោះ ប្រាក់ សំបាន បានថតសកម្មភាពរបស់ឈ្មោះ ញឹក ផល ដែលបានយកកាំភ្លើងពីក្នុងរថយន្តមកគំរាមខ្លួន ហើយបានបង្ហោះលើបណ្តាញសង្គម ។
យោងតាមប្រភពពីមន្ត្រីនគរបាលខេត្តបានប្រាប់ឲ្យដឹងថា ជនឈ្មោះ ញឹក ផល មានរហ័សនាម ក្នុងចំការអំពៅ ថា(០៩) ជាកូនលោកឧកញ៉ា ញឹក ផន ហៅកៅ បានឆ្លើយបំភ្លឺចំពោះមុខសមត្ថកិច្ចថា «ខ្លួនជាជនស៊ីវិល ចំណែកអាវុធ ដែលខ្លួនបានកាន់នោះ គឺរើសបាន ពេលភ្ជួរដីក្នុងចម្ការអំពៅ ! ហើយខ្លួនពុំមានតួនាទីកាន់អាវុធឡើយ» ៕
កូនប្រុសលោកឧកញ៉ា ប្រាប់ដើមហេតុ មុនឈានដល់ទាញកាំភ្លើងAK គំរាមបុរសជិះម៉ូតូ(វីដេអូ)
ចែករំលែកព័តមាននេះ