សារព័ត៌មានបរទេសកាលពីថ្ងៃទី២៣ កុម្ភៈ ២០១៥ ផ្សាយថា រដ្ឋាភិបាលអង់គ្លេសត្រៀមបើកសម្ពោធវិមានអនុស្សាវរីយ៍រូបសំណាកលោកមហាត្មះ គន្ធី មហាវីរបុរសតស៊ូដើម្បីឯករាជរបស់ឥណ្ឌានៅបរិវេណឧទ្យាន «ផាឡាមេន សាក្វេ» ទល់មុខអគាររដ្ឋសភាក្នុងក្រុងឡុងនាខែមីនា ។
រូបសំណាករបស់លោកគន្ធី ស្ថិតនៅក្បែរវិមានអនុស្សាវរីយ៍របស់លោកវីនស្តុន ឈ័រឈីល អតីតនាយករដ្ឋមន្ត្រីអង់គ្លេស ក្នុងសម័យសង្គ្រាមលោកលើកទី២ និងលោកនេលសុនម៉េន ដឺឡា អតីតប្រធានាធិបតីអាហ្វ្រិកខាងត្បូង មេដឹកនាំប្រឆាំងនឹងការជាន់ឈ្លីជាតិសាសន៍ ។ ការប្រកាសបើកជាផ្លូវការនេះ កើតឡើងបន្ទាប់ពីរដ្ឋាភិបាលអង់គ្លេសបានទទួលប្រាក់បរិច្ចាគពីប្រជាពលរដ្ឋជាង១លានផោន ។
នៅក្នុងសេចក្តីថ្លែងការណ៍របស់លោកដេវីដ កាមេរ៉ុន នាយករដ្ឋមន្ត្រីអង់គ្លេស បានឱ្យដឹងថា លោកមហាត្មះ គន្ធី គឺជាកម្លាំងចិត្តនៅឧទ្យាន ផាឡាម៉េន សាក្វេ និងមិនត្រឹមតែបង្ហាញពីសារសំខាន់ដ៏មហាសាលរបស់លោកដែលមានចំពោះប្រទេសទាំង២ប៉ុណ្ណោះទេ ថែមទាំងជួយទ្រទ្រង់ពីមិត្តភាពរវាងប្រទេសប្រជាធិបតេយ្យដ៏យូរលង់ និងជាប្រទេសប្រជាធិបតេយ្យដ៏ធំនៅលើពិភពលោកផងដែរ ។
ក្នុងឆ្នាំ២០១៥នេះក៏ត្រូវនឹងគម្រប់ខួប១០០ឆ្នាំចាប់តាំងពីលោកមហាត្មះ គន្ធី ត្រឡប់ពីអាហ្វ្រិកខាងត្បូងទៅឥណ្ឌា និងចាប់ផ្តើមតស៊ូតាមនិន្នាការអហិង្សារហូតធ្វើឱ្យឥណ្ឌាទទួលបានឯករាជ្យ រួចផុតពីអាណានិគមរបស់អង់គ្លេស ៕
ចែករំលែកព័តមាននេះ