រាជធានីភ្នំពេញ ៖ ទីបំផុត មានមនុស្សតែ៩នាក់ប៉ុណ្ណោះក្នុងចំណោម១០១នាក់ បានត្រូវនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បញ្ជូនទៅសាលាដំបូងកាលពីព្រឹកថ្ងៃទី៣០ ខែសីហាកន្លងទៅ ដែលមុននេះគ្រោងទៅដល់២០នាក់ឯណោះ ដើម្បីឱ្យតុលាការសាកសួរនិងធ្វើការចោទប្រកាន់ជាផ្លូវការ ពាក់ព័ន្ធនឹងករណីជួញដូរ…
រាជធានីភ្នំពេញ ៖ ទីបំផុត មានមនុស្សតែ៩នាក់ប៉ុណ្ណោះក្នុងចំណោម១០១នាក់ បានត្រូវនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បញ្ជូនទៅសាលាដំបូងកាលពីព្រឹកថ្ងៃទី៣០ ខែសីហាកន្លងទៅ ដែលមុននេះគ្រោងទៅដល់២០នាក់ឯណោះ ដើម្បីឱ្យតុលាការសាកសួរនិងធ្វើការចោទប្រកាន់ជាផ្លូវការ ពាក់ព័ន្ធនឹងករណីជួញដូរ ចាត់ចែង និងសម្រួលឲ្យប្រើប្រាស់នូវសារធាតុញៀន និងសមគំនិតប្រព្រឹត្តនៅហាងខារ៉ាអូខេ Go១៨ ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក ។
មនុស្សចំនួន៩នាក់នេះមាន ៖ ១-ឈ្មោះ Huang Fei Xiong ភេទប្រុស អាយុ៣០ឆ្នាំ ជនជាតិចិន ជាបុគ្គលិកផ្នែកគណនេយ្យក្លិប១៣KTV ស្នាក់នៅខុនដូអូឡាំព្យាអគារC១ សង្កាត់វាលវង់ ខណ្ឌ៧មករា, ២-ឈ្មោះ Huang Fei Hao ភេទប្រុស អាយុ២៣ឆ្នាំ ជនជាតិចិន ជាបុគ្គលិកផ្នែកគណនេយ្យក្លិប១៣KTV ស្នាក់នៅក្នុងសង្កាត់ផ្សារដេប៉ូទី១ ខណ្ឌទួលគោក, ៣-ឈ្មោះ Lin Kang Lai ភេទប្រុស អាយុ៤៧ឆ្នាំ ជនជាតិចិន ជាបុគ្គលិកផ្នែកសេវាកម្មក្លិប១៣ KTV ស្នាក់នៅក្នុងសង្កាត់ផ្សារដេប៉ូទី១ ខណ្ឌទួលគោក៤-ឈ្មោះ Zhang Jin Wei ភេទប្រុស អាយុ៣០ឆ្នាំ ជនជាតិចិន ជាបុគ្គលិកផ្នែកសេវាកម្មក្លិប១៣KTV ស្នាក់នៅខុនដូ ក្នុងសង្កាត់កាកាបទី១ខណ្ឌពោធិសែនជ័យ។
៥-ឈ្មោះ វី សាលបុត្រ ភេទប្រុស អាយុ៤១ឆ្នាំ ជនជាតិខ្មែរ ជាប្រធានសន្តិសុខ ស្នាក់នៅផ្ទះគ្មានលេខ ផ្លូវបេតុង ភូមិសន្សំកុសល១ សង្កាត់បឹងទំពុន ខណ្ឌមានជ័យ, ៦-ឈ្មោះ Ngoc Giau ភេទស្រី អាយុ២០ឆ្នាំ ជនជាតិវៀតណាម ស្នាក់នៅខុនដូ ក្នុងសង្កាត់ទន្លេបាសាក់ ខណ្ឌចំការមន ។ ៧-ឈ្មោះ យ៉ាយ វុធថា ភេទប្រុស អាយុ៣៤ឆ្នាំ ជនជាតិខ្មែរ ជាអ្នកបើកបររថយន្ត ស្នាក់នៅផ្ទះគ្មានលេខ ផ្លូវលំ ឃុំគគីរ ស្រុកកៀនស្វាយ ខេត្តកណ្តាល, ៨-ឈ្មោះ សៅ សុខគា ភេទប្រុស អាយុ១៩ឆ្នាំ ជនជាតិខ្មែរ ជាសន្តិសុខ ស្នាក់នៅក្នុងក្លិប១៣KTV សង្កាត់ផ្សារដេប៉ូទី១ ខណ្ឌទួលគោក និង៩-ឈ្មោះ ទិត្យ ចាន់កក្កដា ភេទប្រុស អាយុ២២ឆ្នាំ ជនជាតិខ្មែរ ជាសន្តិសុខ ស្នាក់នៅក្នុងក្លិប១៣KTV សង្កាត់ផ្សារដេប៉ូទី១ ខណ្ឌទួលគោក ។
ជាមួយនឹងការបញ្ជូនខ្លួននេះ សមត្ថកិច្ចក៏បានភ្ជាប់ជាមួយនឹងវត្ថុតាងរួមមាន ដបថ្នាំទឹក ចំនួន១៩ដបសង្ស័យជាសារធាតុញៀន ដបថ្នាំពណ៌ផ្កាឈូក១៤ដប និងដបថ្នាំទឹកម៉ាក Rel deil ១ដប ម្សៅក្រាមពណ៌សថ្លា២៧កញ្ចប់តូច ថ្នាំគ្រាប់ពណ៌បៃតង២៣កញ្ចប់តូច ដបថ្នាំចម្រុះពណ៌មានអក្សរចិន៦៣ដប ម្សៅកញ្ចប់ម៉ាក Sidomuucul binary stawlna ពណ៌បៃតង១៦កញ្ចប់តូច ម្សៅកញ្ចប់ពណ៌តែ២០កញ្ចប់តូច ម្សៅកញ្ចប់រូបផ្លែឈើ១០កញ្ចប់ កញ្ចប់រូបផ្លែប៉ោមពណ៌ខៀវ៦កញ្ចប់ និងថ្នាំគ្រាប់ពណ៌ក្បឿង៥គ្រាប់ ។
ក្រោយពេលបញ្ជូនជនសង្ស័យទាំង៩នាក់ និងដាក់ជូនវត្ថុតាងដល់ស្ថាប័នអយ្យការអមសាលាដំបូងរាជធានីភ្នំពេញ សំណុំរឿងនេះត្រូវបានលោក ម៉ុត ដារ៉ា ព្រះរាជអាជ្ញារងបើកការសាកសួរពេញមួយព្រឹក ប៉ុន្តែមិនទាន់បានបញ្ចប់ទេ ហើយតំណាងអយ្យការបានផ្ញើទៅសមត្ថកិច្ចវិញ ដោយតម្រូវឲ្យនាំមកសាកសួរនៅព្រឹកថ្ងៃទី៣១ ខែសីហាទៀត ។ ពួកគេកំពុងរងនូវការចោទប្រកាន់ពីបទ ជួញដូរ ចាត់ចែង និងសម្រួលឲ្យប្រើប្រាស់សារធាតុញៀន និងសមគំនិត ។
សូមរំឭកថា កាលពីវេលាម៉ោងប្រមាណ១និង១៥នាទីរំលងអធ្រាត្រឈានចូលថ្ងៃទី២៦ខែសីហា ឆ្នាំ២០២០២ កម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ សហការជាមួយនឹងកម្លាំងអន្តរាគមន៍ពិសេសបានឆ្មក់ចូលទៅបង្ក្រាបនៅខារ៉ាអូខេ Go១៨ ស្ថិតនៅចំណុចកែងរវាងផ្លូវលេខ២០៦និងផ្លូវលេខ២១៩ ម្តុំផ្សារដេប៉ូ ក្នុងសង្កាត់ផ្សារដេប៉ូទី១ ខណ្ឌទួលគោក ដែលមានមនុស្សប្រុសស្រីជាច្រើននាក់ចូលទៅប្រើប្រាស់ថ្នាំគ្រវី និងជួញដូរគ្រឿងញៀន ។
ក្នុងប្រតិបត្តការនេះ សមត្ថកិច្ចបានឃាត់ខ្លួនមនុស្សរហូតដល់១០១នាក់ មានចិន ខ្មែរ និងវៀតណាម ប៉ុន្តែជាក់ស្តែងមានតែ៩នាក់ទេ ដែលរកឃើញថា ជាប់ពាក់ព័ន្ធនឹងបទល្មើសគ្រឿងញៀន ។ មនុស្សទាំង៩នាក់នោះទៀត ក៏កំពុងស្ថិតនៅក្នុងការសង្ស័យដែរ លុះត្រាតំណាងអយ្យការសម្រេចធ្វើការចោទប្រកាន់ជាផ្លូវការ ទើបពួកគេជាប់ពាក់ព័ន្ធនឹងបទល្មើស ៕
ចែករំលែកព័តមាននេះ