រាជធានីភ្នំពេញ ៖ មានការភ្ញាក់ផ្អើល តៗគ្នាពីសំណាក់ក្រុមអាវករលក់ដូរ និងក្រុមអ្នកដូរលុយ នៅក្នុងផ្សារច្បារអំពៅនាវេលាថ្ងៃទី១ ដើមខែកញ្ញា ឆ្នាំ២០២០នេះថា មានការផ្អាកមិនចាយក្រដាសប្រាក់ដុល្លារ 1$ , 2$ និងក្រដាស 5$ ដែលជាការភ្ញាក់ផ្អើលឡើងសារជាថ្មីម្តងទៀត បន្ទាប់ពីផ្អើលខ្លាំងដោយសារការភ័ន្តច្រលំមួយសារ កាលពីកំឡុងចុងខែឧសភា កន្លងទៅ ។
ជាក់ស្តែង នៅវេលាព្រឹកដើមខែកញ្ញានេះ បងប្អូនអាជីវករលក់ដូរមួយចំនួនក្នុងផ្សារ ពុំព្រមទទួលក្រដាសប្រាក់ 1$ , 2$ និង 5$ ពីបងប្អូនពលរដ្ឋដែលទៅរកទិញទំនិញ ឬម្ហូបអាហារក្នុងផ្សារឡើយ ដោយក្រុមអាជីវករលើកឡើងថា ពួកគេឃើញមានការផ្សព្វផ្សាយលើបណ្តាញទំនាក់ទំនងសង្គមហ្វេសប៊ុក ដោយរដ្ឋអោយផ្អាកការចាយក្រដាសប្រាក់ដូចបានរៀបរ៉ាប់ខាងលើ ដូច្នេះហើយទើបពួកគេមិនទទួលយកអ្នកទិញដូចគ្នា ។
ចំណែកឯបងប្អូនជាអ្នកប្រកបរបរដូរលក់វិញ ក៏ពុំព្រមទទួលដូរក្រដាសលុយទាំង៣ប្រភេទនេះដែរ ពួកគេបញ្ជាក់ថា បើអ្នកដូរចង់ដូរទាន់តែកាត់ទឹកខ្ពស់ទើបព្រមដូចអោយ បើពុំនេះទេ គឺមិនដូរឡើយ ។
ជុំវិញបញ្ហានេះ លោកគ្រី ហ៊ុច ដែលជាអនុប្រធានផ្សារបានបញ្ជាក់ប្រាប់កោះសន្តិភាពថា នារសៀលថ្ងៃទី០១ ខែកញ្ញា ឆ្នាំ២០២០នេះថា ៖ ក្រោយទទួលបានព័ត៌មានខាងលើនេះហើយ លោក និងលោក គួច ចំណាន ប្រធានផ្សារ រួមជាមួយកូនចៅក្រោមឱវាទបានយកមេក្រូចុះដើរផ្សព្វផ្សាយស្នើរអោយបងប្អូនអាជីវកលក់ដូរ និងអ្នកដូរលុយ មេត្តាចាយលុយទាំងនោះធម្មតាទៅ ព្រោះរដ្ឋាភិបាលមិនមានការណែនាំអោយផ្អាកការចាយដុល្លារទាំង៣ប្រភេទខាងលើឡើយ ហើយស្នើបងប្អូនសូមកុំជឿលើការផ្សព្វផ្សាយមិនពិត និងមិនមានមូលបទអោយសោះ ដែលបានបំពុល និងបង្កជាភាពចលាចលដល់សង្គមជាតិ ។
គួរបញ្ជាក់ថា សម្តេចតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា ធ្លាប់បានចេញសេចក្តីណែនាំមួយដល់ពលរដ្ឋនៅទូទាំងប្រទេស មេត្តាកុំមានការភ័ន្តច្រលំ និងសូមចាយលុយដុល្លារក្រដាស 1$ , 2$ និង 5$ ជាធម្មតាទៅ ព្រោះរដ្ឋមិនបានផ្អាក ឬហាមមិនចាយលុយទាំង៣ប្រភេទនេះឡើយ ។ ហើយការផ្អាកកន្លងទៅ វា គឺជាការងាររវាងធនាគារជាតិ ជាមួយនឹងធនាគារពាណិជ្ជកម្ម និងគ្រឹះស្ថានមីក្រូហិរញ្ញវត្ថុទទួលបញ្ញើរប្រាក់ប៉ុណ្ណោះ ដោយឡែកចំពោះការចាយវាយនៅខាងក្រៅ សូមចាយវាយតាមធម្មតា កុំមានការភ័យខ្លាច និងព្រួយបារម្ភអោយសោះ ។
សូមរំលឹកថា យោងតាមសេចក្ដីប្រកាសព័ត៌មាន របស់ធនាគារជាតិនៃកម្ពុជា ស្ដីពីកិច្ចប្រជុំពិភាក្សាអំពីបញ្ហាប្រឈម នៃចរាចរណ៍ក្រដាសប្រាក់ដុល្លារអាមេរិកប្រភេទ ១$ ២$ និង ៥$ នៅកម្ពុជា នាថ្ងៃទី២៨ ឧសភា បានឲ្យដឹងថា ដោយពិនិត្យឃើញថា ទាំងក្នុងឃ្លាំងគ្រឹះស្ថានធនាគារ និងហិរញ្ញវត្ថុ និងធនាគារជាតិនៃកម្ពុជា មានការគរជន់ក្រដាសប្រាក់ដុល្លារអាមេរិកប្រភេទ ១$ ២$ និង ៥$ ដែលនេះសរបញ្ជាក់ថា តម្រូវការនៃក្រដាសប្រាក់ទាំងនេះ មានកម្រិតទាបក្នុងទីផ្សារ អង្គប្រជុំបានឯកភាពដាក់ចេញ នូវវិធានការមួយចំនួនដូចខាងក្រោម ៖ ធនាគារជាតិនៃកម្ពុជា នឹងផ្តល់ពេលវេលាចំនួន៣ខែ ចាប់ពីថ្ងៃទី១ ខែមិថុនា ឆ្នាំ២០២០ ដល់ថ្ងៃទី៣១ ខែសីហា ឆ្នាំ២០២០ ដល់គ្រឹះស្ថានធនាគារ និងហិរញ្ញវត្ថុ ដើម្បីនាំយកក្រដាសប្រាក់ដុល្លារអាមេរិកប្រភេទ ១$ ២$ និង ៥$ មកធនាគារជាតិនៃកម្ពុជា ដើម្បីដឹកជញ្ជូនចេញទៅក្រៅប្រទេស ដោយឥតគិតកម្រៃសេវា ៕
ចែករំលែកព័តមាននេះ