ពេលនេះ វង្ស ណយ យ៉ាងណាហើយ ក្រោយប្រកាសឈប់ឡើងរេញ
- ភ្នំពេញ
រាជធានីភ្នំពេញ ៖ ក្រោយ កីឡាករ វង្ស ណយ ប្រកាសជំហរឈប់ឡើងរេញ គេនៅតែឃើញលោកបង្ហាញវត្តមានចេញចូលក្លិបប្រដាល់ ទៅលេងមិត្តភក្តិម្ដងម្កាលនៅឡើយទេ ដោយមានន័យថា…
រាជធានីភ្នំពេញ ៖ ក្រោយ កីឡាករ វង្ស ណយ ប្រកាសជំហរឈប់ឡើងរេញ គេនៅតែឃើញលោកបង្ហាញវត្តមានចេញចូលក្លិបប្រដាល់ ទៅលេងមិត្តភក្តិម្ដងម្កាលនៅឡើយទេ ដោយមានន័យថា…
រាជធានីភ្នំពេញ ៖ ក្រោយ កីឡាករ វង្ស ណយ ប្រកាសជំហរឈប់ឡើងរេញ គេនៅតែឃើញលោកបង្ហាញវត្តមានចេញចូលក្លិបប្រដាល់ ទៅលេងមិត្តភក្តិម្ដងម្កាលនៅឡើយទេ ដោយមានន័យថា នៅតែមានទំនាក់ទំនងជាមួយអ្នកប្រដាល់ ដោយមិនផ្ដាច់ទំនាក់ទំនងពីវិស័យនេះទាំងស្រុងនោះទេ ។ យ៉ាងណាមិញ លោកនៅតែឆ្លើយសំណួរអ្នកគាំទ្រថា សម្រាប់ឱកាសប្រដាល់គឺមហាជននឹងមានការភ្ញាក់ផ្អើលនៅថ្ងៃណាមួយ ដោយចង់សំដៅថា ការប្រកាស
លាឈប់របស់លោកគឺអាចគ្រាន់តែដោយសារជំងឺកូវីដ-១៩ ធ្វើឱ្យវិស័យប្រដាល់មានការប៉ះពាល់ប៉ុណ្ណោះ។
កីឡាករ វង្ស ណយ និយាយថា សម្រាប់ការប្រដាល់លោកសុំមិននិយាយថានឹងឈប់ជារៀងរហូតនោះទេ ដោយលោកស្នើឱ្យចាំអ៊ុតមើលក្នុងថ្ងៃណាមួយ និងរង់ចាំឱ្យស្ថានភាពប្រដាល់មានភាពប្រសើរសិន ។ លោកថា នៅក្នុងអំឡុងពេលនេះ គឺលោកអត់ចង់និយាយជាមួយការប្រដាល់នោះទេ ដោយសារតែលោក និងភរិយា ក៏មមាញឹកនឹងមុខរបរលក់ងៀតក្របី ដែលភរិយារបស់លោក និងដៃគូសហការធ្វើដោយផ្ទាល់ដៃ នៅលើហ្វេសប៊ុក ។
លោកថាមុខរបររាល់ថ្ងៃ កាក់កបមិនអន់ទេ ដោយក្នុងថ្ងៃខ្លះ ងៀតក្របីរបស់លោកត្រូវដឹកខ្លួនឯងនោះផង ដើម្បីទទួលបានថវិកាថ្លៃដឹកគ្រាន់ហូបកាហ្វេ និងដើម្បីកុំឱ្យអផ្សុក។ ម្យ៉ាងមកពីលោកយល់ថា ស្ថានភាពប្រដាល់មិនសូវល្អប្រសើរ ព្រោះតែលោកគ្មានគូបរទេសប្រកួតផង និងយល់ថាស្ថានភាពនៅក្នុងពេលនេះ គឺមានតែមុខរបរតាមអនឡាញ ហើយលក់របស់ហូប ទើបអាចចិញ្ចឹមឆ្នាំងបានផង ទើបលោកថា លក់ងៀតក្របីល្អជាង ព្រោះលុយចូលរាល់ថ្ងៃ ។
នៅក្នុងពេលនេះលោក និងភរិយា បានជួលផ្ទះមួយកន្លែងនៅម្ដុំចម្ការដូង ដោយធ្វើងៀតក្របីផង និង ឡាយដោយផ្ទាល់មិនដែលលស់ថ្ងៃផង ។ ខុសពីពេលមុនដែលបានប្រកាសថា គឺបោះបង់ហើយសម្រាប់អាជីពប្រដាល់ លោកបែរជានិយាយថា«សម្រាប់បងប្អូនដែលចង់ឃើញខ្ញុំប្រដាល់ ចាំមើលសិន ចាំរកឱកាសល្អសិន ហើយបងប្អូនគង់តែដឹងទេ ថាតើយ៉ាងម៉េចសម្រាប់ការប្រដាល់ ចាំស្ដាប់មេស៊ីសងសិន តែឥឡូវសុំលក់ងៀតក្របីសិន ព្រោះរាល់ថ្ងៃកូវីដ-១៩ក៏មិនអាចឱ្យអ្នកប្រដាល់មានគូបរទេសឡើងប្រកួតបានដែរ»។
លោកបន្តទៀតថា រាល់ថ្ងៃបានមុខរបរងៀតក្របីចិញ្ចឹមឆ្នាំងមួយ លោកអត់ភ័យដូចមុនទៀតទេ ហើយលោកក៏មិនខ្មាសអ្នកណាដែរ នៅពេលអ្នកខ្លះនិយាយថា លោកគឺជាកីឡាករល្បីឈ្មោះ តែបែរជាលក់ងៀតក្របីតាមហ្វេសប៊ុក និងដឹកឱ្យភ្ញៀវដោយផ្ទាល់ បើទោះជាមុខរបរនេះ មិនចំណេញច្រើនក្ដី ។ លោកលក់ត្រឹមតែមួយគីឡូ៦៥០០០រៀលប៉ុណ្ណោះ ខណៈដែលលោកប្រកាសថា ងៀតក្របីវង្សណយរាល់ថ្ងៃ គឺហាលមិនទាន់ ដឹកមិនទាន់ និងទទួលបានចំណូលច្រើន ស្របពេលដែលកូវីដ-១៩លែងសូវអំណោយផលដូចមុនសម្រាប់រកប្រាក់ ។
ជាមួយនឹងការបង្ហាញតម្រុយថា ក្រោយចប់កូវីដ-១៩អ្នកគាំទ្រនឹងដឹងថា លោកនៅប្រកួត ឬឈប់ដូចសន្យា បានធ្វើឱ្យគេមើលឃើញភ្លាមៗថា លោកទំនងជាមិនឈប់ដូចអ្វីដែលបានតាំងចិត្តមួយប្រាវមុននោះទេ គឺនឹងនៅតែទទួលប្រកួត ដោយសារតែលោកប្រកាសបែបនេះរាប់ភ្លេចមកហើយ ប៉ុន្តែចុងក្រោយ នៅពេលមានគូល្អប្រកួត ហើយបានតម្លៃខ្ពស់ គឺទទួលមិនដែលប្រកែក។
គួររំលឹកផងដែរថា លោកធ្លាប់បានថ្លែងប្រាប់បណ្ដាញសារព័ត៌មានក្នុងស្រុកថា លោកពិតជាសម្រេចចិត្តលាឈប់ពីអាជីពអ្នកប្រដាល់ពិតប្រាកដមែន ដោយលោកលើកហេតុផលថា ដោយសារបញ្ហាការគាំទ្រនាពេលចុងក្រោយនៅមានកម្រិត និងទី២ គឺដោយសារតែជ្រក់ជ្រិញនឹងការជេរប្រមាថ ដែលធ្វើឲ្យលោកបាក់ទឹកចិត្ត មិនអាចប្រកបអាជីពមួយនេះបានបន្ដទៀត ។
អ្នកលេងគុនខ្មែរវ័យ៣៣ឆ្នាំរូបនេះបានពន្យល់ថា ការសម្រេចចិត្តរបស់លោកគឺជារឿងច្បាស់លាស់ ដោយសារតែលោកគិតថា ការគាំទ្រគុនខ្មែរនៅមានកម្រិត គាំទ្រតែមាត់ អត់គាំទ្របែបជួយទី១ ហើយទី២ ពេលលោកវ៉ៃឈ្នះអត់បានអីមកវិញទេបានតែតម្លៃ តែដល់ពេលវ៉ៃចាញ់ គឺរងនូវការជេរប្រមាថ ដែលលោកយល់ថា តើមានហេតុផលអ្វីដែលលោកត្រូវតស៊ូទៀត ។ លោកនិយាយថា បើលោកតស៊ូទៅមុខ ក៏មិនបានល្អជាងហ្នឹងនោះដែរ ទើបលោកយល់ថា ដល់ពេលហើយដែលត្រូវចាកចេញ ។ លោកពន្យល់ថា ដំបូងឡើយចិត្តចង់វ៉ៃទៀតដែរ តែដោយតូចចិត្តនឹងមនុស្សមួយចំនួនចូលចិត្តជាន់ពន្លិច និយាយរួមគឺលោកបាក់ទឹកចិត្ត ។ លោកនិយាយថា វ៉ៃឈ្នះគេថាយើងឈ្នះដោយសារប៉ះអ្នកអន់ ដល់យើងវ៉ៃឈ្នះអ្នកខ្លាំង… និយាយទៅសម្រាប់ប្រជាជនមួយភាគតូច គាត់ចាំតែតែជេរទេ។
កីឡាករមានប្រវត្ដិឡើងសង្វៀនរាប់រយដងរូបនេះបានបង្ហើបថា ទោះលាឈប់ពីអាជីពកីឡាករមែន តែខ្លួនក៏មិនទាន់សម្រេចចិត្តថា ត្រូវឈប់ពាក់ព័ន្ធនឹងវិស័យមួយនេះដែរ ពោលគឺលោកនឹងធ្វើការពិចារណា ប្រសិនបើមានការផ្ដល់ឱកាសឲ្យលោកធ្វើជាមន្ដ្រីបច្ចេកទេសក្នុងសហព័ន្ធកីឡាប្រដាល់គុនខ្មែរ ។ ដោយឡែកពាក់ព័ន្ធនឹងអនាគតកូនៗលើវិថីប្រដាល់គុនខ្មែរវិញ លោកបានសង្កត់ធ្ងន់ថា អាស្រ័យទៅលើភាពជាក់ស្ដែង ។
បើសិនថ្ងៃក្រោយទៅកីឡាកររីកចម្រើន អ្នករិះគន់គាត់មានការយល់ដឹងច្រើន បានលុយច្រើនកាន់តែសប្បាយចិត្ត តែបើបានលុយតិច លោកអត់ទេ អត់ឲ្យកូនឈឺសាច់ដូចលោកឡើយ ។ កីឡាករ វង្ស ណយ បានប្រកាសលាឈប់ពីអាជីពគុនខ្មែរនេះ នៅលើបណ្ដាញសង្គមផ្លូវការរបស់លោក ដោយលោកសរសេរថា«ខ្ញុំវ៉ៃយូរណាស់ហើយ ល្បីតែឈ្មោះ គ្មានសល់អីទេ ពេលនេះខ្ញុំអស់កម្លាំងវ៉ៃទៀតហើយ ទើបខ្ញុំសម្រេចចិត្តឈប់វ៉ៃនៅពេលនេះ ព្រោះខ្លាចពិការ ខានបានរកស៊ីចិញ្ចឹមកូន។ បើខ្ញុំពិការទៅគ្មានអ្នកណាចិញ្ចឹមកូនខ្ញុំទេ»។
ប៉ុន្តែជំហរចុងក្រោយ លោកក៏ប្រកាសរាល់ពេល Live ផងដែរថា បើមានពេល មានឱកាស គឺការប្រកួតជាថ្មី នឹងមានជាថ្មី ។ ជាមួយនឹងករបង្ហើបនេះ ទើបគេយល់ថា លោកប្រកាសលើកមុនអាចគ្រាន់តែជាអារម្មណ៍មួយឆាវ និងដោយសារតែកូវីដ-១៩ មិនមានកីឡាករបរទេសមកប្រកួត ដែលធ្វើឱ្យលោកពិបាកទាក់ទាញការគាំទ្រ និងមិនទទួលបានតម្លៃខ្លួនខ្ពស់តែប៉ុណ្ណោះ។
យោងតាមប្រវត្តិ កីឡាករពូកែវាយកែងនេះ បានចូលប្រឡូកអាជីពប្រដាល់គុនខ្មែរដំបូងនៅឆ្នាំ២០០៣ បន្ទាប់មកលោកបានសាងកេរ្ដិ៍ឈ្មោះល្បីល្បាញកាន់តែខ្លាំងឡើងៗ រហូតត្រូវបានផ្គូផ្គងឲ្យជួបកីឡាករបរទេសជាបន្ដបន្ទាប់ ក្រោយត្រូវបានចាត់ទុកជាកីឡាករកម្រិត A នៅកម្ពុជា ។
ហើយដៃគូក្នុងស្រុក ដែលអ្នកគាំទ្រចងចាំមិនភ្លេចពេលប៉ះ វង្ស ណយមានដូចជា កែវ រំចង់, ឡុង សុភី និងអតីតកីឡាករ ឡៅ ស៊ីណាត ជាដើម ។ បច្ចុប្បន្នមុនប្រកាសឈប់ឡើងសង្វៀន លោកក៏មានរបរលក់ម្ហូបតាម Online ដើម្បីទ្រទ្រង់ជីវភាពផងដែរ។ យ៉ាងណាក៏ដោយ ការប្រកាសលាឈប់របស់លោកមិនត្រូវបានអ្នកគាំទ្រទុកចិត្តនោះទេ ខណៈដែលលោកមិនមានលំនឹងការងារណាមួយច្បាស់លាស់ជំនួសឱ្យការប្រដាល់នាពេលនេះ។
ម្នាក់ៗយល់ថា វាគឺជារឿងសាំហើយ ដោយសារតែលោកប្រកាសបានតែប្រកាស ប៉ុន្តែនៅពេលមហាជនមានការចាប់អារម្មណ៍ ហើយមានការស្នើឱ្យលោកឡើងប្រកួត ក៏ឃើញមុខឡើងរេញដដែលជាដដែល ដែលពិបាកជឿថា តើការប្រកាសលើកនេះ អាចទុកចិត្តបាន ឬយ៉ាងណា ហើយទីបំផុតការប្រកាសជាថ្មីបញ្ជាក់ថា លោកអត់អាចធ្វើដូចការនិយាយមួយពេលនោះឡើយ ដ្បិតតែមិនទាន់ពិសោធន៍ដឹងថា តើលោកទទួលប្រកួតឡើងវិញ ក្រោយចប់កូវីដ-១៩ ឬលក់ងៀតក្របី ឈប់នឹកនាមែនទែន ៕
ចែករំលែកព័តមាននេះ