រាជធានីភ្នំពេញ ៖ ក្រុមយុវជនដែលគោរពស្រឡាញ់ លោក រ៉ុង ឈុនប្រធានសហជីព និងជាអតីតប្រធានសមាគមគ្រូបង្រៀនឯករាជ្យបានដាក់ញត្តិទៅកាន់ស្ថានទីជប៉ុន និងទូតអាម្លឺម៉ង់ទាមទារឲ្យមាការដោះលែងរូបលោក រ៉ុង ឈុន និងអ្នកមួយចំនួនទៀត ដែលសមត្ថកិច្ច ចាប់ខ្លួនកន្លងមក ។
លោក ជុំ ហួត ប្រធានសមាគមអ្នកស្រឡាញ់បរិស្ថាន និងសង្គមបានឲ្យដឹងនៅពេលដាក់ញត្តិទៅកាន់ស្ថានទូតជប៉ុន និងទូតអាម្លឺម៉ង់នាព្រឹកថ្ងៃទី១ ខែកញ្ញា ឆ្នាំ២០២០ថា ការដាក់ញត្តិរបស់ក្រុមយុវជនថ្ងៃនេះ ដើម្បីទាមទារឲ្យរាជរដ្ឋាភិបាលក៏ដូចជា តុលាការដោះលែងលោ ករ៉ុង ឈុន និងទោសសមនៈសិការផ្សេងទៀត ដែលបានចាប់ខ្លួនកន្លងមក ។
លោកបញ្ជាក់ថា ៖«យើងដាក់ញត្តិថ្ងៃនេះក្នុងគោលបំណងដើម្បីទាមទារឲ្យប្រទេសហត្ថលេខីនៃកិច្ចព្រមព្រៀងទីក្រុងប៉ារីស២៣ តុលា ១៩៩១ ដើម្បីទាមទារឲ្យគេជួយអន្តរាគមន៍ឲ្យមករាជរដ្ឋាភិបាលកម្ពុជាដោះលែងលោករ៉ុង ឈុន និងអ្នកដទៃទៀតដែលបានចាប់ខ្លួន» ។ លោកក៏បានលើកឡើងថា អ្វីដែលរដ្ឋាភិបាលកំពុងធ្វើ គឺកំពុងរំលោភនីតិរដ្ឋដែលការពារដោយរដ្ឋធម្មនុញ្ញនៅក្នុងប្រទេសកម្ពុជា ។ ហើយអ្វីដែលក្រុមយុវជន កម្មករ ប្រជាពលរដ្ឋ ធ្វើនេះដើម្បីទាមទាររកយុត្តិធម៌ប៉ុណ្ណោះ ។
លោកថា ៖«យើងនៅតែចេញមុខទាមទារជានិច្ចក្នុងការស្វែងរកដំណោះស្រាយណាមួយ ដើម្បីជូនពួកគាត់ ហើយខ្ញុំសុំណូមពរ និងទទូចដល់រាជរដ្ឋាភិបាលគិតគូរឡើងវិញអំពីរដ្ឋធម្មនុញ្ញ និងសិទ្ធិបញ្ចេញមតិរបស់ប្រជាពលរដ្ឋក្នុងការទាមទារអ្វីមួយស្របតាមច្បាប់នៅក្នុងប្រទេសកម្ពុជា» ។
ជាមួយគ្នានោះដែរ លោក ជុំ ហួត ក៏បានឲ្យដឹងនៅថ្ងៃនេះបានដាក់ញត្តិទៅស្ថានទូតជប៉ុន និងស្ថានទូតអាម្លឺម៉ង់ ។ ការដាក់ញត្តិនេះគេក៏បានស្វាគមន៍ និងយកញាត្តិយើងហើយ ។ គេថា នឹងជជែកជាមួយរាជរដ្ឋាភិបាលធ្វើយ៉ាងណាឲ្យរដ្ឋាភិបាលបន្ទន់ឥរិយាបថសណ្តោសប្រណីធ្វើយ៉ាងណា ដោះលែងពួកគាត់ ។ បើតាមលោកជុំ ហួតក៏បានលើកឡើងថា ក្រុមយុវជនកំពុងជជែកគ្នាក្នុងការបន្តដើរដាក់ញត្តិអន្តរាគមន៍ទៅកាន់ស្ថានទូតផ្សេងទៀត ។
ស្ថានទូតដែលដាក់នោះ គឺស្ថិតកិច្ចព្រមព្រៀងទីក្រុងប៉ារីស ។ លោកថា៖«ពួកយើងតំណាងយុវជន កម្មករ ប្រជាពលរដ្ឋក៏មានការព្រួយបារម្ភចំពោះសុវត្ថិភាពផ្ទាល់ខ្លួនផងដែរ ។ ដោយសារនៅពេលដាក់ញត្តិតែងតែមានការរារាំងពីកំលាំង អាជ្ញាធរក៏ដូចជា មានការគំរាមកំហែងខ្លះពីមន្ត្រីផងដែរ ។ ដូច្នេះយើងក៏មានការ ភ័យខ្លាចផង ដែរ»។
បើតាមការអះអាងរបស់លោក ជុំ ហួត បានលើកឡើងថា ការដាក់ញត្តិនេះក្រុមយុវជន មិនបានស្នើសុំទៅកាន់សាលារាជធានីភ្នំពេញនោះទេ ព្រោះថា ការធ្វើបែបនេះសំអាងទៅលើច្បាប់ស្តីពីបាតុកម្ម កូដកម្មដែលអាចជួបជុំបានប៉ុន្មាននាក់ ។
ផ្ទុយទៅវិញ ប្រសិនបើការជួបជុំគ្នាមានច្រើនលើសពីច្បាប់កំណត់ក្រុមលោកនឹងសុំទៅសាលារាជធានីភ្នំពេញ ។ លោកថា ការដាក់ញត្តិនៅថ្ងៃនេះមានសកម្មជនប្រមាណ១០០នាក់ បានមកជួបជុំគ្នា ។
សូមជម្រាបថា កាលពីថ្ងៃទី៣១ សីហា ឆ្នាំ២០២០កន្លងមកក្រុមយុវជនខាងលើបានដាក់ញត្តិនៅស្ថានទូតអូស្ត្រាលី ព្រឹកនេះក្រុមយុវជន និងប្រជាពលរដ្ឋដែលគោរពស្រលាញ់លោកគ្រូ រ៉ុង ឈុន និងអ្នកទោសមនៈសិការជាតិផ្សេងៗទៀតដែលត្រូវបានជាប់ពន្ធនាគារដោយអយុត្តិធម៌បានធ្វើការដាក់ញត្តិនៅស្ថានទូតអូស្ត្រាលី ដើម្បីឲ្យមានការដោះលែងពួកគាត់ ។
ខ្លឹមផ្សាញត្តិមានពីរចំនុចសំខាន់ៗ ១- សូមអោយស្ថានទូតអូស្ត្រាលីជួយអន្តរាគមន៍អោយដោះលែងលោកគ្រូ រ៉ុង ឈុន លោក សួង សុភ័ន លោក ហ៊ុន វណ្ណៈ អ្នកនាង ឈឿន ដារ៉ាវី និងអ្នកជាប់ឃុំដោយរឿងនយោបាយដទៃទៀត ឲ្យមានសេរីភាពឡើងវិញ ។ ២- សូមឲ្យស្ថានទូតអូស្ត្រាលីជួយលើកកម្ពស់ស្ដារអនុវត្ត និងគោរពលទ្ធិប្រជាធិបតេយ្យជាពិសេសគោរពសិទិ្ធសេរីភាពបញ្ចេញមតិ និងការជួបជុំតវ៉ាទាមទារយុត្តិធម៌ជូនជនរងគ្រោះក៏ដូចជា យុត្តិធម៌ជូនសង្គមជាតិ ។
គួររឮកថា ក្រៅពីលោក រ៉ុង ឈុន គឺមានអ្នកគាំទ្រ៤នាក់ទៀតដែលត្រូវបានចាប់ខ្លួនជាបន្តបន្ទាប់ គឺមានកញ្ញា ឈឿន ដារ៉ាវី លោក ហ៊ុន វណ្ណៈ កញ្ញា ស កន្និកា និង លោក សួង សោភ័ណ្ឌ ប្រធានគណបក្សខ្មែរឈ្នះ ។
ការចាប់ខ្លួន លោក រ៉ុង ឈុន នៅយប់ថ្ងៃទី៣១ ខែកក្កដា គឺក្រោយពេលដែលលោកថ្លែងពាក់ព័ន្ធនឹងបញ្ហាព្រំដែននៅខេត្តត្បូងឃ្មុំ ។ បញ្ហាព្រំដែននៅខេត្តត្បូងឃ្មុំនេះ កាលពីថ្ងៃទី២៥ សីហា សម្តេចតេជោ ហ៊ុន សែន នាយករដ្ឋមន្ត្រីក៏បញ្ជាឲ្យលោក វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែនចុះជួបប្រជាពលរដ្ឋជាក់ស្តែង ដែលអះអាងថា បាត់បង់ដីស្រែ ដោយសារតែការបោះបង្គោលព្រំដែននោះ ។
បន្ថែមពីនេះ ប្រមុខរដ្ឋាភិបាលបានប្រកាសតាមរយៈហ្វេសប៊ុកថា នឹងបើកសិក្ខាសាលាមួយ ដើម្បីឲ្យប្រជាពលរដ្ឋ សិស្ស និស្សិតចូលស្តាប់ និងសួរអំពីរឿងព្រំដែននេះផងដែរ៕
ចែករំលែកព័តមាននេះ