ក្រុងប៉ោយប៉ែត ៖ មន្ត្រីគយ និងរដ្ឋាករឈរជើងនៅច្រកទ្វារអន្តរជាតិប៉ោយប៉ែតឱ្យដឹងថា ផែនការទប់ស្កាត់ការលួចនាំទំនិញគេចពន្ធចូលអនាធិបតេយ្យធ្វើឱ្យធ្លុះធ្លាយថវិការដ្ឋ គឺសមត្ថកិច្ចគយរឹតបន្តឹងក្រុមឈ្មួញមួយចំនួនដែលធ្លាប់តែជ្រែទំនិញគេចពន្ធតាមរទេះអូសចូលមកតាមច្រកប៉ោយប៉ែតដោយមិនឱ្យក្រុមឈ្មួញទាំងនោះធ្វើសកម្មភាពបានតទៅទៀតទេ។
មន្ត្រីគយឱ្យដឹងថា កន្លងមកកម្មករអូសរទេះបានសុំទំនិញរបស់ថៅកែជ្រែយកចំណេញក្បាលកាក់។ ពេលមកដល់ចំណុចច្រកប្រមូលពន្ធជូនរដ្ឋនោះ កម្មករជ្រែទំនិញមួយចំនួនមានចរិតរឹងរូស ហើយបានប្រើពាក្យសំដី និងអាកប្បកិរិយាមិនគប្បីមកលើមន្ត្រី គយ ធ្វើឱ្យពិបាកដល់ការប្រមូលពន្ធខ្លាំងណាស់ ។ ពេលនេះជាវិធានការមិនឱ្យមានការជ្រែទំនិញគេចពន្ធតាមរទេះទៀតទេ គឺឱ្យពួកគេទាំងអស់ចូលទៅបង់ពន្ធជូនរដ្ឋនៅឯទីស្នាក់ការគយ ឬរដ្ឋាករច្រកប៉ោយប៉ែតឱ្យបានត្រឹមត្រូវ។
មន្ត្រីគយបញ្ជាក់ទៀតថា មិនមែនបិទមិនឱ្យអូសយកទំនិញចូលទេ ប៉ុន្តែសុំឱ្យម្ចាស់ទំនិញចូលទៅបង់ពន្ធឱ្យបានត្រឹមត្រូវ។ ចំពោះការវាយតំលៃអត្រាពន្ធលើមុខទំនិញគេចពន្ធនីមួយៗ គឺចំពោះតំលៃគិតពន្ធចាប់ពី៣០០ដុល្លារចុះក្រោមគឺនៅទីស្នាក់ការសាខាគយរដ្ឋាករខេត្តទើបមានសិទ្ធិវាយតំលៃអត្រាពន្ធនេះបាន។ ដូច្នេះសូមឱ្យអាជីវករ និងឈ្មួញទាំងអស់ចូលបង់ពន្ធជូនរដ្ឋឱ្យបានត្រឹមត្រូវ។
មន្ត្រីមួយចំនួនដែលឈរជើងនៅមាត់ច្រកប៉ោយប៉ែតបង្ហើបឱ្យដឹងថា ការរឹតបន្តឹងរបស់មន្ត្រីគយបែបនេះគឺបណ្តាលមកពី១សប្តាហ៍មុនមានកម្មករជ្រែទំនិញគេចពន្ធទាស់ពាក្យសំដីជាមួយមន្ត្រីគយរហូតឈានដល់ប្រើអំពើហិង្សាផងដែរ ។ ក្រោយពេលមានវិធានការរឹតបន្តឹងឱ្យពួកកម្មករជ្រែទំនិញគេចពន្ធត្រូវតែចូលបង់ពន្ធនោះ ក្រុមកម្មករ និងឈ្មួញជ្រែទំនិញគេចពន្ធមួយចំនួនត្អូញត្អែរថា «ពួកគេនឹងដាច់
បាយ»។
មន្ត្រីពាក់ព័ន្ធដែលឈរជើងនៅច្រកទ្វារឱ្យដឹងថា មន្ត្រីគយធ្វើបែបនេះ គឺមកពីពួកកម្មករ និងអ្នកជ្រែទំនិញទាំងនោះមានចរិតរឹងរូស ដូច្នេះមន្ត្រីគយអស់លទ្ធភាពក្នុងការប្រមូលពន្ធជូនរដ្ឋទើបបានជារឹតបន្តឹង ។ នៅពេលគេរឹតបន្តឹងនោះទំនិញជ្រែអូសតាមរទេះពេលនេះគឺស្ទើរតែធ្លាក់ដល់កំរិតសូន្យទៅហើយនៅច្រកទ្វារប៉ោយប៉ែត ៕
ចែករំលែកព័តមាននេះ