BBC របស់អង់គ្លេសកាលពីពេល ថ្មីៗនេះ ផ្សាយថា មានភាពចលាចលក្នុងពិធីរៀបអាពាហ៍ពិពាហ៍មួយនៅក្រុងរ៉ាមពូរ៉ា រដ្ឋឧត្តរប្រាដេស ភាគខាងជើងប្រទេសឥណ្ឌា ដោយសារលោកជូកាល គីឈ័រ ជាកូនកំលោះអាយុ២៥ឆ្នាំ ដួលសន្លប់នៅចំពោះមុខភ្ញៀវច្រើនកុះករ ខណៈពេលកំពុងបំពាក់ចិញ្ចៀនដល់កូនក្រមុំអុីន ធីរ៉ា។ អាការរបស់កូនកំលោះបែបនេះបណ្តាលមកពីជំងឺឆ្កួតជ្រូកដែលរូបគេលាក់បាំងកូនក្រមុំមិនឱ្យដឹងពីមុនមក ។
ដោយសារកូនកំលោះមានជំងឺឆ្កួតជ្រូក ហើយដួលសន្លប់បែបនោះ ធ្វើឱ្យអាពាហ៍ពិពាហ៍គ្មានកូនកំលោះ ដូច្នេះហើយនាងអីុន ធីរ៉ា ជាកូនក្រមុំខឹងយ៉ាងខ្លាំង ។ ដោយមិនអាចអត់ឱនឱ្យបាន កូនក្រមុំបានរកបុរសនៅលីវធ្វើជាកូនកំលោះជំនួស គឺយកសាច់ញាតិម្នាក់របស់បងថ្លៃធ្វើជាកូនកំលោះ ហើយគេក៏យល់ព្រមភ្លាម ។
លោកជូកាល គីឈ័រ ក្រោយពីធូរស្បើយពីជំងឺឆ្កួតជ្រូកក៏ងឿងឆ្ងល់ព្រោះរូបគេបាត់តំណែងជាកូនកំលោះ ។ នៅពេលដឹងថា នាងជាកូនក្រមុំខឹងខ្លួនដែលលាក់បាំងរឿងមានជំងឺឆ្កួតជ្រូក ទើបយកអ្នកផ្សេងរៀបការជំនួសបែបនោះ លោកជូកាល គីឈ័រ ព្យាយាមទៅសម្របសម្រួលសុំឱ្យនាងប្តូរចិត្តយោគយល់ដល់រូបគេ ព្រោះប្រសិនបើមិត្តភក្តិ និងក្រុមគ្រួសារដឹងថា គេត្រឡប់ទៅផ្ទះវិញដោយគ្មានប្រពន្ធ នោះរូបគេនឹងក្លាយជាតួអង្គកំប្លុកកំប្លែងនិងអាម៉ាស់បំផុត។
ទោះបីជាខំលួងលោមបែបណាក៏ដោយ នារីជាកូនក្រមុំមិនយល់ព្រមទេ ដូច្នេះហើយ ជូកាល គីឈ័រ ទៅប្តឹងប៉ូលិស ប៉ុន្តែសមត្ថកិច្ចមិនអាចជួយបានទេ ព្រោះខាងស្រីរៀបការរួចទៅហើយ ។ យល់ភាពជាក់ស្តែងបែបនោះទៅហើយ លោកជូកាល គីឈ័រ ត្រូវបង្ខំចិត្តចុះចាញ់និងយល់ព្រមដកពាក្យបណ្តឹង ហើយវិលទៅលំនៅឋានវិញទាំងសោកស្តាយ ៕
ចែករំលែកព័តមាននេះ