ខេត្តពោធិ៍សាត់ ៖ ដោយសារនៅរដូវប្រាំងតែងកើតមានភ្លើងឆេះព្រៃលិចទឹកជារៀងរាល់ឆ្នាំធ្វើឲ្យបាត់បង់ជំរកជីវចំរុះ ប្រព័ន្ធអេកូឡូស៊ី ដែនព្រៃលិចទឹក និងទេសភាពធម្មជាតិព្រៃឈើនោះ កាលពីថ្ងៃទី១៣ មីនា ឆ្នាំ២០១១ ផ្នែករដ្ឋបាលជលផលរាំងទិលនៃខណ្ឌរដ្ឋបាលជលផលពោធិ៍សាត់ បានធ្វើពិធីផ្សព្វផ្សាយសេចក្ដីជូនដំណឹងរបស់ក្រសួងកសិកម្មរុក្ខា ប្រមាញ់ និងនេសាទ ស្ដីពីវិធានការការពារ និងទប់ស្កាត់ភ្លើងឆេះព្រៃដល់លោកមេឃុំ មេភូមិ និងប្រធានសហគមន៍នេសាទនៅតាមមូលដ្ឋានឲ្យមានការយល់ដឹងចូលរួមការពារនិងទប់ស្កាត់។
លោជិន ចាន់ថន នាយផ្នែករដ្ឋបាលជលផលរាំងទិលមានប្រសាសន៍ថា ការធ្វើពិធីផ្សព្វផ្សាយនេះ ជាវិធានការរបស់លោករដ្ឋមន្ត្រី ក៏ដូចជាលោកប្រធានរដ្ឋបាលជលផលកម្ពុជា និងលោកនាយខណ្ឌរដ្ឋបាលជលផលពោធិ៍សាត់ ដើម្បីធ្វើឲ្យប្រជាពលរដ្ឋយល់ដឹងជួយការពារ និងទប់ស្កាត់ភ្លើងឆេះព្រៃ ទាំងព្រៃភ្នំ និងព្រៃលិចទឹកជុំវិញបឹងទន្លេសាប។ នៅស្រុកបាកាន ដូចជាឃុំស្វាយដូនកែវ ឃុំអូរតាប៉ោង ឃុំមេទឹក ឃុំបឹងបត់កណ្ដោលនិងឃុំស្នាមព្រះ ដែនព្រៃលិចទឹកមួយចំនួនមានភ្លើងឆេះព្រៃដែលបង្កឡើងដោយការដុតព្រៃរកសត្វ ដុតជញ្រ្ជាំងស្រូវឆេះរាល កាប់ព្រៃដុតរានយកដី ដាំស្លមិនពន្លត់ភ្លើងមុនពេលចាកចេញ ភ្លើងកន្ទុយបារី ឬក្មេងឃ្វាលគោក្របីដុតលេងជាដើម។ បើយើងមិនមានវិធានការការពារទប់ស្កាត់ទេ សកម្មភាពនេះ នឹងបន្តមានជារៀងរហូត ហើយពួកគេគិតថា ជារឿងធម្មតា។
លោកជិន ចាន់ថន បញ្ជាក់ថា ការរកអុសក្នុងដែនព្រៃលិចទឹកបានតែដើមឈើងាប់ៗទេ ហើយអនុញ្ញាតឲ្យដឹកត្រឹមរទេះគោក្របី ឬកង់-ម៉ូតូប៉ុណ្ណោះ បើដឹកតាមរថយន្ត ឬគោយន្តចូលគឺជាលក្ខណៈធ្វើអាជីវកម្មហើយ។ ទន្ទឹមនឹងនេះ ត្រូវបញ្ឈប់ការបូមទឹកបឹងដាក់ស្រែដែលរស់ស្រូវមួយស្រែពីរស្រែងាប់ជីវចំរុះមួយបឹង បង្កមហន្តរាយអស់ទឹកគោក្របីប៉ះពាល់ដល់បរិស្ថាន ហើយរូបភាពនេះជាលេសដើម្បីចាប់ត្រីតែប៉ុណ្ណោះ។ លោឆាយ មន នាយរងខណ្ឌរដ្ឋបាលជលផលពោធិ៍សាត់ បានអានសេចក្ដីជូនដំណឹងរបស់ក្រសួងកសិកម្មរុក្ខា ប្រមាញ់ និងនេសាទ ស្ដីពីវិធានការការពារ និងទប់ស្កាត់ភ្លើងឆេះព្រៃមាន១០ចំណុច ដែលក្រសួងប្រគល់ឲ្យរដ្ឋបាលព្រៃឈើ និងរដ្ឋបាលជលផលគ្រប់ថ្នាក់មានភារកិច្ចផ្ទាល់ក្នុងការដឹកនាំចលនាដោយសហការជាមួយអាជ្ញាធរមូលដ្ឋានសាមី។
ក្នុងឱកាសនោះ លោកប្រាក់ ធុយ នាយរងអធិការដ្ឋានរដ្ឋបាលជលផលខាងត្បូងបឹងទន្លេសាប បានស្នើឲ្យលោកមេឃុំ មេភូមិ និងប្រធានសហគមន៍នេសាទទាំងអស់ជួយផ្សព្វផ្សាយសេចក្ដីជូនដំណឹងនេះបន្តដល់ប្រជាពលរដ្ឋឲ្យបានយល់ដឹងជ្រួតជ្រាប ដើម្បីចូលរួមការពារ និងទប់ស្កាត់ទាំងអស់គ្នា។ យើងត្រូវពន្យល់ដល់បងប្អូនប្រជាពលរដ្ឋឲ្យយល់ដឹងថា ការដុតព្រៃលិចទឹក ការរានដី ការបូមទឹកបឹង ការប្រើប្រដាប់ឆក់ និងឧបករណ៍នេសាទល្មើសច្បាប់ផ្សេងៗទៀតដែលរដ្ឋហាមឃាត់ គឺវាខុសច្បាប់ដែលត្រូវមានទោស។ ពេលយល់ដឹងពីច្បាប់ ពួកគេប្រាកដជាខ្លាចមានទោស ហើយកាត់បន្ថយបទល្មើសជាបណ្ដើរៗ រួចងាកមកចូលរួមការពារ និងទប់ស្កាត់ជាក់ជាមិនខាន ៕
ចែករំលែកព័តមាននេះ