ចៅហ្វាយក្រុងតូក្យូបើកឱកាសឱ្យគូស្នេហ៍ភេទដូចគ្នាចុះបញ្ជីគ្រួសារ
ខណ្ឌស៊ីប៊ូយ៉ា ក្នុងក្រុងតូក្យូ បានផ្តល់ឱកាសដល់គូស្នេហ៍ស្រឡាញ់ភេទដូចគ្នាអាចចុះបញ្ជីជាក្រុមគ្រួសារបាន ។ ជាលើកដំបូងហើយនៅប្រទេសជប៉ុនដែលមានច្បាប់យោគយល់
ខណ្ឌស៊ីប៊ូយ៉ា ក្នុងក្រុងតូក្យូ បានផ្តល់ឱកាសដល់គូស្នេហ៍ស្រឡាញ់ភេទដូចគ្នាអាចចុះបញ្ជីជាក្រុមគ្រួសារបាន ។ ជាលើកដំបូងហើយនៅប្រទេសជប៉ុនដែលមានច្បាប់យោគយល់ចំពោះគូស្នេហ៍ស្រឡាញ់ភេទដូចគ្នា ។
នាងកូយូគី ហ៊ីង៉ាស៊ី និងនាងហុីរ៉ូភូ ម៉ាស៊ូហារ៉ា ជាគូស្នេហ៍បានសម្រេចផ្លាស់ប្តូរលំនៅឋានទៅរស់នៅរួមគ្នាក្នុងខណ្ឌស៊ូប៊ូយ៉ា ក្រុងតូក្យូ បន្ទាប់ពីអាជ្ញាធរក្នុងមូលដ្ឋានបានប្រកាសថានឹងផ្តល់ឱកាសដល់អ្នកស្រឡាញ់ភេទដូចគ្នាអាចចុះបញ្ជីជាគ្រួសារបាន ទោះបីមិនមែនជាការ ចុះបញ្ជីអាពាហ៍ពិពាហ៍តាមច្បាប់របស់ជប៉ុនក៏ដោយ ប៉ុន្តែចាត់ទុកថាជាលើកដំបូងដែលរដ្ឋាភិបាលជប៉ុនផ្តល់ការធានាលើផ្នែកច្បាប់ដល់ក្រុមអ្នកស្រឡាញ់ភេទដូចគ្នា ។
តាមរដ្ឋធម្មនុញ្ញជប៉ុន មាត្រា២៤ បញ្ជាក់ថា «ការរៀបអាពាហ៍ពិពាហ៍ នឹងត្រូវអាស្រ័យលើការពេញចិត្តរបស់ទាំង២ភេទ» ។ មាត្រានេះបង្ហាញភាពមិនច្បាស់លាស់ថា ច្បាប់ហាមរៀបការរវាងគូស្នេហ៍មានភេទដូចគ្នាឬអត់ ?ដូច្នេះទើបគ្មានស្រុក ឬខណ្ឌណាមួយព្រមចុះបញ្ជីអាពាហ៍ពិពាហ៍ដល់គូស្នេហ៍ភេទដូចគ្នា ។ អ្វីដែលអភិបាលខណ្ឌស៊ីប៊ូយ៉ាចាប់ផ្តើមឡើង គឺការចេញប័ណ្ណធានាគូស្នេហ៍ភេទដូចគ្នា ធ្វើឱ្យពួកគេមានលក្ខណៈជាបុគ្គលក្នុងគ្រួសារអាចទិញអចលនទ្រព្យរួមគ្នាបាន ។
អភិបាលខណ្ឌស៊ីប៊ូយ៉ា លោកថូស៊ីថាកា គូវ៉ាហារ៉ា ប្រកាសថា ជាបម្រែបម្រួលដែលខណ្ឌបានបង្ហាញពីការធានាសិទ្ធិសេរីភាពលើភេទ និងសង្ឃឹមថា ការទទួលស្គាល់លើកនេះនឹងរីករាលដាលនៅទូទាំងប្រទេស ដើម្បីបង្ហាញពីការវិវឌ្ឍរបស់ជប៉ុន មុនពេលធ្វើជាម្ចាស់ផ្ទះកីឡាអូឡាំពិក ២០២០ ។
បច្ចុប្បន្នមានតែ១៥ប្រទេសប៉ុណ្ណោះនៅលើពិភពលោកដែលធានាលើការចុះលិខិតអាពាហ៍ពិពាហ៍ឱ្យគូស្នេហ៍ភេទដូចគ្នា រួមមានហូឡង់ បែលហ្ស៊ិក និងកាណាដាជាដើម ខណៈនៅសហរដ្ឋអាមេរិកមាននៅរដ្ឋមួយចំនួន ៕
ចែករំលែកព័តមាននេះ