ខេត្តព្រៃវែង ៖ ដីដុះ គឺជាទីតាំងកំពុងពេញនិយមសំរាប់ងូតទឹកលេងកំសាន្តរបស់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ដែលមានទីតាំងស្ថិតតាមបណ្តោយដងទន្លេមេគង្គក្នុងភូមិស្វាយភ្លោះ ឃុំព្រែកក្របៅ ស្រុកពាមជរ ខេត្តព្រៃវែង។
អាជ្ញាធរមូលដ្ឋានក្នុងតំបន់មួយនេះបានឱ្យដឹងថា កន្លែងកំសាន្តដីដុះនេះ មានដីខ្សាច់ដុះចេញពីក្នុងទន្លេចាប់ពីមាត់ច្រាំងរហូតដល់កណ្តាលទន្លេ និងលាតសន្ធឹងតាមបណ្តោយដងទន្លេចំងាយប្រមាណជាង២គីឡូម៉ែត្រ។
នៅលើឆ្នេរខ្សាច់ដែលលាតសន្ធឹងដ៏វែងតាមដងទន្លេមេគង្គ ក្រៅពីងូតទឹកកំសាន្ត ភ្ញៀវទេសចរអាចលេងកីឡា រាំលេងកំសាន្ត និងធ្វើពិធីជួបជុំផ្សេងៗ ជាមួយនឹងការទទួល
ទានចំណីអាហារ ដ៏មានឱជារសគ្រប់ប្រភេទដែលមានលក់នៅលើឆ្នេរខ្សាច់នេះ ជាពិសេសភ្ញៀវទេសចរអាចបើកយានជំនិះរបស់ខ្លួនចូលទៅដល់មាត់ទឹកដែលនៅកណ្តាលទន្លេតែម្តង។
ដោយសារកត្តាអំណោយផលពីធម្មជាតិបែបនេះ ទើបធ្វើឱ្យភ្ញៀវទេសចរទាំងជាតិ និងអន្តរជាតិ ចូលចិត្តនាំក្រុមគ្រួសារមកងូតទឹកលេងកំសាន្តនៅតំបន់ដីដុះនេះជាខ្លាំង ជា ពិសេសគឺនៅរដូវបុណ្យទាន ដូចជាថ្ងៃបុណ្យភ្ជុំ និងថ្ងៃចូលឆ្នាំជាដើម ជាក់ស្តែងនៅរយៈពេល៣ថ្ងៃនៃពិធីបុណ្យចូលឆ្នាំចិននេះ ភ្ញៀវទេសចរទាំងជាតិ និងអន្តរជាតិបាននាំគ្នាមកងូតទឹកលេងកំសាន្តនៅក្នុងតំបន់ដីដុះនេះ មានចំនួនរហូតដល់ទៅប្រមាណជា១ម៉ឺននាក់។
លោក សៅ ប្រសិទ្ធិ អភិបាលស្រុកពាមជរ បានឱ្យកោះសន្តិភាពដឹងថា បើទោះជាតំបន់ដីដុះនេះមានសក្តានុពលអំណោយផលពីធម្មជាតិបែបនេះក៏ដោយ ប៉ុន្តែវានៅមានចំណុចជាច្រើនទៀត ដែលត្រូវការរៀបចំបំពេញបន្ថែមជាចាំបាច់ ដូចជាបង្គន់អនាម័យ ធុងសំរាម សន្តិសុខការពារសុវត្ថិភាព និងសណ្តាប់ធ្នាប់ ជាពិសេសគឺទូកសង្គ្រោះ និងក្រុមអ្នកជួយសង្គ្រោះនៅពេលមានមនុស្សលង់ទឹកជាដើម។
លោក សៅ ប្រសិទ្ធិ បានបញ្ជាក់ថា អាជ្ញាធរស្រុកបានស្នើសុំទៅខេត្ត ដើម្បីសុំបង្កើតតំបន់ដីដុះនេះឱ្យទៅជារមណីយដ្ឋានដ៏ស្រស់ស្អាតមួយដែលមានគណៈកម្មការគ្រប់គ្រងជាសហគមន៍ ហើយផលប្រយោជន៍ទាំងអស់ទុកសំរាប់សហគមន៍ ចំណែកអាជ្ញាធរ និងសមត្ថកិច្ចមូលដ្ឋានគ្រាន់តែជាអ្នកជួយមើលការខុសត្រូវ និងដោះស្រាយនៅពេលមានបញ្ហាប៉ុណ្ណោះ ប៉ុន្តែមកដល់ពេលបច្ចុប្បន្ននេះ អាជ្ញាធរខេត្តមិនទាន់បានឆ្លើយតប ឬអនុម័តបែបណានៅឡើយទេ៕
ចែករំលែកព័តមាននេះ