រាជធានីភ្នំពេញ ៖ បន្ទាប់ពីបិទសង្វៀនអស់ជាច្រើនសប្ដាហ៍ ស្ថានីយទូរទស្សន៍ប៉ុស្តិ៍លេខ៥ បានប្រកាសដំណើរការការប្រកួតជ្រើសរើសជើងឯករបស់ខ្លួនវិញហើយ កាលពីថ្ងៃទី២៩ សីហា ឆ្នាំ២០២០ នៅព្រែកកំពិស។ អ្វីដែលគួរឱ្យកត់សម្គាល់…
រាជធានីភ្នំពេញ ៖ បន្ទាប់ពីបិទសង្វៀនអស់ជាច្រើនសប្ដាហ៍ ស្ថានីយទូរទស្សន៍ប៉ុស្តិ៍លេខ៥ បានប្រកាសដំណើរការការប្រកួតជ្រើសរើសជើងឯករបស់ខ្លួនវិញហើយ កាលពីថ្ងៃទី២៩ សីហា ឆ្នាំ២០២០ នៅព្រែកកំពិស។ អ្វីដែលគួរឱ្យកត់សម្គាល់ គឺការប្រកួតលើកនេះ ប៉ុស្តិ៍លេខ៥ មិនប្រើរូបមន្តយក៣២នាក់ ជម្រុះគ្នានោះទេ តែប្ដូរមកប្រកួត១៦នាក់ជម្រុះគ្នាវិញម្ដង។
លោក សេង កដិកា អ្នករៀបចំការប្រកួតបានអះអាងថា ស្ថាប័នប៉ុស្តិ៍លេខ៥ បានដំណើរការបើកប្រដាល់របស់ខ្លួនជាថ្មីឡើងវិញហើយ ដោយការប្រកួតលើកនេះ គឺនៅតែជាការប្រកួតជ្រើសរើសជើងឯកដូចមុនដដែល។
ការប្រកួតលើកនេះ មិនប្រើរូបមន្ត៣២នាក់ ជម្រុះយកតែម្នាក់ដូចមុននោះទេ គឺប្រើរូបមន្តជម្រុះក្នុងចំណោម១៦នាក់វិញម្ដង ដោយឱ្យអ្នកទាំង១៦ ប្រកួតគ្នាចាញ់ធ្លាក់ៗធម្មតា ដែលមានន័យថា កីឡាករទាំងអស់នឹងប្រកួតគ្នាតិចដងជាងមុន បើធៀបនឹងអ្នកកាន់ពានមុនៗ។
លោកថា ហេតុផលនៃការផ្លាស់ប្ដូររូបមន្តនេះ គឺដោយសារតែអំឡុងកូវីដ១៩ ពិបាកក្នុងការស្វែងរកកីឡាករដែលមានសមាសភាពប៉ិនគ្នាឱ្យចូលប្រកួតបានគ្រប់៣២រូបផង និងចង់ឱ្យការប្រកួតជ្រើសរើសជើងឯកលើកនេះ មានរូបមន្តថ្មីនេះ កុំឱ្យអ្នកគាំទ្រយល់ថា ដដែលផង។
ការប្រកួតលើកនេះ គឺជាតម្រូវការចង់បានរបស់ស្ពុនស័រ ដោយប៉ុស្តិ៍លេខ៥ នឹងដំណើរលែងផ្អាកទៀតហើយ បើទោះជាបញ្ហាកូវីដ១៩ នៅតែជាឧបសគ្គនៅឡើយ។ លោកថា ការប្រកួតជាថ្មីនេះ មានការរំពឹងថា នឹងទទួលបាននូវការចាប់អារម្មណ៍ ខណៈដែលស្ថានភាពកូវីដ១៩ ក៏ស្ងប់ស្ងាត់ផង។ នៅក្នុងកីឡាដែលបានបង្ហាញខ្លួន ក៏បានបញ្ចេញសមត្ថភាពធ្វើឱ្យអ្នកគាំទ្រពេញចិត្តយ៉ាងខ្លាំង។
ចែករំលែកព័តមាននេះ