ខេត្តតាកែវ ៖ ក្រុមចោរលួចម៉ូតូចំនួន៣នាក់ ត្រូវបានកម្លាំងនគរបាលស្រុកបាទីធ្វើការបង្ក្រាបបានជាបន្តបន្ទាប់ ខណៈពេលដែលក្រុមចោរទាំងនេះ តែងតែធ្វើសកម្មភាពលួចយកម៉ូតូ លួចកាច់កម៉ូតូរបស់ប្រជាពលរដ្ឋក្នុងភូមិសាស្ត្រខេត្តតាកែវ និងឆ្លងខេត្តផ្សេងទៀតយ៉ាងសកម្មផងនោះ។ ហេតុការណ៍បង្ក្រាបក្រុមចោរកើតឡើង នៅថ្ងៃទី២៨ សីហា វេលាម៉ោង៩និង១៥នាទី ក្នុងភូមិធ្លកឃុំត្រពាំងក្រសាំង ស្រុកបាទី ខេត្តតាកែវ ។
លោកវរសេនីយទោឆាយ កែវមុនី្ន អធិការនគរបាលស្រុកបាទីបានអោយដឹងថា ការបង្ក្រាបនេះ ដោយមានការណែនាំពីលោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ នឹងមានការសម្របសម្រួលពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ។
ហើយជនជនសង្ស័យដែលត្រូវបង្ក្រាបបានមានគ្នា៣នាក់រួមមាន៖ ទី១៖ ឈ្មោះចែម សារ៉េត ហៅប៉ាង ភេទប្រុស អាយុ៣៣ឆ្នាំ នៅភូមិព្រះ ឃុំចំបក់ ស្រុកបាទី ខេត្តតាកែវ, ទី២៖ ឈ្មោះ ត្រុក រិត ភេទប្រុស អាយុ៣២ឆ្នាំ នៅភូមិសង្កែ ឃុំត្រពាំង សាប ស្រុកបាទីខេត្តតាកែវ និងទី៣៖ ឈ្មោះ ឌុច សុខ ភេទប្រុស អាយុ ៤៧ឆ្នាំ នៅភូមិតាស៊ូ ឃុំត្រពាំងសាប ស្រុកបាទី ខេត្តតាកែវ។
លោកអធិការនគរបាលស្រុកបានបន្តទៀតថា ចំណែកវត្ថុតាងដកហូតរួមមាន ម៉ូតូចំនួន៦គ្រឿង ប្រដាប់កាច់ករម៉ូតូ និងគ្រឿងបន្លាស់ម៉ូតូមួយចំនួន។ កូនសោរកំផ្លេរមួយចំនួន ដាវសាំម៉ូរៃកែច្នៃចំនួន១ ថ្នាំញៀនចំនួន៤កញ្ចប់តូច ថង់ប្លាស្ទិចសំ រាប់វេចខ្ចប់គ្រឿងញៀនមួយចំនួន និងដែកកេះចំនួន៧ ។ ហើយជនរងគ្រោះទី១៖ ឈ្មោះ អៀន ឈ ភេទប្រុស អាយុ៦៤ឆ្នាំ នៅភូមិស្រីបណ្ឌិត ឃុំស្លា ស្រុកសំរោង ខេត្តតាកែវ និងទី២៖ ឈ្មោះ ពៅ សុគន្ធ ភេទប្រុស អាយុ ៣៨ឆ្នាំ នៅភូមិធ្លក ឃុំត្រពាំងក្រសាំង ស្រុកបាទី ខេត្តតាកែវ ។
លោកវរសេនីយ៍ទោ ឆាយ កែវមុន្នី អធិការនគរបាលស្រុកបាទី បានបញ្ជាក់ថា បន្ទាប់ពីទទួលបានព័ត៌មានពីប្រជាពលរដ្ឋ និងដោយយោងទៅលើពាក្យបណ្តឹងរបស់ជនរងគ្រោះ រូបលោក និងកម្លាំងអធិការស្រុកបាទី សហការជាមួយប៉ុស្តិ៍រដ្ឋបាល បានសុំគោលការណ៍ទៅលោកស្នងការនគរបាលខេត្តតាកែវ និងលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ ក្នុងការដឹកនាំសម្របសម្រួលចុះបង្ក្រាបបានធ្វើការឃាត់ខ្លួនជនសង្ស័យបានចំនួន៣នាក់ ម៉ូតូ៦គ្រឿង រួមនិងវត្ថុតាងមួយចំនួនថែមទៀត ។
លោកអធិការបន្ថែមទៀតថា ជនសង្ស័យទាំងអស់ខាងលើជាមុខសញ្ញាចោរលួចយ៉ាងសកម្ម និងបានធ្វើសកម្មភាពច្រើនលើកមកហើយ។
លោកវរសេនីយឯកយ៉ាង ញីវ នាយការិយាល័យព្រហ្មទណ្ទកំរិតស្រាលខេត្តបានអោយដឹងថា នៅពេលនេះជំនាញរបស់យើងកំពុងតែកសាងសំណុំរឿងដើម្បីបញ្ជូនជនសង្ស័យ រួមនឹងវត្ថុតាងទៅសាលាដំបូងខេត្តចាត់ការបន្តតាមច្បាប់៕
ចែករំលែកព័តមាននេះ