ខេត្តបន្ទាយមានជ័យ ៖ បុរសម្នាក់រងរបួសធ្ងន់ ក្នុងហេតុការណ៍ផ្ទុះអាវុធមួយ កាលពីយប់ថ្ងៃទី២៧ សីហា ២០២០នៅភូមិនិមិត្ត១ សង្កាត់និមិត្តក្រុងប៉ោយប៉ែត សមត្ថកិច្ចអះអាងថា ជាករណីក្មេងទំនើង ឯសាច់ញាតិជនរងគ្រោះបដិសេធន៍ថា ជារឿងមិនពិត ។
ជនរងគ្រោះឈ្មោះ នាង មករា ភេទប្រុស អាយុ២១ឆ្នាំ មានទីលំនៅក្នុងភូមិសង្កាត់កើតហេតុ ។ ជនរងគ្រោះរងរបួសខ្នងខាងឆ្វេងគ្រាប់បៀមក្រោមឃ្លៀកខាងស្តាំ និងជាគ្រាប់អាវុធខ្លី ។
ប្រភពថា សមត្ថកិច្ចដែលផ្ទុះអាវុធ គឺលោកអនុសេនីយ៍ទោឬទ្ធី ពិសិដ្ឋ នាយរងប៉ុស្តិ៍នគរបាលរដ្ឋបាលសង្កាត់និមិត្ត ។
ក្រោយសាកសួរតាមទូរស័ព្ទលោក ម៉ា រិន នាយប៉ុស្តិ៍រដ្ឋបាលនគរបាលសង្កាត់និមិត្តប្រាប់តាមទូរស័ព្ទថា ករណីផ្ទុះអាវុធរបួសបុរសម្នាក់ពិតជាកើតមានមែន កាលពីយប់ថ្ងៃ២៧ សីហា ប៉ុន្តែលោកថា ជាករណីក្មេងទំនើង ព្រោះសមត្ថកិច្ចចុះល្បាតម្នាក់ឯង ។ពេលសាកសួរថា តើករណីហ្នឹងមានដំណោះស្រាយយ៉ាងណាហើយ លោកនាយប៉ុស្តិ៍ថាមិនដឹងច្បាស់ទេ ព្រោះថ្នាក់ដឹកនាំយកទៅលើហើយ ។
ដោយឈ្មោះ នួន វ័រ អាយុ៤៩ឆ្នាំ ជាប្រជាការពារភូមិ និងជាឪពុកជនរងគ្រោះប្រាប់តាមទូរស័ព្ទរសៀលនេះថា កូនគាត់ត្រូវគេបាញ់ដោយអាវុធខ្លីរបួស១គ្រាប់ ពីក្រោយខ្នងផ្នែកខាងស្តាំបញ្ឆិតខាងឆ្វេងបៀមគ្រាប់ក្រោមឃ្លៀកខាងស្តាំ តែពេលនេះគ្រូពេទ្យធ្វើការវះកាត់យកក្បាលគ្រាប់ចេញរួចហើយ ។
យោងតាមការសាកសួរកូនប្រាប់គាត់ថា មុនកើតហេតុកូនគាត់បានទៅលេងផ្ទះមិត្តភក្តិដូចសព្វមួយដង លុះឃើញមិត្តភក្តិម្នាក់ជិះម៉ូតូទៅមុនគេក៏ជិះម៉ូតូទៅតាម ក្រោយលុះមានសមត្ថកិច្ចម្នាក់កាក់ម៉ូតូ សួរនាំមិត្តភក្តិកូនគាត់ ក៏បើកត្រឡប់មកវិញ ហើយសួរសមត្ថកិច្ចថាមានរឿងអីបង?សមត្ថកិច្ចម្នាក់នោះឆ្លើយថា មិនមានរឿងអ្វីទេ ។ កូនគាត់ក៏ឈប់ និងអង្គុយលើម៉ូតូ ស្រាប់តែសមត្ថកិច្ចខាងលើនិយាយថា ហែងខ្លាំងអី,អាងអី?ចុះពីលើម៉ូតូមើល៍!!កូនគាត់ក៏តបវិញថា ឲ្យខ្ញុំចុះធ្វើអីទៅផ្ទះហើយៗ ពេលបើកម៉ូតូចេញស្រាប់តែសមត្ថកិច្ចរូបនេះបាញ់ពីក្រោយ បណ្តាលឲ្យរបួសតែម្តង ។
ឪពុកជនរងគ្រោះនិយាយថា កាលពីម្សិលមិញ២៨ ខែសីហានេះ បានទៅដាក់ពាក្យបណ្តឹងនៅប៉ុស្តិ៍រដ្ឋបាលសង្កាត់និមិត្ត ដើម្បីទាមទាររកយុត្តិធម៌ហើយ តែលទ្ធផលយ៉ាងណាមិនទាន់ដឹងទេ ខណៈកូនគាត់រងរបួសធ្ងន់សម្រាកនៅមន្ទីរពេទ្យបង្អែកមង្គលបូរីនៅឡើយ ។ ជំវិញករណីផ្ទុះអាវុធរងរបួសមនុស្សនេះកោះសន្តិភាពមិនអាចទាក់ទងសុំកាបំភ្លឺពីលោកអនុសេនីយ៍ទោឬទ្ធី ពិសិដ្ឋ ដែលកំពុងរងការចោទប្រកាន់បានទេ ព្រោះមិនស្គាល់លេខទូរស័ព្ទ ៕
ចែករំលែកព័តមាននេះ