ខេត្តព្រះសីហនុ ៖ ប្រធានមន្ទីរទេសចរណ៍ខេត្ត លោក នូ សុផល បានមានប្រសាសន៍ឱ្យដឹងថា ក្នុងរយៈពេល៣ថ្ងៃនៃពិធីបុណ្យចូលឆ្នាំចិន-វៀតណាម ចាប់ពីថ្ងៃទី១៨ ដល់ថ្ងៃទី២០ កុម្ភៈ នៅតាមតំបន់រមណីយដ្ឋាន
ខេត្តព្រះសីហនុ ៖ ប្រធានមន្ទីរទេសចរណ៍ខេត្ត លោក នូ សុផល បានមានប្រសាសន៍ឱ្យដឹងថា ក្នុងរយៈពេល៣ថ្ងៃនៃពិធីបុណ្យចូលឆ្នាំចិន-វៀតណាម ចាប់ពីថ្ងៃទី១៨ ដល់ថ្ងៃទី២០ កុម្ភៈ នៅតាមតំបន់រមណីយដ្ឋាន ភោជនីយដ្ឋាន និងកន្លែងកម្សាន្តនានានៅក្នុងខេត្ត ទទួលបានភ្ញៀវទេសចរជាតិ-អន្តរជាតិ មានចំនួន៦២.៩៧៦នាក់ ដែលតួលេខនេះអាចបញ្ជាក់ឱ្យឃើញថា ចំនួនភ្ញៀវទេសចរជាតិ-អន្តរជាតិ មានការកើនឡើងជាងពិធីបុណ្យចូលឆ្នាំចិន-វៀតណាម កាលពីឆ្នាំ២០១៤កន្លងមក បើគិតជាភាគរយ ចំនួនភ្ញៀវទេសចរកើនឡើង រហូតដល់២៧,២២% បើប្រៀបធៀបក្នុងរយៈពេលដូចគ្នា ។ ក្នុងឆ្នាំ២០១៤ ភ្ញៀវទេសចរជាតិ មានចំនួន៥៦.០៦០នាក់ បើប្រៀបធៀបទៅនឹងឆ្នាំ២០១៥ មានការកើនឡើង២៩,៤២% ក្នុងនោះ ភ្ញៀវទេសចរអន្តរជាតិ មានចំនួន៩១៦នាក់ មានការកើនឡើង១១,៧៦% ។
លោក នូ សុផល បានបញ្ជាក់ថា ភ្ញៀវទេសចរនៅតែបន្តធ្វើដំណើរចូលមកកម្សាន្តនៅខេត្តព្រះសីហនុជាបន្តបន្ទាប់ ដោយហេតុថា រដូវនេះជារដូវក្តៅ និងចំពេលចុងសប្តាហ៍ ហើយក៏ជួនពេលដែលបុណ្យចូលឆ្នាំចិន-វៀតណាម ឈានចូលមកដល់ផងដែរ ។ ឱកាសល្អបែបនេះ បង្កលក្ខណៈឱ្យភ្ញៀវទេសចរជាតិ-អន្តរជាតិ បានធ្វើដំណើរជាលក្ខណៈគ្រួសារ មកមុជទឹកសមុទ្រ ឬលេងកម្សាន្តតាមឆ្នេរសមុទ្រ និងនៅតាមតំបន់រមណីយដ្ឋានបែបធម្មជាតិនៅក្នុងខេត្តព្រះសីហនុ ជាពិសេសគឺបានទទួលទាននូវអាហារសមុទ្រស្រស់ៗដែលមានឱជារសឆ្ងាញ់ និងមានតម្លៃសមរម្យ ។
លោកប្រធានមន្ទីរ បានបន្តទៀតថា ការកើនឡើងនេះ គឺដោយសារខេត្តព្រះសីហនុ ជាខេត្តទេសចរណ៍ តភ្ជាប់គ្នាជាមួយខេត្តកំពត និងខេត្តកែប ខណៈភ្ញៀវទេសចរមកសម្រាកលំហែនៅខេត្តព្រះសីហនុរួច ពួកគេបន្តដំណើរទៅកំសាន្តនៅឆ្នេរកែប រួចបន្តដំណើរទៅទស្សនាទស្សនីយភាពធម្មជាតិប្លែកៗ នៅលើរមណីយដ្ឋានភ្នំបូកគោ ក្នុងខេត្តកំពត មុននឹងចាកចេញទៅកាន់លំនៅឋានរៀងៗខ្លួនវិញ ។
លោក នូ សុផល បានបញ្ជាក់ជាចុងក្រោយថា ខេត្តព្រះសីហនុ ជាខេត្តដែលមានតំបន់ទេសចរណ៍ធម្មជាតិ មានឆ្នេរខ្សាច់ដ៏សក្បុស ពីធម្មជាតិ មានតំបន់ទឹកធ្លាក់ក្បាលឆាយ តំបន់រមណីយដ្ឋានទឹកធ្លាក់ថ្មរូង នៅក្នុងស្រុកកំពង់សិលា ។ ហើយអ្វីដែលប្រសើរជាងនេះទៅទៀត នោះនៅក្នុងលំហសមុទ្រ ខេត្តព្រះសីហនុ សម្បូរទៅដោយប្រជុំកោះ ដូចជាកោះសង្សារ កោះតូច នៅក្នុងសង្កាត់កោះរ៉ុង កោះរ៉ុងសន្លឹម និង មានភូមិជាច្រើនទៀតនៅលើកោះ ដែលកំពុងត្រូវបានអភិវឌ្ឍកែលម្អជារមណីយដ្ឋានទេសចរណ៍ ហើយបច្ចុប្បន្នភ្ញៀវទេសចរជាតិ-អន្តរជាតិ បានទៅកម្សាន្តលើកោះខាងលើយ៉ាងកុះករ ។ ម្យ៉ាងវិញទៀត សេវាដឹកជញ្ជូនទៅកាន់ដែនកោះ ប្រកបដោយសុវត្ថិភាព និងមានភាពងាយស្រួលដោយប្រើពេលវេលាតែ៤០-៥០នាទីប៉ុណ្ណោះ ដោយប្រើប្រាស់អូប័រខ្នាតធំ និងមានល្បឿនលឿន ដែលជាការផ្តល់នូវទំនុកចិត្តដល់ភ្ញៀវទេសចរជាតិ-អន្តរជាតិ ៕
ចែករំលែកព័តមាននេះ