លោកមហាម៉េដ លីកបល ជាគ្រូបង្រៀននៅសាលាមួយក្នុងប្រទេសប៉ាគីស្ថាន បានប្រដាប់អាវុធទៅបង្រៀនរាល់ថ្ងៃ ដើម្បីការពារខ្លួន បន្ទាប់ពីនៅខែធ្នូ ឆ្នាំ២០១៤ មានជនល្មើសប្រដាប់អាវុធដែលជាសមាជិក
លោកមហាម៉េដ លីកបល ជាគ្រូបង្រៀននៅសាលាមួយក្នុងប្រទេសប៉ាគីស្ថាន បានប្រដាប់អាវុធទៅបង្រៀនរាល់ថ្ងៃ ដើម្បីការពារខ្លួន បន្ទាប់ពីនៅខែធ្នូ ឆ្នាំ២០១៤ មានជនល្មើសប្រដាប់អាវុធដែលជាសមាជិករបស់ក្រុមតាលីបង់ ចូលបាញ់រះក្នុងសាលារៀនមួយនៅក្រុងប៉េចាវ៉ា នៅភាគខាងលិចឆៀងខាងជើងប្រទេស បង្កឱ្យមានអ្នកស្លាប់យ៉ាងតិច១៥០នាក់ ភាគច្រើនជាសិស្ស ។
រដ្ឋាភិបាលប៉ាគីស្ថានទើបតែអនុញ្ញាតឱ្យគ្រូបង្រៀនយកអាវុធការពារខ្លួន លើសពីនេះប្រសិនបើកកើតហេតុការណ៍អាសន្ន គ្រូទាំងនោះអាចរួមសហការជាមួយប៉ូលិសតស៊ូជាមួយសត្រូវ។
លោកមហាម៉េដ លីកបល បញ្ជាក់ថា «អ្វីដែលគ្រូបង្រៀនគ្រប់រូបត្រូវការ គឺការផ្ទេរចំណេះដឹងដល់កុមារ មិនមែនបង្ហាត់បង្រៀនពីការប្រើអាវុធ ប៉ុន្តែស្ថានការណ៍បានតម្រូវឱ្យប្រតិបត្តិបែបនេះ គឺដើម្បីសុវត្ថិភាពរបស់ពួកយើងគ្រប់រូប ។ មានន័យថា ប៉ូលិសមិនអាចការពារសាលារៀននៅក្នុងប្រទេសដែលមានច្រើនជាង១០.០០០កន្លែងបានទេ ម្យ៉ាងទៀតសាលារៀនរបស់រដ្ឋាភិបាលគ្មានប្រាក់សម្រាប់ជួលកងសន្តិសុខការពារសុវត្ថិភាពទេ ខុសពីសាលារៀនឯកជនទូទៅនៅក្នុងប្រទេស» ។
ក្រោយពេលកើតហេតុចលាចលនាពេលកន្លងមក រដ្ឋាភិបាលបង្កើតប្រព័ន្ធការពារសន្តិសុខនានាដូចជា ដាក់របងលួសបន្លាបិទនៅខាងមុខខ្លោងទ្វារចូលសាលា និងបង្កើតកងសន្តិសុខផងដែរ ។
លោកម៉ារិក ការីដខាន ប្រធានសមាគមគ្រូបង្រៀន បាននិយាយថា «តួនាទីរបស់យើងគឺការបង្ហាត់់បង្រៀន និងផ្តល់ចំណេះដឹងដល់សិស្ស មិនមែនកាន់អាវុធដើរការពារទៅមកទេ ព្រោះយើងមិនបានទទួលការហ្វឹកហាត់ការពារសុវត្ថិភាព»៕
ចែករំលែកព័តមាននេះ