សារព័ត៌មាន «អានហ៊ុយ ដេលី» របស់ចិន កាលពីថ្ងៃទី៦ កុម្ភៈ ២០១៥ផ្សាយថា ប៉ូលិសស្រុកអ៊ូវ៉ើយ ខេត្តអានហ៊ុយ ប្រទេសចិនបានទទួលបណ្តឹងតាមរយៈទូរស័ព្ទទាក់ទិនរឿងវាយតប់គ្នានៅក្នុងហាងស្ប៉ាមួយ ។ ពេលប៉ូលិសទៅដល់កន្លែងកើតហេតុបានឃើញគូទំនាស់ជាម្តាយ និងកូនស្រីស្ថិតក្នុងសភាពដាច់រហែកសម្លៀកបំពាក់ និងមានរបួសដោយក្រចក ។
ប៉ូលិសបានឃាត់គូទំនាស់ទាំង២ ហើយសាកសួររកមូលហេតុនៃការទាស់ទែងគ្នា ប៉ុន្តែពួកគេព្យាយាមលាក់បាំង ។ ទោះជាយ៉ាងណាក្តី ម្ចាស់ហាងស្ប៉ាបានលាតត្រដាងពីការណ៍ពិតឱ្យដឹងថា ស្ត្រីជាម្តាយ និងកូនស្រីនោះវាយតប់គ្នាដោយសារស្រឡាញ់ប្រុសតែម្នាក់តាមប្រព័ន្ធអីុនធើរណេត ។ ចៃដន្យអ្នកទាំង៣ជួបគ្នានៅហាងស្ប៉ា ហើយក៏ធ្លាយអាថ៌កំបាំងម្តាយ និងកូនស្រីស្រឡាញ់ប្រុសតែមួយ ។
ប៉ូលិសបានចំណាយពេលប្រហែល១ម៉ោងធ្វើជាអាជ្ញាកណ្តាលសម្របសម្រួលនិងហាមម្តាយ និងកូនមិនឱ្យទាស់់ទែងគ្នារឿងស្រឡាញ់ប្រុសតែមួយទៀត ៕
ចែករំលែកព័តមាននេះ