រាជធានីភ្នំពេញ ៖ កន្លងមក ឪពុកម្តាយ ១៥គ្រួសារ បានដាក់ពាក្យបណ្តឹងលើម្ចាស់ផលិតម្សៅទឹកដោះគោម៉ាក Nutrilatt ទៅកាន់ក្រសួងសុខាភិបាល និងក្រសួងពាណិជ្ជកម្ម ដោយសារតែកូនរបស់ពួកគាត់ មានអាការស្លេកស្លាំង ធ្លាក់ខ្លួនឈឺ ក្រោយប្រើប្រាស់ផលិតផលនេះ ។ ឆ្លើយតបទៅនឹងពាក្យបណ្តឹង អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម(ក.ប.ប) បានយកសំណាកទឹកដោះគោទៅមន្ទីរពិសោធន៍ឯករាជ្យមួយនៅប្រទេសសិង្ហបុរី ហើយលទ្ធផលបង្ហាញថា ម្សៅទឹកដោះគោ ពិតជាមានសារធាតុដែកទាប ដែលគ្រោះថ្នាក់ខ្លាំងដល់សុខភាពទារក នេះបើយោងតាមផេកហ្វេសបុកផ្លូវការរបស់ ក.ប.ប ។
លទ្ធផលខាងលើនេះ ត្រូវបានបើកបង្ហាញនៅចំពោះមុខតំណាងក្រសួងសុខាភិបាល តំណាងអង្គការសុខភាពពិភពលោក តំណាងអង្គការយូនីសែហ្វ តំណាងអង្គការហេឡែនឃីលឺ តំណាងក្រុមហ៊ុនម្សៅទឹកដោះគោនុតទ្រីលែត និងតំណាងមាតាបិតាទារករងគ្រោះ ។
សេចក្ដីប្រកាសព័ត៌មាន អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម ក.ប.ប ចេញផ្សាយនៅយប់ថ្ងៃទី២៦ ខែសីហា បានអោយដឹងថា ផ្អែកតាមលទ្ធផលវិភាគ បង្ហាញថា បរិមាណជាតិដែក និងជាតិស័ង្កសីជាក់ស្ដែងដែលមាននៅក្នុងសំណាកផលិតផលម្សៅទឹកដោះគោនុតទ្រីលែតស៍ (ដែលមានលេខកូដ ៤៨៧, ៤៨៨, ៥៣៦, ៥៣៧, ៥៣៨ និង ៥៣៩) មានកម្រិតទាបជាងឆ្ងាយយ៉ាងខ្លាំងពីបរិមាណដែលបានបញ្ជាក់លើស្លាកផលិតផល ពោល គឺកម្រិតជាតិដែកមានចំនួន២០ដងតិចជាងចំនួនជាតិដែក ដែលបានបញ្ជាក់លើស្លាកផលិតផល ។ ចំណែកឯជាតិស័ង្កសីវិញមានចំនួនតែជាងពាក់កណ្ដាលប៉ុណ្ណោះទៅនឹងអ្វីដែលបានបញ្ជាក់លើស្លាកសញ្ញា ។
អគ្គនាយកដ្ឋាន ក.ប.ប បានលើកឡើងក្នុងរបាយការណ៍ជាង៤០ទំព័រ ថា «ផលិតផលនេះស្ទើរតែគ្មានជាតិដែកសោះ ពោលគឺកម្រិតជាតិដែកមានត្រឹមតែ០,២៥មីលីក្រាម/១០០ក្រោមប៉ុណ្ណោះ បើប្រៀបធៀបទៅនឹងតម្រូវការយ៉ាងតិចគឺ២.២៨៦មីលីក្រាម/១០០ក្រាម។ ផលិតផលត្រូវតែផលិតតាមស្តង់ដាសុវត្ថិភាពយ៉ាងតឹងរ៉ឹង និងមានសមាសភាពផ្សំជាក់លាក់ ។ ហើយក្នុងនោះបានកំណត់ពីតម្រូវការអប្បបរមាសម្រាប់ជាតិដែកនៅក្នុងទឹកដោះគោម្សៅផ្សំតាមរូបមត្តសម្រាប់ទារក គឺមានបរិមាណចំនួន០.៤៥មីលីក្រាម/១០០គីឡូកាឡូរី។ កម្រិតជាតិស័ង្កសីអប្បបរមាដែលអាចអនុញ្ញាបានគឺមានបរិមាណ០.៥ មីលីក្រាម/១០០គីឡូកាឡូរី»។ នេះបើតាមសេចក្តីប្រកាសព័ត៌មានរបស់ក.ប.ប.នៃក្រសួងពាណិជ្ជកម្ម» ។
ទាក់ទងនឹងលទ្ធផលពិសោធន៍ដែលចេញដោយមន្ទីរពិសោធន៍ឯករាជ្យនៅសិង្ហបុរីនោះ ក្រុមហ៊ុនម្សៅទឹកដោះគោ Nutrilatt បានចេញលិខិតបដិសេធ ចំពោះលទ្ធផលរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ដោយក្រុមហ៊ុន ហៅលទ្ធផលនេះថា ជាលទ្ធផលឯកតោភាគី ។
ក្នុងលិខិតបដិសេធរបស់ក្រុមហ៊ុនម្សៅទឹកដោះគោនេះ បានសរសេរដូច្នេះថា «ក្រុមហ៊ុនបានសង្កេតឃើញពីភាពប្រក្រតីជាច្រើននៅក្នុងការប្រកាសរបស់ក.ប.ប.នៃក្រសួងពាណិជ្ជកម្ម ដែលលទ្ធផលនេះមានភាពខុសគ្នាយ៉ាងខ្លាំង ពីលទ្ធផលដែលក្រុមហ៊ុនទទួលបានពីមន្ទីរពិសោធន៍ BVAQ និងមន្ទីរពិសោធន៍ ALS នៃប្រទេសសឹង្ហបុរី ដែលមានលេខកូដ៥៣៧,៥៦២,៥៦៣ និង៥៦៨ ដែលអគ្គនាយកដ្ឋានក.ប.ប. តែងតែយកទៅធ្វើពិសោធ និងទទួលស្គាល់ជាផ្លូវការ» ។
ជាការឆ្លើយតប បកទៅក្រុមហ៊ុនវិញ អគ្គនាយកដ្ឋាន ក.ប.ប បញ្ជាក់ថា ស្ថាប័នរដ្ឋមួយនេះ មិនមែនធ្វើការប្រកាសលទ្ធផលខាងលើ ជាលក្ខណៈឯកតោភាគី ដូចក្រុមហ៊ុនបានប្រកាសឡើយ ។
លោក ផាន អូន អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានបញ្ជាក់ថា ក.ប.ប.នឹងប្រមូលផលិតផលម្សៅនេះពីទីផ្សារ និងអ្នកប្រើប្រាស់វិញ ប៉ុន្តែត្រូវរង់ចាំការសម្រេចរបស់រដ្ឋមន្ត្រីក្រសួងពាណិជ្ជកម្មជាមុនសិន ។ យ៉ាងណា ក.ប.ប. នៃក្រសួងពាណិជ្ជកម្ម ប្រកាសទុកពេល១សប្ដាហ៍ ដើម្បីឱ្យក្រុមហ៊ុននុតទ្រីលែត Nutrilatt ឆ្លើយតប និងដោះស្រាយចំពោះឪពុកម្ដាយកុមារ និងទារក ដែលរងគ្រោះ នៅថ្ងៃទី៣ ខែកញ្ញា ឆ្នាំ២០២០ ខាងមុខនេះ ៕
ចែករំលែកព័តមាននេះ