រាជធានីភ្នំពេញ ៖ រថយន្តដឹកឈើម៉ាកកាមរីពណ៌ខ្មៅ ពាក់ស្លាកលេខច.៥២១៥ ភព២ មួយគ្រឿង បានបើករត់គេចពីការប្រដេញចាប់របស់សមត្ថកិច្ច ទៅបុករថយន្តស្ទូចរបស់ការិយាល័យនគរបាលចរាចរផ្លូវគោកនៃស្នង
ការដ្ឋាននគរបាលរាជធានីភ្នំពេញក្នុងទិសដៅបញ្ច្រាសគ្នា បណ្តាលឱ្យអ្នកបើកបររថយន្តដឹកឈើកៀបស្លាប់នៅក្នុងរថយន្ត ។ នៅក្នុងហេតុការណ៍នេះដែរ បណ្តាលឱ្យមន្ត្រីប៉ូលិសម្នាក់ដែលបើករថយន្តស្ទូច ឈ្មោះឈឹម វ៉ាន់ថា ភេទប្រុស អាយុ៤០ឆ្នាំ ឋានន្តរស័ក្តិអនុសេនីយ៍ត្រីបានរងរបួសធ្ងន់ផងដែរ ។
គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង១០យប់ ថ្ងៃទី២០ មីនា នៅតាមផ្លូវលេខ៥៩៨មុខស្នងការដ្ឋាននគរបាលរាជធានីភ្នំពេញ ក្នុងសង្កាត់ច្រាំងចំរេះទី២ ខណ្ឌប្ញស្សីកែវ ។ អ្នកបើកបររថយន្តដឹកឈើដែលស្លាប់ត្រូវសមត្ថកិច្ចឱ្យដឹងថា ឈ្មោះភួង សុខគា ភេទ ប្រុស អាយុ២៣ឆ្នាំ មានទីលំនៅភូមិទី៤ ឃុំកំពង់ហ្លួង ស្រុកក្រគរ ខេត្តពោធិ៍សាត់ ។ តាមសាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុរថយន្តម៉ាកកាមរីដឹកឈើគ្រញូងខាងលើ បើកបរតាមផ្លូវលេខ៥៩៨ ក្នុងទិសដៅពីជើងមកត្បូងចូលរាជធានីភ្នំពេញក្នុងល្បឿនលឿន ដែលនៅពីក្រោយមានរថយន្តរបស់សមត្ថកិច្ចបានប្រដេញ តែមិនដឹងថា សមត្ថកិច្ចខាងណាទេ។ នៅពេលធ្វើដំណើរមកដល់ចំណុចស្នងការដ្ឋានក៏បានបុករថយន្តស្ទូចម៉ាកហ៊ីយ៉ាន់ដាយ ពាក់ស្លាកលេខនគរបាល2.0252 របស់ការិយាល័យនគរបាលចរាចរផ្លូវគោករាជធានីភ្នំពេញដែលបើកបរក្នុងទិសដៅបញ្ច្រាសកំពុងបត់ចូលការិយាល័យពេញទំហឹង បណ្តាលឱ្យរថយន្តដឹកឈើក្រពឹតផ្នែកខាងមុខកៀបអ្នកបើកបរស្លាប់ជាប់ក្នុងរថយន្ត ។
តាមសាក្សីបន្តទៀតថា ការកើតមានគ្រោះថ្នាក់ធ្ងន់ធ្ងរនេះដោយសារតែរថយន្តដឹកឈើបើកបរក្នុងល្បឿនលឿនគេចពីការតាមប្រមាញ់ ហើយបានបុករថយន្តសមត្ថកិច្ចដែលធ្វើដំណើរមកពីបំពេញការងារ ពេលបត់ចូលទៅកាន់ការិយាល័យ ។ តាមព័ត៌មានឱ្យដឹងទៀតថា រថយន្តទាំងពីរគ្រឿងបានរងការខូចខាតយ៉ាងធ្ងន់ធ្ងរខ្ទេចមុខដូចគ្នា ។ មុនពេលបុករថយន្តដឹកឈើបានជាន់ហ្វ្រាំងអូសចម្ងាយ៣៥ម៉ែត្រ ។ រថយន្តទាំងពីរត្រូវសមត្ថកិច្ចស្ទូចយកទៅកាន់ការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ ។ ចំណែកសពត្រូវក្រុមគ្រួសារបញ្ជូនទៅធ្វើបុណ្យនៅស្រុកកំណើត ៕
ចែករំលែកព័តមាននេះ