ខេត្តបាត់ដំបង ៖ ប្រតិភូកងទ័ពប្រជាជនវៀតណាមក្នុងភូមិភាគទី៩ជាង១០នាក់ ទៅសួរសុខទុក្ខកងទ័ពកម្ពុជានៅទីបញ្ជាការយោធភូមិភាគទី៥ក្នុងខេត្ដបាត់ដំបងកាលពីវេលាល្ងាចថ្ងៃទី២៩ មីនា ដោយមានការដឹកនាំពីលោកឧត្ដមសេនីយ៍ឯកប្រាក់ សុវណ្ណ មេបញ្ជាការរងកងទ័ពជើងគោក និងទទួលស្វាគមន៍ពីលោកឧត្ដមសេនីយ៍ទោប៊ុន សេង មេបញ្ជាការយោធភូមិភាគទី៥ ឯភាគីវៀតណាមដឹកនាំដោយលោកឧត្ដមសេនីយ៍ទោត្រឹន ភីហូ មេបញ្ជាការកងទ័ពភូមិភាគទី៩ ដែលមានមេបញ្ជាការខេត្ដហូវយ៉ាង និងខេត្ដគៀងយ៉ាងចូលរួមផងដែរ។
លោកឧត្ដមសេនីយ៍ទោប៊ុន សេង បានលើកឡើងអំពីសភាពការណ៍ទូទៅដែលពួកសៀមឈ្លានពាន បាញ់ផ្លោងនៅតំបន់ប្រាសាទព្រះវិហារបណ្ដាលឱ្យខូចខាតប្រាសាទជាសម្បត្តិ បេតិកភណ្ឌពិភពលោក ។ រឿងរ៉ាវដ៏ធ្ងន់ធ្ងរនោះ គឺភាគីថៃគ្មានសុច្ឆន្ទៈក្នុងការចូលរួមដោះស្រាយដោយពហុភាគីនៅតែទាមទារដោះស្រាយទ្វេភាគី ហើយប្រើល្បិចគ្រប់បែបយ៉ាងដើម្បីពន្យារពេលមិនឱ្យដោះស្រាយចេញដោយមានគំនិតឈ្លានពានដដែល តែកងទ័ពកម្ពុជាត្រៀមជានិច្ចក្នុងការវាយបកវិញមិនឱ្យទ័ពសៀមឈ្លានពានបានឡើយ។
លោកបន្ដទៀតថា ពេលក្រោយៗមកទៀតគំនិតឈ្លានពានបានឆ្លៀតប្រើល្បិចដូចនៅតំបន់ប្រាសាទព្រះវិហារ គឺប្រើមនុស្ស៧នាក់ឱ្យចូលមកភូមិជោគជ័យ ឃុំអូរបីជាន់ស្រុកអូរជ្រៅខេត្ដបន្ទាយមានជ័យតែត្រូវសមត្ថកិច្ចនិងកងទ័ពកម្ពុជាចាប់ខ្លួន ហើយអនុវត្ដតាមច្បាប់កម្ពុជាដោយប្រើយុទ្ឋសាស្ដ្រដោះស្រាយផង ទប់ស្កាត់ផងដែលមានប្រជាជនជួយរាយការណ៍គាំទ្រពីក្រោយដល់កម្លាំងប្រដាប់អាវុធក្នុងបុព្វហេតុការពារប្រទេសជាតិ ។ លោកបន្ដទៀតថា យើងដឹងគុណជានិច្ចដល់កងទ័ពប្រជាជនវៀតណាមដែលបានជួយកម្ពុជាកន្លងមក ។ ដោយឡែកកងទ័ពភូមិភាគ៩ និងខេត្ដហូវយ៉ាង និងគៀងយ៉ាងបន្ដជួយកងទ័ពយោធភូមិភាគទី៥កម្ពុជាតាំងពីឆ្នាំ២០០៧ មកមានអគារស្នាក់នៅ, អគារមន្ទីរពេទ្យ, ប្រព័ន្ធផ្លូវក្រៅ-ក្នុងទីតាំងកងទ័ព, បណ្ដុះបណ្ដាលកងទ័ព,បំប៉នបច្ចេកទេសយោធា និងជួសជុលអាវុធដើម្បីពង្រឹងឱ្យកងទ័ពកម្ពុជាមានគុណភាពបន្ដរហូតមកដល់ពេលនេះ ។
លោកបន្ថែមទៀតថា កន្លងមកយោធភូមិភាគទី៥កម្ពុជាបានរួមសហការជាមួយកងទ័ពវៀតណាមក្នុងការរុករកអដ្ឋិធាតុកងទ័ពវៀតណាមដែលពលីជីវិតនៅខេត្ដបាត់ដំបង ខេត្ដពោធិ៍សាត់ ខេត្ដបន្ទាយមានជ័យ និងខេត្ដប៉ៃលិន ក្នុងបុព្វហេតុជួយប្រទេសកម្ពុជាពេលមានអាសន្នដែលគិតមកដល់ឆ្នាំ២០១០រុករកឃើញអដ្ឋិធាតុកងទ័ពវៀតណាមចំនួន២៧៩រូប។ ឆ្លើយតបវិញលោកឧត្ដមសេនីយ៍ទោត្រឹន ភីហូ ថ្លែងថា យើងកំពុងតែអនុវត្ដតាមកិច្ចសហការព្រមព្រៀងរួមគ្នាតាមអនុស្សរណៈយោគយល់គ្នាដែលបានចុះហត្ថលេខាដោយក្រសួងការពារជាតិកាលពីឆ្នាំ២០១០ ។ ពេលនេះ ក្នុងកម្មវិធីចុះសួរសុខទុក្ខ លោកសុំទទួលស្គាល់សភាពការណ៍រួមរវាងកម្ពុជា-សៀមដែលកើតមានពេលថ្មីៗនេះ ។ នៅដើមឆ្នាំ២០១១នេះ ខាងប្រទេសវៀតណាមសង្កេតឃើញសមយុទ្ធផ្នែកយោធានៅលើផ្ទៃទឹកសមុទ្ររបស់ថៃដែលមានអាមេរិកចូលរួមផងនោះគឺជាការបង្អួតបង្ហាញផ្នែកគ្រឿងសព្វាវុធរបស់អាមេរិក ហើយអាមេរិកក៏មិនទាន់បោះបង់ចោលនូវគំនិតចាស់ពីមុនមកដែរដោយឃោសនា និងមានពួកអមិត្ដជួយបន្ទរថា ប្រទេសវៀតណាមគ្មានគោរពច្បាប់សិទ្ធិមនុស្សឱ្យបានត្រឹមត្រូវអ្វីឡើយ រួមទាំងកម្ពុជា និងឡាវផងដែរ ។ នេះសុទ្ធតែជាប្រទេសដែលធ្លាប់រងគ្រោះដោយសារអាមេរិកពីមុនមកដែលមានគំនិតញុះញង់ចង់ឱ្យកើតសង្គ្រាម ។
លោកបន្ដទៀតថា អាមេរិកកំពុងតែរកវិធីទប់ស្កាត់រាល់សមយុទ្ធរបស់ចិននៅសមុទ្រខាងត្បូង និងប៉ែកឥណ្ឌូចិននេះ ហើយចំណែកយើងដែលរស់នៅរួមគ្នានេះ គឺដឹងសុខទុក្ខជាមួយគ្នាព្រោះកន្លងមកយើងតែងតែសហការរួមគ្នាទាំងប្រជាជនទូទៅនិងតាមបណ្ដោយទន្លេមេគង្គមានឡាវ កម្ពុជា និងវៀតណាម ។ ដោយឡែកកម្ពុជា វៀតណាមយើងបានរួមគ្នាទប់ស្កាត់រាល់បទល្មើសដែលខុសច្បាប់ទាំងដែនទឹក និងគោកបានល្អតាមខ្សែបន្ទាត់ព្រំដែន ។ ចំពោះដែនសមុទ្រ និងដែនកោះ កន្លងមកមានប្រជាជនវៀតណាមចូលមកនេសាទជ្រៅហួសព្រំដែនត្រូវកងទ័ពកម្ពុជាចាប់បញ្ជូនទៅវិញ១៩ករណី។ អាជ្ញាធរវៀតណាមអប់រំជាប្រចាំនៅតែមានបទល្មើសដដែល ពីព្រោះតែនៅដែនទឹកខាងកម្ពុជាសំបូរត្រីជាងនៅខាងវៀតណាម ហើយប្រជានេសាទមិនគិតអំពីរឿងខុសច្បាប់ ឬហួសខ្សែបន្ទាត់ព្រំដែនឡើយ គឺគិតតែពីការនេសាទ។ រឿងនេះ ខាងវៀតណាមកំពុងអប់រំបន្ដកុំឱ្យមានទៅថ្ងៃក្រោយទៀត។ កងទ័ពប្រជាជនវៀតណាមភូមិភាគ៩បានទទួលសំណើពីយោធភូមិភាគទី៥ឱ្យជួយជាបន្ដទៀតដើម្បីពង្រឹងគុណភាពកងទ័ពកម្ពុជាឱ្យកាន់តែមានប្រសិទ្ធភាពឡើង ៕
ចែករំលែកព័តមាននេះ