រ៉យទ័រផ្សាយកាលពីពេល ថ្មីៗនេះថា គឺជាលើកដំបូងហើយដែល «សិលាចារឹកបុរាណ» រកឃើញនៅអីុរ៉ាក់ដាក់តាំងបង្ហាញក្នុងពិពរ័ណ៍ ដោយរៀបរាប់ពីជីវភាពប្រចាំថ្ងៃរបស់ជនជាតិអីុស្រាអែលដែលភៀសខ្លួននៅអាណាចក្របាប៊ីឡូន (Babylon) កាលពី២៥០០ឆ្នាំមុន ។
ពិពរ័ណ៍នេះសំដៅលើការបង្ហាញសិលាចារឹកអក្សរគូសជាសញ្ញា មានទំហំប៉ុនបាតដៃមនុស្សចាស់ប្រហែល១០០ផ្ទាំង ។ សិលាចារឹកមួយផ្ទាំងៗសុទ្ធសឹងបញ្ជាក់លំអិតលើការទាក់ទងទិញទំនិញ និងប្រើជាសញ្ញារវាងជនជាតិអីុស្រាអែល ដែលត្រូវព្រះមហាក្សត្រនេប៊ូខាតណេសសា នៃអាណាចក្របាប៊ីឡូនបណ្តេញចេញ ឬណែនាំឱ្យចាកចេញពីក្រុងយេរូសាឡឹម កាលពី៦០០ឆ្នាំមុនគ្រឹស្តស័ករាជ ។
លោកហ្វ៊ីលីប វូកូសាវ៉ូវិក អ្នកជំនាញផ្នែកប្រវត្តិសាស្ត្របាប៊ីឡូន ដែលទទួលបន្ទុកគ្រប់គ្រងក្នុងពិពរ័ណ៍នៅសារមន្ទីរយេរូសាឡឹមបញ្ជាក់ថា «យើងសំណាងល្អ ប្រៀបដូចជាត្រូវរង្វាន់ដ៏មហាសាល ។ នៅពេលយើងចាប់ផ្តើមអានសិលាចារឹកទាំងនោះនឹងមានការភ្ញាក់ផ្អើល ព្រោះទិន្នន័យទាំងនោះជាចម្លើយនៃចម្ងល់របស់វត្ថុដែលយើងបានសង្ស័យនាពេលកន្លងមកថា តើកើតហេតុការណ៍អ្វីខ្លះទៅលើខ្សែជីវិតរបស់អីុស្រាអែលនៅក្នុងអាណាចក្របាប៊ីឡូន កាលពីជាង២៥០០ឆ្នាំមុន ?
ព្រះអង្គនេប៊ូខាត ណេសសា គឺជាអ្នកគ្រប់គ្រងដ៏មានឥទ្ធិពល និងត្រូវគេស្គាល់ថា ជាអធិរាជនៅបាប៊ីឡូន ធ្លាប់យាងទៅធ្វើទស្សនកិច្ចក្រុងយេរូសាឡឹមជាច្រើនលើក ខណៈពេលព្រះអង្គព្យាយាមពង្រីកអាណាចក្រ។ នៅក្នុង មួយលើកៗដែលព្រះអង្គយាងទតក្រុងយេរូសាឡឹម ទ្រង់បានបណ្តេញ ឬណែនាំឱ្យជនជាតិអីុស្រាអែលជាច្រើនពាន់នាក់ ចាកចេញពីដែនដី ។ ជនជាតិអីុស្រាអែលប្រហែល១៥០០នាក់ ដែលធ្វើដំណើរចាកចេញពីយេរូសាឡឹមនៅក្នុងអំឡុងពេល៥៨៧ឆ្នាំមុនគ្រឹស្តស័ករាជក៏បានដើរឆ្លងកាត់ដែនដីបច្ចុប្បន្នជាប្រទេសលីបង់ និងស៊ីរី ឆ្ពោះទៅដែនដីនៅភាគខាងត្បូងអីុរ៉ាក់ គឺជាចំណុចដែលជនអីុស្រាអែលជួញដូរ និងជួយគ្រប់គ្រងអាណាចក្របាប៊ីឡូន ។ សិលាចារឹកផ្ទាំង នីមួយៗ ត្រូវចារឹកដោយអក្សរគំនូស តូចៗ ដោយបង្ហាញពីផ្លែឈើ និងផលិតផលនានា ការបង់ពន្ធ ការជំពាក់បំណុល និងសន្សំឥណទាន ។
លោកវូកូសាវ៉ូវិក បានរៀបរាប់បន្តទៀតថា សិលាចារឹកទាំងនោះជួយបកស្រាយអាថ៌កំបាំងដែលមានអាយុជាង២៥០០ឆ្នាំមុន ខណៈពេលជនអីុស្រាអែលជាច្រើននាក់ធ្វើដំណើរវិលត្រឡប់ទៅយេរូសាឡឹមនៅពេលជនបាប៊ីឡូនអនុញ្ញាតចូល និងបង្កើតទីតាំងជាប្រទេសក្នុងពេលបច្ចុប្បន្ន ៕
ចែករំលែកព័តមាននេះ