យោងតាមកាសែតបាងកកប៉ុស្តិ៍របស់ថៃផ្សាយជាភាសាអង់គ្លេសនៅថ្ងៃទី៩ មីនា ឱ្យដឹងថា នាយករដ្ឋមន្ត្រីថៃលោកអាប់ភីស៊ីត វ៉េចាជីវ៉ា សង្ឃឹមថា កិច្ចប្រជុំគណៈកម្មាធិការព្រំដែនចម្រុះ (JBC) ដែលត្រូវរៀបចំឡើងនៅក្នុងប្រទេសឥណ្ឌូណេស៊ីនាពេលខាងមុខនេះនឹងជាចំណុចចាប់ផ្តើមមួយ ដើម្បីបន្ធូរបន្ថយភាពតានតឹងនៅតាមបណ្តោយព្រំដែនរវាងប្រទេសថៃ និងប្រទេសកម្ពុជា ។ លោកអាប់ភីស៊ីត បានលើកឡើងដូច្នេះក្រោយពីភាគីកម្ពុជាបានឯកភាពចំពោះកិច្ចប្រជុំនេះដែលស្នើឡើងដោយប្រធានអាស៊ានដោយត្រូវរៀបចំធ្វើនៅថ្ងៃទី២៤និង២៥ មីនាខាងមុខ។
កាសែតបាងកកប៉ុស្តិ៍បានដកស្រង់សម្តីលោក Thani Thongpha Kdi អ្នកនាំពាក្យក្រសួងការបរទេសថៃ ដែលថ្លែងកាលពីថ្ងៃទី៨ មីនា កន្លងមកថា រដ្ឋមន្ត្រីការបរទេសឥណ្ឌូណេស៊ីលោកម៉ាធី ណាតាឡេហ្គាវ៉ា ជាប្រធានអាស៊ាន បានជម្រាបក្រសួងការបរទេសថៃថា កម្ពុជាបានឯកភាពរួចហើយចំពោះការចូលរួមកិច្ចប្រជុំ JBC ដែលស្នើឡើងនោះ ។
ដំបូងកិច្ចប្រជុំ JBC ត្រូវគ្រោងរៀបចំធ្វើនាចុងខែកុម្ភៈ កន្លងមក ប៉ុន្តែបានពន្យារពេលវិញ ដោយភាគីថៃអះអាងថា កម្ពុជាចង់ឱ្យមានអន្តរាគមន៍ពីសហគមន៍អន្តរជាតិសិន ។ កាសែតថៃដដែលនេះបានដកស្រង់សម្តីលោកអាប់ភីស៊ីត ដែលថ្លែងថា «ខ្ញុំសង្ឃឹមថា កិច្ចប្រជុំនេះនឹងជួយបន្ធូរបន្ថយភាពតានតឹងរវាងប្រទេសទាំងពីរ» ។ ប្រភពព័ត៌មានពីកាសែតបាងកកប៉ុស្តិ៍ឱ្យដឹងទៀតថា លោកនាយករដ្ឋមន្ត្រីអាប់ភីស៊ីត ក៏នឹងមិនជំទាស់ដែរ ប្រសិនបើកិច្ចប្រជុំ JBC ត្រូវរៀបចំធ្វើឡើងក្រោមការសង្កេតរបស់តំណាងអាស៊ាន ឬប្រធានអាស៊ាន។
ទីភ្នាក់ងារព័ត៌មានផ្លូវការចិនស៊ីនហួកាលពីថ្ងៃទី៨ មីនា បានដកស្រង់សម្តីលោកកុយ គួង អ្នកនាំពាក្យក្រសួងការបទេស និងសហប្រតិបត្តិការអន្តរជាតិកម្ពុជាដែលថ្លែងថា លោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានផ្ញើលិខិតមួយច្បាប់ជូនរដ្ឋមន្ត្រីការបរទេសឥណ្ឌូណេស៊ី លោកម៉ាធី ណាតាឡេហ្គាវ៉ា ដែលក្នុងលិខិតនោះលោកឧបនាយករដ្ឋមន្ត្រីសរសេរថា កិច្ចប្រជុំ JBC និងកិច្ចប្រជុំ GBC ត្រូវតែរៀបចំឡើងដោយមានការចូលរួមពីប្រធានអាស៊ាន ឬតំណាងអាស៊ាន យ៉ាងហោចណាស់ក៏នៅក្នុងពិធីបើកកិច្ចប្រជុំដែរ ហើយនៅពេលកិច្ចប្រជុំចប់ ភាគីទាំងពីរកម្ពុជា និងថៃត្រូវតែរាយការណ៍អំពីលទ្ធផលនៃកិច្ចប្រជុំនេះជូនប្រធានអាស៊ាន ។
យោងតាមរបាយការណ៍របស់ស្ថានទូតកម្ពុជាប្រចាំប្រទេសឥណ្ឌូណេស៊ី ប្រមុខការទូតឥណ្ឌូណេស៊ី លោកម៉ាធី ណាតាឡេហ្គាវ៉ា បានសម្រេចស្នើឱ្យមានកិច្ចប្រជុំគណៈកម្មាធិការព្រំដែនទូទៅនិងគណៈកម្មការចម្រុះបោះបង្គោលព្រំដែនកម្ពុជា-ថៃ នៅថ្ងៃទី២៤ និងថ្ងៃទី២៥ មីនា នៅក្នុងក្រុង Bogorក្បែរទីក្រុងហ្សាការតា។ លោកកុយ គួង អ្នកនាំពាក្យក្រសួងការបរទេស កម្ពុជាត្រូវបានដកស្រង់សម្តីថា នៅក្នុងលិខិតឆ្លើយតបទៅរដ្ឋមន្ត្រីការបរទេសឥណ្ឌូណេស៊ី លោកឧបនាយករដ្ឋមន្ត្រីហោ ណាំហុង បានស្នើទៅប្រធានអាស៊ានថា ត្រូវមានវត្តមានរដ្ឋមន្ត្រីការបរទេសឥណ្ឌូណេស៊ី ឬអ្នកតំណាងយ៉ាងហោចណាស់នៅពេលបើកកិច្ចប្រជុំនៃជំនួបគណៈកម្មាធិការព្រំដែនទូទៅ ដែលដឹកនាំដោយរដ្ឋមន្ត្រីការពារជាតិ និងកិច្ចប្រជុំគណៈកម្មាធិការចម្រុះព្រំដែនកម្ពុជា-ថៃ ។
ក្រុមអ្នកវិភាគបានមើលឃើញថា ទោះបីជាពេលនេះភាគីថៃបានព្រមក្តី ក៏បង្ហាញថា កម្ពុជាបានដើរមុនថៃមួយជំហានទៀតហើយ នៅពេលដែលគេនៅមិនទាន់បានដឹងអំពីការឆ្លើយតបរបស់រដ្ឋាភិបាលថៃ ភ្លាមៗនោះ ។ រដ្ឋាភិបាលកម្ពុជាបានប្រកាសជំហរច្បាស់លាស់នៅពេលនេះ បន្ទាប់ពីការចរចាទ្វេភាគីកន្លងមក ហាក់ដូចជាមិនបានការអ្វីទាំងអស់ក្នុងការដោះស្រាយជម្លោះព្រំដែននេះ ហើយបានប្រកាសថា ចាប់ពីពេលនេះទៅ កម្ពុជាឈប់ប្រើប្រាស់យន្តការទ្វេភាគីដោយគ្មានភាគីទី៣ទៀតហើយ ។ ការចរចា ឬការពិភាក្សាត្រូវប្រព្រឹត្តទៅមួយទល់មួយរវាងកម្ពុជានិងថៃមែន ប៉ុន្តែការពិភាក្សាត្រូវមានការដឹងឮពីភាគីទី៣ គឺឥណ្ឌូណេស៊ី ។
កិច្ចចរចាទ្វេភាគី រវាងគណៈកម្មាធិការព្រំដែនកម្ពុជានិងថៃ បានផ្អាកតាំងពីឆ្នាំ២០០៩មក ។ ការកោះប្រជុំជាថ្មីនៅក្នុងប្រទេសឥណ្ឌូណេស៊ីនាចុងខែមីនាខាងមុខនេះ គឺដោយមានភាគីទី៣ ចូលរួមដឹងឮទើបកិច្ចចរចាដំណើរការទៅបាន ។ ក្រសួងការបរទេសកម្ពុជា នៅថ្ងៃទី៨ មីនា បានទទួលយកជាផ្លូវការហើយនូវសំណើរបស់រដ្ឋមន្ត្រីក្រសួងការបរទេសឥណ្ឌូណេស៊ី លោកម៉ាធីណាតាឡេហ្គាវ៉ា ជាប្រធានអាស៊ាន កាលពីថ្ងៃទី៧ ខែមីនា កន្លងទៅនេះ ដែលបានកោះឱ្យមានកិច្ចប្រជុំទ្វេភាគីរវាងគណៈកម្មាធិការព្រំដែនកម្ពុជា និងថៃ ក្រោមការតាមដានដោយភាគី៣ នៅក្នុងប្រទេសឥណ្ឌូណេស៊ីខាងមុខនេះ។ កិច្ចប្រជុំនោះ គេបានចែកជា២ផ្នែកដោយឡែកពីគ្នា គឺទី១-ជាកិច្ចប្រជុំគណៈកម្មាធិការព្រំដែនចម្រុះរវាងកម្ពុជានិងថៃ និងទី២-ជាកិច្ចប្រជុំគណៈកម្មាធិការកិច្ចការព្រំដែនទូទៅ រវាងកម្ពុជានិងថៃ ដោយចាប់ផ្តើមធ្វើពីថ្ងៃទី២៤ ខែមីនា ដល់ថ្ងៃទី២៥ ខែមីនា ឆ្នាំ២០១១ នៅក្នុងទីក្រុងBogor ជិតទីក្រុងហ្សាការតា ប្រទេសឥណ្ឌូណេស៊ី ។
ប្រធានគណៈកម្មាធិការកិច្ចការព្រំដែននៃប្រទេសកម្ពុជា លោកវ៉ា គឹមហុង ត្រូវបានដកស្រង់ប្រសាសន៍ដោយវិទ្យុផ្សាយជាខេមរភាសាថា លោកបានត្រៀមខ្លួនទៅចូលរួមនៅក្នុងកិច្ចប្រជុំនោះហើយ ។ «សម្តេចតេជោលោកឯកភាពហើយ លោកឱ្យទៅហើយ ។ បញ្ហាគឺទាក់ទងនឹងរឿងព្រំដែនរវាងប្រទេសទាំង២ ដែលនឹងត្រូវលើកឡើង» ។ គួររំលឹកថា កាលពីថ្ងៃទី២២ ខែកុម្ភៈកន្លងទៅនេះ រដ្ឋមន្ត្រីក្រសួងការបរទេសឥណ្ឌូណេស៊ី លោកម៉ាធី ណាតាឡេហ្គាវ៉ា ក្នុងនាមជាប្រធានអាស៊ាន បានកោះហៅជាបន្ទាន់មួយឱ្យមានកិច្ចប្រជុំថ្នាក់រដ្ឋមន្ត្រីការបរទេសអាស៊ាន នៅក្នុងទីក្រុងហ្សាការតា ប្រទសឥណ្ឌូណេស៊ី ដើម្បីរកដំណោះស្រាយបទឈប់បាញ់គ្នារវាងកងទ័ពកម្ពុជា និងថៃ ដែលបានផ្ទុះឡើងកាលពីថ្ងៃទី៤ ខែកុម្ភៈ រហូតដល់ថ្ងៃទី៧ ខែកុម្ភៈកន្លងទៅនេះ ។ ការកោះប្រជុំជាបន្ទាន់នោះ គឺក្រោយពេលដែលក្រុមប្រឹក្សាសន្តិសុខអង្គការសហប្រជាជាតិបានកោះប្រជុំជាបន្ទាន់ កាលពីថ្ងៃទី១៤ ខែកុម្ភៈ តាមសំណើរបស់កម្ពុជា ប្រឆាំងនឹងការឈ្លានពានរបស់កងទ័ពថៃ ។
លោកវ៉ា គឹមហុង បានបញ្ជាក់ថា កិច្ចប្រជុំទ្វេភាគីនៃគណៈកម្មាធិការព្រំដែនកម្ពុជានិងថៃ បានផ្អាកតាំងពីខែមេសា ឆ្នាំ២០០៩មក ដោយសារតែកំណត់ហេតុយល់ព្រមគ្នាចំនួន៣ មិនត្រូវបានសភាថៃផ្តល់សច្ចាប័នឡើយរហូតដល់ពេលនេះ ដូច្នេះហើយទើបកម្ពុជាចង់បានឱ្យមានភាគីទី៣ចូលរួមក្នុងកិច្ចប្រជុំខាងមុខ ។ កំណត់ហេតុយល់ព្រមទាំង៣នោះ មានដូចជា ការរំសាយកងទ័ពថៃឈ្លានពានកម្ពុជា នៅតំបន់ប្រាសាទព្រះវិហារ ការចុះរាវរកបង្គោលព្រំដែនចាស់ៗចំនួន៧៣ ការធ្វើផែនទីឱ្យបានច្បាស់លាស់ និងការខណ្ឌសីមា ជាអាទិភាពនៅតំបន់ប្រាសាទព្រះវិហារជាដើម ។
- ក្រុមអាវលឿងមានផែនការប្រមូលផ្តុំគ្នា នៅមុខស្ថានទូតឥណ្ឌូណេស៊ី
កាសែតឌឹណេស្សិន នៅថ្ងៃទី៩ មីនា ឆ្នាំ២០១១ ផ្សាយឱ្យដឹងថា ក្រុមសម្ព័ន្ធភាពប្រជាជនដើម្បីលទ្ធិប្រជាធិបតេយ្យ ហៅក្រុមអាវលឿងប្រកាសថា ពួកគេមានផែនការដាក់ជូនលិខិតមួយច្បាប់ទៅស្ថានទូតឥណ្ឌូណេស៊ីប្រចាំទីក្រុងបាងកកនៅថ្ងៃទី១០ មីនា ទាមទារកុំឱ្យប្រទេសឥណ្ឌូណេស៊ីជ្រៀតជ្រែកកិច្ចការផ្ទៃក្នុងរបស់ថៃ ។
លោក Panthep Pourpongpan ជាអ្នកនាំពាក្យក្រុមអាវលឿងនិយាយថា ក្រុមអាវលឿងប្រឆាំងដាច់ខាតចំពោះការជ្រៀតជ្រែកណាមួយរបស់ឥណ្ឌូណេស៊ីដែលជាប្រធានអាស៊ានក្នុងកិច្ចការផ្ទៃក្នុងរបស់ថៃ ។ តាមប្រភពព័ត៌មានពីកាសែតថៃឱ្យដឹងទៀតថា នៅថ្ងៃទី១០ មីនា ក្រុមអាវលឿង នឹងប្រមូលផ្តុំគ្នានៅបរិវេណខាងមុខស្ថានទូតឥណ្ឌូណេស៊ីដើម្បីដាក់ជូនលិខិតនោះ ៕
ចែករំលែកព័តមាននេះ