សម ថារ័ត្ន រំលឹករឿងប្រដាល់ជាមួយថៃ ខណៈសកម្មភាពប្រកួតហាក់ស្ងប់ ស្ងាត់
- ភ្នំពេញ
រាជធានីភ្នំពេញ ៖ មួយរយៈមកហើយ ដែលអ្នកគាំទ្រប្រដាល់ដាក់ទ្រុង មិនឃើញ សម ថារ័ត្ន ឡើងរេញញឹកញាប់ដូចមុន ។ យ៉ាងណាក៏ដោយនៅលើបណ្ដាញសង្គមហ្វេសប៊ុក…
រាជធានីភ្នំពេញ ៖ មួយរយៈមកហើយ ដែលអ្នកគាំទ្រប្រដាល់ដាក់ទ្រុង មិនឃើញ សម ថារ័ត្ន ឡើងរេញញឹកញាប់ដូចមុន ។ យ៉ាងណាក៏ដោយនៅលើបណ្ដាញសង្គមហ្វេសប៊ុក កីឡាការិនីដែលមានជំនាញល្បុក្កតោរូបនេះនៅតែបង្ហាញពីសកម្មរបស់ខ្លួនជារឿយៗ ដោយមិនបានបាត់មុខទៅណានោះទេ ពោលគឺនាងនៅតែបង្ហោះពីសកម្មភាពរបស់ខ្លួនឱ្យអ្នកគាំទ្របានឃើញជាប្រចាំដដែល ដោយគ្រាន់តែសកម្មភាពមួយរយៈចុងក្រោយផ្ដោតលើអាជីពជាមន្ត្រីនគរបាល និង សកម្មភាពថតសម្ដែងច្រើនជាង ។
ជាមួយនឹងភាពស្ងប់ស្ងាត់ការប្រកួតនេះហើយទើបគេឃើញ សម ថារ័ត្ន រំលឹកពីការប្រកួតមួយរបស់នាងកាលពី២ឆ្នាំមុន ដោយនាងនៅតែបង្ហាញអារម្មណ៍ហួសចិត្ត បើទោះជារឿងនោះបានកើតឡើងជាច្រើនឆ្នាំទៅហើយក្ដី ។ នាងបានសរសេរបង្ហោះថា«ខ្ញុំមិនសប្បាយចិត្តទេព្រោះខ្ញុំមិនបានឈ្នះ ។ ប៉ុន្តែខ្ញុំក៏មានអារម្មណ៍ថាមិនអីដែរព្រោះខ្ញុំមិនបានចាញ់ ។ ខ្ញុំបានព្យាយាមអស់ពីសមត្ថភាពហើយ ។
ការហ្វឹកហាត់ដោយភាពតានតឹងជារៀងរាល់ថ្ងៃមិនងាយស្រួលទេ ។ អ្វីដែលខ្ញុំទទួលបានពីការប្រយុទ្ធនេះគឺគ្រាន់តែហើមមុខខាងស្តាំ ហើយខាងគេហើមជើង ។ ពេលនោះខ្ញុំក៏បានរៀនសូត្រពីចំណុចខ្វះខាតរបស់ខ្ញុំដែរ ។ ចំណែកអ្នកផ្សព្វផ្សាយវិញ បាននិយាយអំពីការតស៊ូរបស់ខ្ញុំដើម្បីឪពុក ដូច្នេះពួកគេក៏ឱ្យខ្ញុំធ្វើរឿងដំបូងដែលខ្ញុំមិនធ្លាប់ធ្វើពីមុន គឺដើរជុំវិញអ្នកទស្សនាដោយមានប្រអប់រៃអង្គាសប្រាក់សម្រាប់លោកឪពុក។
អ្នកទស្សនាបានដាក់ប្រាក់បរិច្ចាគក្នុងប្រអប់ដោយស្នាមញញឹម(វាធ្វើឱ្យខ្ញុំយំ រំភើបនូវសន្តានចិត្តល្អ) ហើយខ្ញុំសប្បាយចិត្តមួយទៀត គឺស្រីៗចាប់ថើបខ្ញុំពេញហ្នឹង»! សូមអរគុណមិត្តភក្តិនិងក្រុមគ្រួសារជាទីស្រឡាញ់ សូមអរគុណអ្នកទាំងអស់គ្នាដែលបានបង្ហាញខ្ញុំនូវការគាំទ្រទាំងនៅទីនេះនិងទីនោះ និងនៅលើឆាក ហើយបន្តនិយាយថា ខ្ញុំពិតជាអស្ចារ្យទោះបីខ្ញុំក៏មិនមែនក៏ដោយ ។ ខ្ញុំស្រឡាញ់អ្នកទាំងអស់គ្នាខ្លាំងណាស់សម្រាប់ការលើកទឹកចិត្តនិងពេលវេលាទាំងនេះ!
អរគុណខ្លាំង!»។ ជាមួយនឹងការរំលឹកនេះ បានបង្ហាញយាងច្បាស់ថា នាងនៅអាឡោះអាល័យ នឹងអាជីពប្រដាល់លើសង្វៀន ស្របពេលដែលការប្រដាល់មួយនេះ ក៏លែងមានការប្រកួតនោះ។
សម ថារ័ត្ន បញ្ជាក់ឱ្យដឹងពីមូលហេតុស្ងប់ស្ងាត់ការប្រដាល់ថា មុនកូវីដ-១៩ មានអ្នករៀបចំការប្រកួតអន្តរជាតិទាក់ទងឱ្យនាងទៅប្រកួតនៅក្នុងប្រទេសថៃ តែនាងមិនទទួលដោយសារតែក្នុងពេលនោះ នាងរវល់ហ្វឹកហាត់ ធ្វើជាទាហាន ដោយមិនអាចសុំច្បាប់ចេញបាន។
ម្យ៉ាងនាងត្រូវការបង្វឹកខ្លួនឱ្យក្លាយជាមន្ត្រីក្របខ័ណ្ឌក្នុងជួរនគរបាលផង ទើបនាងអត់បានទទួល ។ ដោយឡែក នៅក្នុងពេលនេះ ភាពរវល់របស់នាងរយាលហើយ ប៉ុន្តែមកពីកូវីដ-១៩ទើបធ្វើឱ្យនាងមិនទាន់មានខាងណាហៅប្រកួត ។
នាងថា ទោះបីជានាងក្លាយជាមន្ត្រីរាជការរវល់ច្រើន តែនាងមិនបោះបង់ការប្រដាល់នោះទេ ជាពិសេសការប្រដាល់នៅលើសង្វៀនក្នុងស្រុក គឺរឹតតែជាអ្វីដែលនាងមិនអាចបោះបង់ ដោសារតែការស្រឡាញ់ និង ជាអាជីពដែលនាងពេញចិត្តតាំងពីតូច ។ នាងអះអាងថា ភាពស្ងាត់របស់នាងនៅក្នុងការប្រកួត គឺសុទ្ធតែដោយសាររវល់ក្នុងក្របខ័ណ្ឌជួរទាហានទាំងអស់៕
ចែករំលែកព័តមាននេះ