រាជធានីភ្នំពេញ ៖ សាលាដំបូងរាជធានីភ្នំពេញ នាព្រឹកថ្ងៃទី២៥ ខែសីហា ឆ្នាំ២០២០ បានប្រកាសសាលក្រមផ្តន្ទាទោសទៅលើជនជាប់ចោទជាជនជាតិចិនម្នាក់ ក្នុងសំណុំរឿងសម្លាប់សង្សារមានផ្ទៃពោះ ហើយដឹកសាកសពយកទៅដុតកំទេចចោលនៅក្បែរស្ពានលីយ៉ុងផាត់ ដាក់ពន្ធនាគារកំណត់រយៈពេល១៥ឆ្នាំ…
រាជធានីភ្នំពេញ ៖ សាលាដំបូងរាជធានីភ្នំពេញ នាព្រឹកថ្ងៃទី២៥ ខែសីហា ឆ្នាំ២០២០ បានប្រកាសសាលក្រមផ្តន្ទាទោសទៅលើជនជាប់ចោទជាជនជាតិចិនម្នាក់ ក្នុងសំណុំរឿងសម្លាប់សង្សារមានផ្ទៃពោះ ហើយដឹកសាកសពយកទៅដុតកំទេចចោលនៅក្បែរស្ពានលីយ៉ុងផាត់ ដាក់ពន្ធនាគារកំណត់រយៈពេល១៥ឆ្នាំ គិតពីថ្ងៃចាប់ឃុំខ្លួនពីបទ.ឃាតកម្ម ។ សាលក្រមនេះបានបើកផ្លូវទុកសិទ្ធិឲ្យជនជាប់ចោទប្តឹងឧទ្ធរណ៍តាមកំណត់ច្បាប់ ។
សូមរំលឹកថា កាលពីថ្ងៃទី២៨ ខែកក្កដា ឆ្នាំ២០២០ សាលាដំបូងរាជធានីភ្នំពេញ បានលើកយកសំណុំរឿងឃាតកម្មមួយមកបើកសវនាការជំនុំជម្រះទោស ។ សវនាការនោះដឹកនាំដោយលោក ទិតសុទ្ធី បូរ៉ាឆាត ជាចៅក្រមជំនុំជម្រះ និងលោក សឿន មុនីរ័ត្ន តំណាងអយ្យការ ។
ជនជាប់ចោទមានឈ្មោះ yang yang ភេទប្រុស អាយុ៣២ឆ្នាំ ជនជាតិចិន ចោទប្រកាន់ពីបទ.ឃាតកម្ម និងបទ.លាក់កំបាំងសាកសព ប្រព្រឹត្តកាលពីថ្ងៃទី២៩ ខែមិថុនា ឆ្នាំ២០១៩ នៅបន្ទប់លេខ២០៦ ក្នុងផ្ទះសំណាក់ប៉ារីស រាជធានីភ្នំពេញ ។ នៅចំពោះមុខក្រចកសេះជនជាប់ចោទឈ្មោះ yang yang បានសារភាពថា ខ្លួនគេពិតជាបានធ្វើឲ្យសង្សារបាត់បង់ជីវិតមែន ក្រោយមកខ្លួនក៏រត់ទៅស្រុកកំណើតវិញ លុះមួយខែក្រោយមកក៏ត្រឡប់មកស្រុកខ្មែរវិញ ដើម្បីសារភាពពីករណីសម្លាប់សង្សារនោះ ។
ជនដៃដល់បានសារភាពថា នៅថ្ងៃកើតហេតុ ពេលព្រឹកខ្លួនបាននាំសង្សារទៅមន្ទីរពេទ្យរ៉ូយ៉ាល់ ដើម្បីពិនិត្យសុខភាព លុះដល់ថ្ងៃត្រង់ក៏ចុះហូបអាហារនៅផ្ទះសំណាក់ប៉ារីស ពេលហូបអាហាររួចក៏នាំគ្នាឡើងទៅបន្ទប់លេខ២០៦ ដែលពួកគេជួលស្នាក់នៅ ។ នៅក្នុងបន្ទប់សង្សារបានប្រាប់ថា នាងមានផ្ទៃពោះ២ខែហើយ ពេលឮសង្សារនិយាយដូច្នោះខ្លួនបានប្រាប់នាងឱ្យទៅយកកូនចេញ ជាហេតុធ្វើឲ្យនាងខឹងក៏ស្ទុះមកប្រវាយប្រតប់ជាមួយខ្លួន ពេលនោះខ្លួនគេក៏បានរុញនាងចេញ បណ្ដាលឲ្យដួលបោកក្បាលផ្ទប់នឹងជ្រុងគ្រែបណ្តាលឱ្យបាត់បង់ជីវិតភ្លាមៗតែម្ដង ។
ជនដៃដល់សារភាពទៀតថា បន្ទាប់មកទៀត គិតអ្វីមិនចេញខ្លួនគេបានអង្គុយជក់បារីអស់២ដើម ហើយក៏ទៅទិញវ៉ាលីសធំមួយនៅផ្សារធំថ្មី ដើម្បីយកមកដាក់សាកសពសង្សារ រួចបានខ្ចីរថយន្តមិត្តភក្តិនៅក្រុមហ៊ុន ដើម្បីដឹកសពយកទៅប្លុងចោលនៅក្បែរស្ពានមួយ និងបានទិញសាំងចាក់ស្រោចដុតសាកសពនោះដុតចោល រួចបានគេចខ្លួនទៅស្រុកចិនវិញ លុះមួយខែក្រោយមកក៏បានត្រឡប់មកវិញ ទើបត្រូវនគរបាលចាប់ខ្លួនតែម្ដងទៅ ។
សំណុំរឿងខាងលើនេះ តំណាងអយ្យការនៅតែរក្សាការចោទប្រកាន់ជនជាប់ចោទឈ្មោះ Yang Yang ភេទប្រុស អាយុ២៨ឆ្នាំ ជនជាតិចិន មុខរបរបុគ្គលិក ក្រុមហ៊ុនដឹផាកវេ ស្ថិតនៅផ្លូវលេខ២៧៣ សង្កាត់ទួលសង្កែទី ១ ខណ្ឌឫស្សីកែវ ពីបទ.ឃាតកម្ម និងបទលាក់កំបាំងសាកសព ដើម្បីឲ្យប្រធានក្រុមប្រឹក្សាសម្រេច និងផ្តន្ទាទោសលើជនជាប់ចោទតាមច្បាប់ជាធរមាន ៕
ចែករំលែកព័តមាននេះ