ខេត្តបាត់ដំបង ៖ ពលរដ្ឋជាច្រើនគ្រួសារដែលរស់នៅពឹងអាស្រ័យទឹកលើប្រព័ន្ធប្រឡាយស្រោចស្រពរបស់«ចិន»ដែលឆ្លងកាត់ពីភូមិស្នឹងកើត ភូមិគរ និងភូមិសំរោង ឃុំស្នឹង ស្រុកបាណន់ បានប្រតិកម្មរិះគន់អាជ្ញាធរភូមិ-ឃុំថា មិនអើពើ និងមិនព្រមជួយរកដំណោះស្រាយនូវសំណូមពរ…
ខេត្តបាត់ដំបង ៖ ពលរដ្ឋជាច្រើនគ្រួសារដែលរស់នៅពឹងអាស្រ័យទឹកលើប្រព័ន្ធប្រឡាយស្រោចស្រពរបស់«ចិន»ដែលឆ្លងកាត់ពីភូមិស្នឹងកើត ភូមិគរ និងភូមិសំរោង ឃុំស្នឹង ស្រុកបាណន់ បានប្រតិកម្មរិះគន់អាជ្ញាធរភូមិ-ឃុំថា មិនអើពើ និងមិនព្រមជួយរកដំណោះស្រាយនូវសំណូមពរ ឬទុក្ខកង្វល់របស់ពលរដ្ឋ ដែលបានស្នើរម្ដងហើយ ម្ដងទៀតសុំឲ្យជួយដោះស្រាយចំពោះទីតាំងធ្វើអាជីវកម្ម«បោចមាន់និងកាប់ជ្រូកលក់» មួយកន្លែង ដែលតែងបង្ហូរកាកសំណល់ស្អុយរលួយចូលក្នុងប្រឡាយទឹកច្រើនឆ្នាំកន្លងទៅនេះ នៅត្រង់ចំណុច ភូមិស្នឹងកើត ឃុំស្នឹង ស្រុកបាណន់។
ប្រព័ន្ធប្រឡាយទឹកនោះបានហូរពីខាងត្បូងទៅខាងជើង ចូលប្រសព្វគ្នានឹងប្រឡាយចិន ត្រង់ចំណុចភូមិស្នឹងកើត ផ្លូវទៅកើត (ភ្នំចាក់អង្កាម) ហើយទីតាំងធ្វើអាជីកម្ម«បោចមាន់និងកាប់ជ្រូកលក់» នោះស្ថិតនៅក្បែងកែងប្រឡាយប្រសព្វនោះតែម្ដង។ បើតាមកាពិនិត្យជាក់ស្ដែង ប្រព័ន្ធទឹកនេះបានហូរពីខាងត្បូងខាងកើត ឆ្ពោះទៅទិសខាងជើងតាមប្រឡាយចិន។ ប៉ុន្តែមិនមែនមានតែប៉ុន្មានភូមិខាងលើ នៃឃុំស្នឹងទេ គឺវាអាចប៉ះពាល់ដល់ប្រជាពលរដ្ឋនៅក្នុងឃុំភ្នំសំពៅទៀតផង។
បើតាមអ្នកភូមិបានប្រាប់ថា ម្ចាស់ទីតាំងបោចមាន់ដ៏ធំដុំគួរសម ឈ្មោះ ម៉ាប់ ម៉ន ភេទប្រុស។ អាជីវកម្មនេះក្នុងមួយយប់ៗ អាចសម្លាប់មាន់លក់រាប់ពាន់ក្បាល និងកាប់ជ្រូកលក់រាប់សិបក្បាលទៀត ដែលដំណើរការច្រើនឆ្នាំកន្លងមកហើយ។ អ្នកភូមិនិយាយថា ឈ្មោះ ម៉ាប់ ម៉ន នេះ ហាក់មិនកោតក្រែងអ្នកភូមិនៅក្បែរខាងទេ។ បុគ្គលនេះបានបង្ករផលប៉ះពាល់គ្រប់បែបយ៉ាងដល់ប្រជាពលរដ្ឋនៅក្នុងភូមិ តាមរយះមុខរបរប្រចាំថ្ងៃរបស់ខ្លួន ពិសេសការដុតកាកសំណល់ និង បង្ហូរកាកសំណល់ស្អុយចូលទឹក។
អ្នកភូមិបានបញ្ជាក់ថា នៅខែវស្សា ជននេះបានបង្ហូរកាកសំណល់ស្អុយរលួយ (រោមមាន់ និងកាកសំណល់ផ្សេងៗ) តាមបំពង់បង្ហូរដែលកប់ក្នុងដីចូលក្នុងប្រឡាយទឹក ដែលអ្នកភូមិប្រើប្រាស់ ។ លុះដល់ខែប្រាំងជននេះ ប្រមូលកាកសំណល់ទាំងនេះដុតបង្កឲ្យមានផ្សែងហុយជះក្លិនឈ្ងៀមស្ទើរពុលពេញភូមិ ។ អ្នកភូមិបានរាយការណ៍អំពីករណីប្ដឹងទៅអាជ្ញាធរដែនដីជាបន្តបន្ទាប់ តែគ្មានលោកមន្ត្រីណាខ្វាយខ្វល់ និងអើពើចំពោះបណ្ដឹងពលរដ្ឋ ឬ មានចំណាត់ការតាមផ្លូវច្បាប់ឡើយ។ ទីបំផុត បានត្រឹមតែហៅបង្កបញ្ហានោះទៅសួរនាំ ហើយស្ងាត់ឈឹង។ រហូតដល់ពេលនេះ ជននេះនៅតែបង្កផលប៉ះពាល់ និង ធ្វើទុក្ខបុម្នេញដល់ពលរដ្ឋជាច្រើនភូមិដដែល តាមរយៈការបង្ហូរកាក់សំណល់ស្អុយរលួយចូលក្នុងប្រឡាយទឹកប្រើប្រាស់ និងទុកកាកសំណល់ជះខ្លិនមិនល្អចូលផ្ទះអ្នកភូមិនៅក្បែរនោះ ស្ទើរមិនអាចរស់នៅកើត។
កោះសន្តិភាពមិនទាចទំនាក់ទំនងសុំការបំភ្លឺពីម្ចាស់អាជីវកម្មបោចមាន់ និងកាប់ជ្រូកលក់ខាងលើនេះបានភ្លាមៗទេ នៅព្រឹកថ្ងៃទី២៥ សីហា ។ ប៉ុន្តែនៅព្រឹកថ្ងៃដដែលនេះ លោក ថូ ណារ៉េត មេភូមិស្នឹងកើតបានបដិសេធថា ពលរដ្ឋមិនដែលធ្លាប់យកសំណុំរឿងរបស់បុគ្គលឈ្មោះ ម៉ាប់ ម៉ន បង្ហូរកាកសំណល់ស្អុយរលួយចូលប្រឡាយទឹក មករាយការណ៏ប្រាប់លោកម្ដងណាទេ ឬ មួយពលរដ្ឋរាយការណ៏ប្ដឹងទៅខាងឃុំ ? លោកមេភូមិ រូបនេះ បានប្រាប់កោះសន្តិភាព នៅតាមផ្លូវ ខណៈពេលដែលលោកកំពុងជិះម៉ូតូទៅស្រែ ។ លោកបានបញ្ជាក់ដូច្នេះថា «ខ្ញុំមិនបានដឹងរឿងនេះទេ» នៅពេលសួរនាំអំពីម្ចាស់ទីតាំងបោចមាន់ ឈ្មោះម៉ន បង្ហូរកាកសំណល់ស្អុយរលួយចូលប្រឡាយទឹកខាងលើ។ ប៉ុន្តែស្របពេលនោះ ។ លោកបានប្រាប់ថា « ខ្ញុំនឹងជិះម៉ូតូឈៀងចូលទៅពិនិត្យទីតាំងចោលកាកសំណល់ទាំងនោះ ព្រោះខ្ញុំជិះម៉ូតូទៅស្រែ តាមផ្លូវក្បែរទៅ
នោះដែរ»។
ដោយឡែក លោកស្រី កិម គឹមអាន មេឃុំស្នឹង វិញបានថ្លែងប្រាប់កោះសន្តិភាព តាមទូរស័ព្ទនៅព្រឹកថ្ងៃដដែលនេះ ដោយលោកស្រីទទូលស្គាល់ថា តាមពិតរឿងអ្នកបោចមាន់ ចោលកាកសំណល់ចូលប្រឡាយទឹកនោះ គឺបានកើតឡើងច្រើនឆ្នាំហើយ តែកាលនោះ លោកស្រីមិនទាន់ជាប់ឈ្មោះជាមេឃុំនៅឡើយទេ ។ លោកស្រីបានបញ្ជាក់ថា កាលពីចុងឆ្នាំ២០១៧ ក្រោយលោកស្រីជាប់ឈ្មោះមេឃុំ លោកស្រី ក៏បានហៅម្ចាស់ទីតាំងបោចមាន់នោះ មកធ្វើការអប់រំណែនាំឲ្យគាត់បញ្ឍប់ចោលកាកសំណល់ពាសវាលពាសកាលបែបនេះ ថែមទាំងបានធ្វើកិច្ចសន្យាទៀតផង តែជននេះមិនគោរព។
ត្រង់ចំណុចបង្គាប់ឲ្យម្ចាស់ទីតាំងបោចមាន់ ឈ្មោះ ម៉ន ធ្វើកិច្ចសន្យាបញ្ឍប់នូវទង្វើបំពានច្បាប់ តែពេលនេះ ជននេះនៅតែបំពានលើកិច្ចសន្យានោះដដែលទៀត លោកស្រី កិម គឹមអាន មេឃុំស្នឹង បានពន្យល់ដូច្នេះថា «ដោយសារខ្ញុំ មិនរស់នៅក្នុងភូមិនោះ ទើបប៉ុន្មានឆ្នាំចុងក្រោយនេះ ខ្ញុំមិនបានដឹងថា រឿងនេះកើឡើងដដែលវិញ។ ពេលនេះខ្ញុំ បានចុះពិនិត្យផ្ទាល់ ឃើញថា ពិតជាមានការបង្ហូរកាកសំណល់ចូលក្នុងប្រឡាយទឹកនេះមែន»។ លោកស្រី មេឃុំបាននិយាយថា បើតាមពិនិត្យជាក់ស្ដែង ការបង្ហូរកាកសំណល់កខ្វក់ចូលក្នុងប្រឡាយទឹកប្រើប្រាសនេះ មិនត្រិមតែប៉ះពាល់ដល់ប្រជាពលរដ្ឋនៅក្នុងភូមិមួយចំនួន ក្នុងឃុំស្នឹង ប៉ុណ្ណោះទេ គឺអាចប៉ះពាល់ដល់ពលរដ្ឋរស់នៅក្នុងឃុំភ្នំសំពៅ ទៀតផង ហើយពេលនេះអ្នកស្រីកំពុងចាំជួបម្ចាស់ទីតាំង ដើម្បីដោះស្រាយហើយ។
ទោះយ៉ាងនេះក្ដី ប្រជាពលរដ្ឋដែលរងផលប៉ះពាល់យ៉ាងធ្ងន់ធ្ងរ ពីកាកសំណល់ស្អុយរលួយ ខាងលើនេះ បានប្រមានថា ប្រសិនបើលោកមេភូមិស្នឹងកើត និង លោកស្រីមេឃុំស្នឹង មិនចាត់វិធានការចំពោះទីតាំងបោចមាន់ និង កាប់ជ្រូកលក់ របស់ លោកដង្ខៅមាន់ឈ្មោះ ម៉ន នេះទេ ពួកគេនឹងធ្វើញតិផ្តិតមេដៃ ប្ដឹងទៅរដ្ឋបាលខេត្ត និង មន្ទីរបរិស្ថានខេត្ត ដើម្បីឲ្យជួយអន្តរាគមន៍រឿងនេះ។ ព្រោះប្រជាពលរដ្ឋដែលរងផលប៉ះពាល់ទាំងនោះ មិនអាចតស៊ូទ្រាំរស់ផឹកទឹកសម្អុយ ឬ ដេកហិតខ្លិនស្អុយកាកសំណល់របស់លោកដង្ខៅ ម៉ន បន្តទៀតទេ។ ប៉ុន្តែឆ្លើយតបនឹងការព្រមាននេះ លោកស្រី កិម គឹមអាន មេឃុំស្នឹង បានសន្យាថា លោកស្រីនឹងអញ្ជើញម្ចាស់ទីតាំងនេះតាមផ្លូវច្បាប់ ដើម្បីធ្វើការណែនាំឲ្យជននេះ កាយកាកសំណល់ស្អុយរលួចទាំងអស់ ចេញពីប្រឡាយទឹក និងឲ្យបុគ្គលនេះធ្វើកិច្ចសន្យាបញ្ឍប់ប្រព្រឹត្តល្មើសជាលើកទី២។ ប៉ុន្តែបើជននេះមិនព្រមស្ដាប់ឬមិនគោរពកិច្ចសន្យាថ្មីនេះទេ លោកស្រីនឹងធ្វើបណ្ដឹងទៅថ្នាក់លើ និង មន្ទីរបរិស្ថាន ដើម្បីចាត់វិធានតាមផ្លូវតុលាការតែម្ដង។
ពលរដ្ឋសង្ឃឹមថា ការសម្រេចអនុវត្តច្បាប់ជាថ្មី និងជាលើកទី២ របស់លោកស្រីមេឃុំស្នឹងនេះ នឹងមានប្រសិទ្ធភាព ហើយពលរដ្ឋនឹងតាមឃ្លាំមើលការអនុវត្តច្បាប់របស់លោកស្រីមេឃុំនេះថា តើមានប្រសិទ្ធឬអត់ ? ហើយតើមានអាយុវែងប៉ុនណា ? ព្រោះកាលអនុវត្តលើកទី១ កាលពី៣ឆ្នាំមុន មានអាយុត្រឹមមួយដង្ហើមចង្រិតប៉ុណ្ណោះ ស្រាប់តែលោកដង្ខៅមាន់ ឈ្មោះ ម៉ាប់ ម៉ន នេះ បង្កើនសកម្មភាពបង្ហូរកាកសំណល់ចូលទឹក និងដុតកាកសំណល់សម្អុយគេពេញភូមិដដែលរហូតដល់សព្វថ្ងៃនេះ។
ចែករំលែកព័តមាននេះ