ខេត្តកំពង់ធំ ៖ ស្ត្រីម្នាក់បានបាត់ពីផ្ទះអស់១យប់១ថ្ងៃ ស្រាប់តែកូនប្រទះឃើញសពអណ្តែតទឹកស្រះ កាលពីរសៀលថ្ងៃទី២៤ ខែសីហា ឆ្នាំ២០២០ ស្ថិតនៅភូមិព្រៃតាត្រាវ ឃុំបល្ល័ង្ក ស្រុកបារាយណ៍…
ខេត្តកំពង់ធំ ៖ ស្ត្រីម្នាក់បានបាត់ពីផ្ទះអស់១យប់១ថ្ងៃ ស្រាប់តែកូនប្រទះឃើញសពអណ្តែតទឹកស្រះ កាលពីរសៀលថ្ងៃទី២៤ ខែសីហា ឆ្នាំ២០២០ ស្ថិតនៅភូមិព្រៃតាត្រាវ ឃុំបល្ល័ង្ក ស្រុកបារាយណ៍ ខេត្តកំពង់ធំ។ ពាក់ព័ន្ធនឹងករណីនេះ ត្រូវបានសមត្ថកិច្ចអះអាងថា ស្ត្រីរងគ្រោះបានបាត់បង់ជីវិតដោយសារលង់ទឹកស្រះ ។
ស្ត្រីរងគ្រោះឈ្មោះ ហុង វុទ្ធី អាយុ៣៧ឆ្នាំ (មានសិតិមិនគ្រប់) រស់នៅក្នុងភូមិឃុំកើតហេតុខាងលើ មានប្តីឈ្មោះ មាន ម៉េត ។
តាមប្រភពព័ត៌មានបានឱ្យដឹងថា មុនពេលកើតហេតុ បុរសជាប្តីជាប់រវល់ទៅផ្លាស់ប្តូរទីលំនៅឯបាត់ដំបងមិនទាន់ត្រឡប់មកវិញទេ ដោយទុកឲ្យស្ត្រីរងគ្រោះរស់នៅជាមួយកូន ហើយស្ត្រីរងគ្រោះបានបាត់ខ្លួនកាលពីរសៀលថ្ងៃទី២៣ សីហា ឆ្នាំ២០២០ ត្រូវបានសាច់ញាតិនាំគ្នាដើររករហូតដល់យប់ នៅតែមិនឃើញនាង លុះរកអស់ចិត្ត គាប់ជួនជាពេលយប់ក៏នាំគ្នាសម្រាកដេកពួនអស់ទៅ ។
តាមប្រភពព័ត៌មានបានឱ្យដឹងបន្តថា ក្រោយពីរកស្ត្រីរងគ្រោះអស់ចិត្ត ឈ្មោះ ហាក់ ហាន ត្រូវជាឪពុកមារបស់ស្ត្រីរងគ្រោះបានមករាយការណ៍ជូនប៉ុស្តិ៍នគរបាលរដ្ឋបាលឃុំបល្ល័ង្ក បន្ទាប់មកនគរបាលឲ្យបុរសជាឪពុកមាទៅរករូបថតស្ត្រីរងគ្រោះដើម្បីផ្សព្វផ្សាយ ហើយសមត្ថកិច្ចប៉ូលិសឃុំបល្ល័ង្គក៏ចេញល្បាតដើម្បីស្វែងរកជនរងគ្រោះដែលបាត់ខ្លួន ។
តាមប្រភពព័ត៌មានបានឱ្យដឹងបន្តទៀតថា លុះដល់រសៀលថ្ងៃទី២៤ ខែសីហា ទើបកូនប្រុសរបស់ស្ត្រីរងគ្រោះឈ្មោះ ម៉េត ម៉េងហុងលី អាយុ១៥ឆ្នាំ បានដើរទៅកន្លែងបញ្ចុះសពដូនតានៅក្រោយផ្ទះចម្ងាយប្រហែល១០០ម៉ែត្រ ក៏ប្រទះឃើញសពម្តាយអណ្តែតទឹកក្នុងស្រះ ក៏រាយការណ៍ជូនសមត្ថកិច្ចឱ្យចុះមកពិនិត្យតែម្តង ។
បន្ទាប់ពីទទួលបានសេចក្តីរាយការណ៍ខាងលើរួចមក សមត្ថកិច្ចជំនាញជាមួយលោកវេជ្ជបណ្ឌិត សែម សុចិត្ត្រា អនុប្រធានមន្ទីរពេទ្យបង្អែក បារាយណ៍-សន្ទុក ពិនិត្យសពស្ត្រីរងគ្រោះរួច បានធ្វើការសន្និដ្ឋានថា ស្ត្រីរងគ្រោះបាត់បង់ជីវិតដោយសារលង់ទឹកស្រះប្រាកដមែន ។ ក្រោយពីពិនិត្យរួច សមត្ថកិច្ចបានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ