ខេត្តស្វាយរៀង ៖ មហាជនបានរិះគន់មន្ត្រីជលផលចំថា បណ្តោយឲ្យអ្នកនេសាទខុសច្បាប់ប្រើស្បៃមុងធ្វើជាដាយ និងសាយ៉ឺនដាក់ចាប់ត្រីរាប់សិបគ្រឿងនៅរដូវហាមឃាត់នេសាទ ត្រង់ចំណុចប្រឡាយទ្វារទឹក និងទ្វារបង្ហៀរទឹកស្ពានតាហោ សង្ស័យទទួលបានសំណែន។ ករណីមហាជនរិះគន់មន្ត្រីជលផលខេត្តស្វាយរៀងនេះបានកើតឡើងកាលពីវេលាម៉ោង៣រសៀលថ្ងៃទី២៤ សីហា…
ខេត្តស្វាយរៀង ៖ មហាជនបានរិះគន់មន្ត្រីជលផលចំថា បណ្តោយឲ្យអ្នកនេសាទខុសច្បាប់ប្រើស្បៃមុងធ្វើជាដាយ និងសាយ៉ឺនដាក់ចាប់ត្រីរាប់សិបគ្រឿងនៅរដូវហាមឃាត់នេសាទ ត្រង់ចំណុចប្រឡាយទ្វារទឹក និងទ្វារបង្ហៀរទឹកស្ពានតាហោ សង្ស័យទទួលបានសំណែន។
ករណីមហាជនរិះគន់មន្ត្រីជលផលខេត្តស្វាយរៀងនេះបានកើតឡើងកាលពីវេលាម៉ោង៣រសៀលថ្ងៃទី២៤ សីហា ឆ្នាំ២០២០ នៅភូមិក្បាលស្ពាន សង្កាត់ពោធិតាហោ ក្រុងស្វាយរៀង។
បើតាមមន្ត្រីនគបាលមួយរូបសុំមិនបញ្ចេញឈ្មោះបានឲ្យដឹងថា ការដាក់ដាយ និងសាយ៉ឺននៅចំណុចប្រឡាយទ្វារទឹក ភូមិក្បាលស្ពាន និងទ្វារបង្ហៀរទឹកស្ពានតាហោខាងលើនេះកើតឡើងកន្លះខែមកហើយ មិនឃើញមានអាជ្ញាធរ ឬមន្ត្រីការិយាល័យជលផលនៃមន្ទីរកសិកម្មរុក្ខាប្រម៉ាញ់និងនេសាទខេត្តទៅណាអស់ទេ បណ្តោយឲ្យកើតមានការធ្វើនេសាទខុសច្បាប់នៅរដូវហាមឃាត់បែបនេះ ជាពិសេសការប្រើប្រាស់ស្បៃមុង ធ្វើដាយនិងសាយ៉ឺនជាឧបករណ៍ខុសច្បាប់ ដាក់ចាប់ត្រីក្នុងអាងទន្លេវ៉ៃគោ ដែលជាស្ថានីយ៍លែងកូនត្រីរបស់រាជរដ្ឋាភិបាល ដើម្បីអភិរក្សមច្ឆាធម្មជាតិមួយនៃអាងទន្លេវ៉ៃគោត្រូវតែចូលរួមអភិរក្ស មហាជនបានអំពាវនាវសុំឲ្យមន្ត្រីជំនាញនិងអាជ្ញាធរគួរបង្ក្រាប។
ទាក់ទិននឹងករណីខាងលើនេះដែរ មិនអាចរកការបំភ្លឺពីលោកសេង គ្រី ប្រធានការិយាល័យជលផលនៃមន្ទីរកសិកម្មរុក្ខាប្រម៉ាញ់និងនេសាទខេត្តបានទេ ដោយទូរសព្ទ័ចូល ប៉ុន្តែគ្មានអ្នកលើក ៕ (កែសម្រួលដោយ ៖ ធីតា)
ចែករំលែកព័តមាននេះ