ខេត្តកំពង់ស្ពឺ ៖ មន្ត្រីថ្នាក់កន្ទ្រឹសមួយរូបដែលគេដឹងច្បាស់ថា ជាសាច់ញាតិរបស់លោកកងភារីអធិការរងនគរបាលស្រុកសំរោងទង ដែលមានរឿងត្រូវបានឃាត់ខ្លួនតាមបញ្ជារបស់អគ្គស្នងការនគរបាលជាតិឱ្យចាត់ការតាមនីតិវិធីច្បាប់នោះ ពេលនេះ មន្ត្រីនៅក្រសួងមួយរូប ដែលមានការអះអាងថា ពាក់ផ្កាយ៣កំពុងតែរត់ការយ៉ាងខ្វាត់ខ្វែងនៅសាលាដំបូងខេត្តកំពង់ស្ពឺ ក្នុងចេតនាមិនចង់ឱ្យចៅក្រមធ្វើការឃាត់ខ្លួនលោកអធិការងដ៏ទំនើងរូបនេះយកទៅដាក់ពន្ខនាគារឡើយ។
យោងតាមប្រភពពីមន្ត្រីនគរបាល ដែលបញ្ជូនខ្លួនអធិការរងដ៏ទំនើងរូបនេះទៅកាន់សាលាដំបូងខេត្តកំពង់ស្ពឺបានបង្ហើបថា មន្ត្រីថ្នាក់ផ្កាយ3 នៅក្រសួងមួយរូបបានចេញមុខទៅធានាអះអាងជាមួយចៅក្រមស៊ើបសួរនៃសាលាដំបូងខេត្តកំពង់ស្ពឺ ក្នុងចេតនាមិនចង់ឲ្យចៅក្រមធ្វើការឃុំខ្លួនលោកអធិការរងកងភារីហៅម៉ៅនោះទេមិនត្រឹមតែប៉ុណ្ណោះ មន្ត្រីនគរបាលរូបនោះបាននិយាយអះអាងថា គ្រាន់តែបាញ់កាំភ្លើងលេងប៉ុណ្ណឹង ចាំបាច់ឃាត់ខ្លួនបញ្ជូនមកតុលាការធ្វើអី បើសម័យមុនគាត់បាញ់សម្លាប់មនុស្សមិនដែលមានអ្នកណារករឿងគាត់ផង។
ការនិយាយបែបនេះ របស់មន្ត្រីថ្នាក់អន្ទ្រើសរូបនោះ ត្រូវបានមជ្ឈដ្ឋានដឹងរឿងនាំគ្នាខ្សឹបខ្សៀវរិះគន់ថា ដោយសារតែខ្នងបង្អែកគាត់មានពាក់ផ្កាយពេញស្មាសម្ដី ដូចក្មេងពាលបែបនេះ ហើយទើបបានជាបុគ្គលកងភារីហៅម៉ៅនេះកាត់តាមខ្នងបង្អែករបស់គេហើយចេះតែប្រព្រឹត្តអ្វីដែលផ្ទុយពីច្បាប់។
បើតាមប្រភពមួយទៀតបានបង្ហើបផងដែរថា លោកកង ភារី ហៅម៉ៅ ត្រូវបានលោកស្រីព្រះរាជអាជ្ញាចោទប្រកាន់ពីបទប្រើប្រាស់អាវុធខុសច្បាប់ និងបានបញ្ជូនទៅឱ្យចៅក្រមធ្វើការស៊ើបសួរបន្ត ដែលរហូតមកដល់ពេលនេះ អស់រយៈពេលពីរថ្ងៃហើយដែលខាងចៅក្រមស៊ើបសួរបានពន្យារពេលមិនទាន់សម្រេចថា យ៉ាងណានៅឡើយទេ។ ការពន្យារពេលនេះ ត្រូវបានដឹងថា ដោយសារតែមានមន្ត្រីនគរបាលថ្នាក់ផ្កាយ 3 ដែលជាខ្នងបង្អែករបស់លោកវរសេនីយ៍ទោកងភារីរូបនេះទៅចរចាសុំកុំឲ្យមានការឃុំខ្លួនលោកកងភារីទើបបានជាយូររហូតមកដល់ថ្ងៃនេះ។
មជ្ឈដ្ឋានមហាជនដែលដឹងរឿងបាននាំគ្នារិះគន់ថា បើសិនជាវប្បធម៌អន្តរាគមន៍នៅតែមានប្រសិទ្ឋភាពច្បាស់ណាស់សម្តីរបស់ថ្នាក់ដឹកនាំប្រាកដជាសាបដូចទឹកជាក់ជាមិនខាន។មិនត្រឹមតែមកអន្តរាគមន៍នោះទេ ថែមទាំងនាំកូនចៅរបស់ខ្លួនមកបើកការស៊ើបអង្កេតករណីលោកកងធារីបាញ់បោះសេរីនេះទៀតផង។ហើយបើតាមដឹងគឺការធ្វើសុើបនេះក្នុងចេតនាជួយសម្រាលនិងដោះបន្ទុកលោកកងភារីទៅវិញទេគណៈដែលលោកកងភារីឆ្លើយបំភ្លឺនៅតុលាការថាខ្លួនមិនបានបាញ់នោះទេតែជាអាវុធរបស់ខ្លួន។
បើតាមប្រភពពីមន្ត្រីតុលាការមួយរូបបានបង្ហាញផងដែរថានេះគឺជាបញ្ជារបស់ថ្នាក់ដឹកនាំគ្មាននរណាម្នាក់ហ៊ានសម្រេចនោះទេ តែបើលោកផ្កាយ 3 រូបនោះមានអំណាចខ្លាំងជាងបញ្ជារបស់ថ្នាក់ដឹកនាំឬក៏អគ្គស្នងការនគរបាលជាតិគាត់ពិតជាអាចធ្វើបាន។
រហូតមកដល់ពេលនេះមហាជនទូទៅបានរង់ចាំមើលនិងលើកជាសំណួរថាតើអំណាចរបស់លោកផ្កាយ 3 ខ្លាំងឬក៏អំណាចរបស់តុលាការខ្លាំង?
នៅល្ងាចថ្ងៃទី២៤ សីហា នេះ ក្រុមអធិការរងដ៏ទំនើងត្រូវបានមន្ត្រីនាំយកមកកាន់ស្នងការដ្ឋាននគរបាលខេត្តវិញហើយដែលករណីនេះត្រូវបានមន្ត្រីមួយចំនួនខ្សឹបខ្សៀវគ្នាថា សង្ស័យថា ទំនងជាមានការត្រូវរ៉ូវគ្នាហើយទើបបានជាពន្យារពេលរហូតអញ្ចឹងនោះ។
ព័ត៌មានបន្ថែមមានផ្សាយជូនបន្តនៅកាសែតកោះសន្តិភាព ។
ចែករំលែកព័តមាននេះ