ទីបំផុត! Ronaldinho ត្រូវបានដោះលែងឱ្យសេរីភាពហើយ
ប៉ារ៉ាហ្គាយ ៖ វីរបុរសបាល់ទាត់ប្រេស៊ីល Ronaldinho ត្រូវបានចៅក្រមប្រទេសប៉ារ៉ាហ្គាយសម្រេចដោះលែងជាផ្លូវការ កាលពីថ្ងៃច័ន្ទ ទី២៤ ខែសីហា បន្ទាប់ពីចំណាយពេល ៥ខែ…
ប៉ារ៉ាហ្គាយ ៖ វីរបុរសបាល់ទាត់ប្រេស៊ីល Ronaldinho ត្រូវបានចៅក្រមប្រទេសប៉ារ៉ាហ្គាយសម្រេចដោះលែងជាផ្លូវការ កាលពីថ្ងៃច័ន្ទ ទី២៤ ខែសីហា បន្ទាប់ពីចំណាយពេល ៥ខែ ក្នុងការឃុំខ្លួនជុំវិញការប្រើប្រាស់លិខិតឆ្លងដែនក្លែងក្លាយ ដើម្បីចូលប្រទេសនេះ។
ចៅក្រម Gustavo Amarilla ក៏បានសម្រេចដោះលែងបងប្រុសរបស់ Ronaldinho គឺលោក Roberto de Assis Moreira ដែលបានជាប់ពន្ធនាគារ ១ខែ និង ៤ខែទៀតឃុំខ្លួននៅក្នុងសណ្ឋាគារមួយក្នុងរដ្ឋធានី Asuncion សម្រាប់បទចោទដូចគ្នា។ ចៅក្រមបាននិយាយថា អតីតម្ចាស់ជើងឯកពានរង្វាន់បាល់ទាត់ពិភពលោកវ័យ ៤០ឆ្នាំរូបនេះ មានសេរីភាពក្នុងការធ្វើដំណើរទៅកាន់ប្រទេសណាមួយដែលគេចង់ ប៉ុន្តែគេត្រូវតែជូនដំណឹងដល់យើង ប្រសិនបើគេផ្លាស់ប្តូរទីលំនៅអចិន្ត្រៃយ៍ក្នុងរយៈពេល ១ឆ្នាំ។
Ronaldinho បានទទួលយកលក្ខខណ្ឌនៃការដោះលែង ដែលរួមបញ្ចូលទាំងការទូទាត់សំណងខូចខាតសង្គមចំនួន ៩ម៉ឺនដុល្លារអាមេរិក។ ដោយឡែកលោក Roberto ត្រូវតែបង់សំណងចំនួន ១១ម៉ឺនដុល្លារអាមេរិក និងត្រូវព្យួរទោស ២ឆ្នាំ។ ហើយរូបលោកនឹងត្រូវបង្ហាញមុខចំពោះចៅក្រម នៅប្រេស៊ីលរៀងរាល់ ៤ខែម្តងរយៈពេល ២ឆ្នាំ។
ព្រះរាជអាជ្ញាបាននិយាយថា ពួកគេមិនជឿថា Ronaldinho បានចូលរួមក្នុងគម្រោងបង្កើតលិខិតឆ្លងដែនប៉ារ៉ាហ្គាយក្លែងក្លាយនោះទេ ប៉ុន្តែគេជឿថាលោក de Assis Moreira បានដឹងថាលិខិតឆ្លងដែនទាំងនោះក្លែងក្លាយ៕ (ដកស្រង់ចេញពី AFP)
ចែករំលែកព័តមាននេះ