ខេត្តកំពង់ចាម ៖ ទោះបីជាក្នុងរដូវបិទនេសាទ ដោយហាមមិនអោយនេសាទចាប់ពីថ្ងៃទី ១ មិថុនារហូតដល់ថ្ងៃទី ៣០កញ្ញា ២០២០ បែបនេះក្តី ក៏គេសង្កេតឃើញមានក្រុមជនខិលខូចមួយចំនួនបានលួចនេសាទទាំងយប់ទាំងថ្ងៃ ដើម្បីចាប់ត្រីតូចធំនៅតាមដងទន្លេមេគង្គ ដែលមានចាប់ពីស្រុកស្ទឹងត្រង់ រហូតដល់ស្រុកស្រីសន្ធរ ។ ចំណែកមន្ត្រីជលផលវិញបានអះអាងថា ក៏មានភាពសកម្មក្នុងការបង្ក្រាបបទល្មើសនេសាទនេះផងដែរ រហូតដល់មានការចាប់បញ្ជូនជនល្មើសទៅសាលាដំបូងខេត្តទៀតផង។
តាមប្រជាពលរដ្ឋរស់នៅតាមដងទន្លេមេគង្គប្រាប់ឲ្យដឹងថា ជារៀងរាល់ឆ្នាំឱ្យតែរដូវវស្សាឈានចូលមកដល់នៅថ្ងៃទី១ មិថុនា ២០២០ ជំនាញរដ្ឋបាលជលផល បានចេញសេចក្តីប្រកាស ដោយមិនឲ្យធ្វើការនេសាទនោះទេ ព្រោះជារដូវត្រីពង ។ ទោះបីជាបែបនេះក្តី ក៏មានក្រុមអ្នកនេសាទខិលខូចមួយចំនួនបានប្រើប្រាស់ទូកម៉ាស៊ីនអូសចាប់យកត្រីមិនថាយប់ឬថ្ងៃនោះទេ ហើយបើតាមការសង្កេតជាក់ស្ដែង គឺមាននៅតាមដងទន្លេស្រុកស្ទឹងត្រង់-ក្រូចឆ្មារ រហូតដល់ស្រុកស្រីសន្ធរ ក្នុងនោះទូកម៉ាស៊ីនអូសយកខ្ចៅមានជាច្រើនគ្រឿងហាក់បីដូចជាមិនខ្លាចនឹងជំនាញជលផល។
ប្រជាពលរដ្ឋបានត្អូញត្អែរថា នៅចំណុចដងទន្លេក្នុងស្រុកកងមាស កាលពីមុនឱ្យតែរដូវទឹកទន្លេឡើង គាត់ដាក់លបឬទ្រូនៅតាមមាត់ទន្លេគឺបានត្រីតូចត្រីធំសម្រាប់យកមកធ្វើម្ហូបក្នុងក្រុមគ្រួសារ ។ តែចាប់តាំងពីពេលដែលមានសកម្មភាពអូសយ៉ាំងកាវ មិនថាយប់ឬថ្ងៃដើម្បីចាប់យកត្រីគ្រប់ប្រភេទ នៅតាមទន្លេមេគង្គមានការថមថយត្រី ដោយសារតែគេលួចប្រើប្រាស់ ឧបករណ៍នេសាទក្នុងរដូវហាមឃាត់ ។ ដោយសារតែកត្តាបែបនេះហើយទើបធ្វើអោយត្រីកាន់តែខ្សត់ទៅៗ ហើយពួកគាត់ដាក់លបឬទ្រូ ត្អូញត្អែរថាដាក់មិនបានត្រីនោះទេ ជួនត្រូវទិញត្រីចិញ្ចឹមយកមកហូបជំនួសវិញ។ តាមការសង្កេតដោយផ្ទាល់ កម្រនឹងឃើញជំនាញរដ្ឋបាលជលផល ចុះមកបង្ក្រាប។ពោលគឺក្រុមអ្នកនេសាទល្មើសច្បាប់តែងតែប្រើប្រាស់ឧបករណ៍នេសាទចាប់យកត្រីស្ទើរតែរាល់ថ្ងៃ។
លោកអ៊ុក ណារិន ប្រធានរដ្ឋបាលជលផលខេត្តកំពង់ចាម ប្រាប់ឲ្យដឹងនៅព្រឹកថ្ងៃទី២៤សីហា ២០២០ នេះថា ដោយអនុវត្តតាមការណែនាំពីសំណាក់លោកអ៊ុន ចាន់ដា អភិបាលនៃគណៈអភិបាលខេត្ត បានឲ្យមន្ត្រីជំនាញជលផល យកចិត្តទុកដាក់បង្ក្រាបបទល្មើសនេសាទ និងអ្នករំលោភយកដីព្រៃលិចទឹកជាដើម។ តាមគោលការណ៍នៅក្នុងរដូវបិទនេសាទដោយបានធ្វើឡើងចាប់តាំងពីថ្ងៃទី១ មិថុនា នឹងបន្តដល់ថ្ងៃទី៣០ កញ្ញា២០២០។
លោកអ៊ុក ណារិន នាយខណ្ឌរដ្ឋបាលជលផលខេត្តប្រាប់បន្តថា ចាប់តាំងពីដើមឆ្នាំរហូតមកដល់ថ្ងៃទី២៤ សីហា ២០២០ កម្លាំងរបស់លោកបានបង្ក្រាបបទល្មើសនេសាទដោយខុសច្បាប់ ក្នុងនោះរួមមានកាប់ទន្ទ្រានព្រៃលិចទឹកនិងព្រៃកសិកម្ម ចំនួន៤ករណី បញ្ជូនទៅសាលាដំបូងខេត្តផងដែរ។ ចំពោះការចោទប្រកាន់ថានៅពេលយប់តាមដងទន្លេមេគង្គ មានសកម្មភាពអូសយ៉ាងកាវ ក្នុងរដូវបិទនេសាទនោះមិនមាននោះទេ ដោយកម្លាំងជលផលបានបើកកាណូតល្បាតចេញពីស្រុកមួយទៅស្រុកមួយ តាមដងទន្លេមេគង្គ។
លោកបានបន្តថា សកម្មភាពក្រុមជនល្មើសប្រើទូកលម៉ាស៊ីន អូសយកខ្ចៅនៅតាមដងទន្លេក៏ត្រូវបានបង្ក្រាបជាបន្តបន្ទាប់ និងចាប់បញ្ជូនទៅតុលាការដោយធ្វើការផាកពិន័យ តាមច្បាប់អន្តរកាល ហើយចាប់តាំងពីពេលនោះមក បទល្មើសនេសាទមានការថមថយចុះគួរឲ្យកត់សម្គាល់។
បើតាមការកត់សម្គាល់ជាក់ស្ដែង ត្រីទន្លេមេគង្គមិនអាចទ្រទ្រង់សម្រាប់ដោះស្រាយជីវភាពប្រជាពលរដ្ឋនៅក្នុងខេត្តកំពង់ចាមបានទាំងស្រុងនោះទេ ដោយក្នុងនោះត្រូវនាំចូលមកពីប្រទេសជិតខាងនិងមួយផ្នែកទៀតជាប្រភេទត្រីចិញ្ចឹមនៅក្នុងស្រុក ដើម្បីបំពេញតម្រូវការជីវភាពប្រចាំថ្ងៃរបស់ប្រជាពលរដ្ឋ៕ (កែសម្រួលដោយ ៖ ធីតា)
ចែករំលែកព័តមាននេះ