រាជធានីភ្នំពេញ ៖ មកទល់ពេលនេះ នៅក្នុងវិស័យប្រដាល់នារី មាននារីក្មេងៗច្រើនឡើងបានបង្ហាញសមត្ថភាព និងឆន្ទៈចង់ក្លាយជាកីឡាការិនីប្រដាល់គួរឱ្យសរសើរ ។ ប៉ុន្តែគេនៅតែមើលឃើញថា កីឡាការិនីថ្មីៗទាំងនោះ នៅមិនទាន់អាចផ្ដួលកីឡាការិនី៤រូប…
រាជធានីភ្នំពេញ ៖ មកទល់ពេលនេះ នៅក្នុងវិស័យប្រដាល់នារី មាននារីក្មេងៗច្រើនឡើងបានបង្ហាញសមត្ថភាព និងឆន្ទៈចង់ក្លាយជាកីឡាការិនីប្រដាល់គួរឱ្យសរសើរ ។ ប៉ុន្តែគេនៅតែមើលឃើញថា កីឡាការិនីថ្មីៗទាំងនោះ នៅមិនទាន់អាចផ្ដួលកីឡាការិនី៤រូប ដែលបានឈរជើងល្បីល្បាញជាយូរមកហើយនោះបានទេ ជាពិសេសនៅពេលកីឡាការិនីចាស់ៗទាំង៤នៅតែទទួលប្រកួត និងបន្តធ្វើជាកីឡាការិនីក្នុងក្រុមជម្រើសជាតិផ្នែកប្រដាល់សាកលនារី ។ យ៉ាងណាក៏ដោយមិនថាកីឡាការិនីចំណូលថ្មី ឬអ្នកល្បីទាំង៤រូបនោះទេ គឺសុទ្ធតែថ្ងូរថាមិនអាចរកចំណូលបានពីអាជីពមួយនេះ ដើម្បីរស់បានសមរម្យទាំងអស់។
អេ យ៉ានុត បើទោះជាមើលទៅមានទីផ្សារចេញប្រកួតទាំងក្នុង និងក្រៅស្រុកញឹកញាប់ ប៉ុន្តែចំណូលពីអាជីពប្រដាល់ មិនអាចឱ្យនាងរស់កើតនោះទេ ។ សព្វថ្ងៃនាងពឹងផ្អែកមួយផ្នែកលើចំណូលពីការបង្ហាត់សិស្សជាមួយម្ដាយ និងឪពុកប៉ុណ្ណោះ ខណៈដែលនាងក៏រស់ក្រោមបន្ទុកឪពុកម្ដាយនៅឡើយ ថ្វីដ្បិតឱកាសបានចេញប្រកួតម្ដងៗ ជួយឱ្យនាងទទួលបានប្រាក់លើកទឹកចិត្តច្រើនគួរសមក្ដី ។ នោះគឺដោយសារតែការប្រដាល់ក្នុងស្រុក គឺស្ទើរមិនមានតែម្ដង ដោយរង់ចាំតែឱកាសចេញប្រកួតតំណាងជាតិ ឬប្រដាល់ដាក់ទ្រុង ដែលមួយឆ្នាំអាចមានតែម្ដង ឬពីរដង ។
អេ យ៉ានុត គឺជាកីឡាការិនីជម្រើសជាតិផ្នែកប្រដាល់សាកល ដែលមានឱកាសស្នងប្រដាល់ពីឪពុកដោយសារតែទេពកោសល្យ និងក្ដីស្រឡាញ់ ។ នាងធ្លាប់បង្ហាញមុខលើឆាកអន្តរជាតិជាច្រើនលើកមកហើយ ដោយមិនរាប់បញ្ចូលការហ្វឹកហាត់នៅក្រៅប្រទេសនោះផង ។ ប្រទេសដែលនាងធ្លាប់ទៅប្រកួតរួមមាន ចិន ថៃ ភូមា វៀតណាម និងមានសមត្ថភាពក្នុងការបង្វឹកផ្នែកប្រដាល់ និងផ្នែកល្បុក្កតោផងដែរ។ ជាមួយនឹងចំណូលប្រដាល់មិនសូវកាក់កប ទើបម្ដងម្កាលនាងតែងប្រកាសលាឈប់ ប៉ុន្តែបណ្ដាលមកពីនាងនៅសិក្សា មិនទាន់មានលទ្ធភាពរកការងារផ្សេងនៅឡើយ ទើបនាងនៅតែលឹបល ។
អេ យ៉ានុត បញ្ជាក់ថា ក្រោយពេលរៀបការ និងរៀនចប់វិទ្យាល័យ នាងនឹងពិចារណាបង្កើតមុខរបរមួយជំនួសឱ្យអាជីពនេះ ដោយសារតែទីផ្សារប្រដាល់នារីមិនអាចពឹងឱ្យបានកក់ក្ដៅ ។ នាងអាចនឹងគិតគូរមង្គលការនៅក្រោយបាក់ឌុបដែលអាចរង្វង់ឆ្នាំ២០២២ ឬមុនក្រោយនោះ ដោយមិនទាន់ច្បាស់លាស់នៅឡើយទេ ពោលគឺអាស្រ័យលើការបញ្ចប់នៃកូវីដ-១៩ បន្ទាប់ពីសម្រេចចិត្តភ្ជាប់ពាក្យជាមួយគូដណ្ដឹងឈ្មោះ លៀប ប៉ហេង កាលពីថ្ងៃទី៩ កក្កដា ឆ្នាំ២០២០ ។
នាងធ្លាប់ទាំងបានបញ្ជាក់ថា បើកុំតែមានឈ្មោះជាកីឡាការិនីជម្រើសជាតិ ហើយនៅស្ដាយកេរ្តិ៍ឈ្មោះ ប្រហែលជាបោះបង់យូរហើយ ដោយមិនអាចតស៊ូមកដល់ពេលនេះទេ បើតាមតែការប្រដាល់នារី មិនអាចរកចំណូលបានសមរម្យ ។ អេ យ៉ានុត នៅតែជាកីឡាការិនីជម្រើសជាតិ ដោយនាងត្រួវបានបញ្ជូនតំណាងប្រទេសជារឿយៗ បើទោះមិនទាន់បានមេដាយមាសពីអន្តរជាតិនៅឡើយក្ដី។
វី ស្រីខួច មកទល់ពេលនេះ ដ្បិតថានាងក៏ជាកីឡាការិនីជម្រើសជាតិមួយរូបដែរ តែនាងក៏បង្ហាញឆន្ទៈដដែលជាដដែលថា ចង់បោះបង់ទាំងស្រុង ព្រោះតែអាជីពនេះបានចំណូលតិចមែនទែន ។ ជាក់ស្ដែងនាងធ្លាប់ទាំងរត់ទៅធ្វើកម្មការិនីសំណង់ និងកម្មការិនីកាត់ដេរវិញម្ដងៗនោះផង ។ ប្រសិនបើកុំមានស្វាមីជាបង្អែក នាងប្រហែលជាត្រូវទទួលការងារមួយផ្សេង ហើយបោះបង់អាជីពប្រដាល់នេះ មិនខុសគ្នាពីកីឡាការិនីរួមជំនាន់ ដែលបាត់ស្រមោលអស់នោះទេ ។
នាងបានបញ្ជាក់ថា ដោយសារតែនាងមានស្វាមីទប់ និងអាចរកចំណូលពីការចេញប្រកួតក្រៅស្រុកបានម្ដងៗ ហើយមិនលំបាកក្នុងជីវភាពដូចមុន ទើបនាងតស៊ូត្រាំត្រែង ។ បន្ទាប់ពីនាងរៀបការ ហើយបង្កើតបានកូនប្រុសមួយទុកជាចំណងដៃ នាងហាក់សកម្មក្នុងអាជីពនេះបានល្អឡើងវិញ ។ នាង និងស្វាមី ត្រូវគេឃើញបង្ហោះពីភាពផ្អែមល្ហែម និង ពីជីវភាពសប្បាយរីករាយដោយមិនមែនបង្ហាញពីកង្វះខាតនៅក្នុងជីវភាពដូចអំឡុងពេលនៅលីវនោះផង ដោយមានស្វាមីលើកទឹកចិត្ត ទើបការបង្ហាញមុខក្នុងអាជីពប្រដាល់នៅរឹងមាំ។
អ្នកនាងថា ទោះជាអ្នកនាងមានប្ដី មានកូន តែអ្នកនាងមិនបោះបង់ការប្រដាល់នោះទេ ពោលគឺនឹងនៅតែប្រឹងហ្វឹកហាត់ និងប្រឹងប្រកួតក្នុងនាមជាកីឡាការិនីរហូតទាល់តែសមត្ថភាពប្រកួតលែងកើត ។ ប៉ុន្តែបើនិយាយពីចំណូលពីអាជីពនេះវិញ បើគ្មានស្វាមី និងកម្លាំងចិត្តពីស្វាមី និងមនុស្សជុំវិញខ្លួន គឺឈប់យូរហើយ។ យ៉ាងណាមិញនាងថា ខ្លួនក៏មិនអាចទទួលប្រកួតក្រៅប្រទេសញឹកពេកផងដែរ ជាពិសេសការប្រកួតប្រដាល់ដាក់ទ្រុង ដោយសារតែនាងក៏មិនចង់ចំណាយពេលហ្វឹកហាត់ច្រើន ហើយគ្មានពេលមើលកូន។
កីឡាការិនី វី ស្រីឆាយ ក៏មានស្វាមី និងមានកូនប្រុសមួយផងដែរ ដោយអ្នកនាងនៅតែសកម្មក្នុងការទទួលប្រកួត មិនថាឡើងប្រកួតសាកលតំណាងជាតិ និងប្រដាល់ដាក់ទ្រុងនោះទេ ដោយក្នុងពេលខ្លះ គេមិនដឹងថានាងមានស្វាមី និងមានកូនមួយក្នុងបន្ទុកនោះផង។ អ្នកនាងក៏មិនខុសពីអ្នកប្រដាល់នារីទូទៅនោះដែរ គឺប្រកាសថា ចំណូលពីការប្រដាល់មិនរស់ ដោយនាងបានទាំងអះអាងថា បើកុំតែបានមុខរបរកំប៉ិកកំប៉ុករបស់ប្ដី និងមុខរបរលក់អនឡាញខ្លះៗជួយទប់ ប្រាកដជាដាច់ពោះហើយបើពឹងតែលើការប្រដាល់ ។
ជាក់ស្ដែង ក្នុងរយៈពេលចុងក្រោយ នាងមានឱកាសឡើងប្រកួតបានតិចដងបំផុត ខណៈដែលការឡើងប្រកួតម្ដងៗ ក៏មានតែការប្រដាល់ដាក់ទ្រុង ដែលអាចរកចំណូលបានតែ១ពាន់ដុល្លារ តែចំណាយហ្វឹកហាត់ និងបំប៉នមុន និងក្រោយ ប្រកួត ក៏ស្ទើរមិនរួចដើម ។ នាងថា ការបន្តគឺដោយសារនៅមានឆន្ទៈស្រឡាញ់ច្រើនជាង តែបើឱ្យដើម្បីបានប្រាក់ចំណូលពីអាជីពនេះគ្មានទេ ។ នាងតែងបង្ហោះពីស្វាមី និងកូនប្រុស និងអះអាងថា ស្វាមីរបស់អ្នកនាងក្រៅពីមិនហាមឃាត់ឱ្យឈប់ប្រដាល់ គឺបានទាំងជំរុញនៅក្នុងវិស័យនេះផង ទើបអ្នកនាងសប្បាយចិត្តក្នុងការចេញប្រកួតគ្រប់លើក។
នៅ ស្រីពៅ ដែលជាកីឡាការិនីវ័យក្មេងក៏លើកឡើងដូចគ្នាថា អាជីពប្រដាល់បានតែល្អមើល តែបើល្បីទៅមានបាន គឺមិនអាចនោះទេ ។ នោះគឺដោយសារតែទីផ្សារប្រដាល់នារី មិនមានដូចមុននៅក្នុងស្រុក ហើយរំពឹងការប្រកួតក្រៅស្រុក គឺមួយឆ្នាំបានតែ២ដង ហើយទម្រាំតែដល់វេនម្ដងៗ គឺចង់ដាច់ពោះ។
នាងថា ការតស៊ូព្រោះតែចង់រក្សាកេរ្តិ៍ឈ្មោះប៉ុណ្ណោះ តែបើដើម្បីមានបានក៏អត់មានដែរ ។ នាងជាកីឡាការិនីល្បីក្នុងពិភពប្រដាល់សាកល និងប្រដាល់ដាក់ទ្រុង ត្រូវគេមើលឃើញថាលេចធ្លោជាងគេ ។ នាងបញ្ជាក់ថា ពួកនាងគឺជាកីឡាការិនីជម្រើសជាតិផង ចុះទម្រាំកីឡាការិនីផ្សេងទៀត គឺពិតជាគ្មានសកម្មភាពចេញប្រកួតក្រោយពេលហាត់ចេះ ទើបអ្នកចំណូលថ្មីនៅក្នុងអាជីពនេះ មានបែបកម្រ ។
យ៉ាងណាមិញ នាងក៏អះអាងដូចគ្នាថា នឹងមិនបោះបង់ការប្រដាល់នោះដែរ ដោយតែងចែកពេលវេលាទទួលប្រកួតក្រៅប្រទេស ក្នុងព្រឹត្តិការណ៍ប្រដាល់ដាក់ទ្រុងជារឿយៗ នៅមុនពេលកូវីដ-១៩ផ្ទុះឡើង បើទោះជានាងមានឱកាសធ្វើការងារផ្សេង ដើម្បីរកចំណូលឱ្យល្អជាងការប្រដាល់ក្ដី ។ នាងធ្លាប់បង្ហើបថា វិស័យប្រដាល់គឺជាអាយុជីវិត ហើយបើមានស្វាមី គឺទាល់តែគាំទ្រនាងឱ្យពេញទំហឹងទើបនាង និង ស្វាមីអាចក្លាយជាប្ដីប្រពន្ធនឹងគ្នាបាន៕
ចែករំលែកព័តមាននេះ