ខេត្តឧត្តរមានជ័យ ៖ កូនឈើប្រភេទដើមបេងចំនួន៧០០ដើម និងដើមក្ងោក២០០ដើម ត្រូវបានដាំពីជើងភ្នំដងរែកដល់ចង្កេះភ្នំ រូបសំណាកលោកយាយម៉ៅ និងចំណុចភ្នំ២០០ ស្ថិតនៅភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ព្រឹកថ្ងៃទី២២ សីហា ឆ្នាំ២០២០ ក្រោមអធិបតីភាពនាយឧត្តមសេនីយ៍ ណឹម សុវត្ថិ ទីប្រឹក្សាពិសេសសម្តេចពិជ័យសេនា ទៀ បាញ់ ឧបកនាយករដ្ឋមន្ដ្រីរដ្ឋមន្ត្រីក្រសួងការពារជាតិ និងជានាយក នាយក ដ្ឋាននយោបាយ និងកិច្ចការបរទេសនៃក្រសួងការពារ ជាតិ ដែលកម្លាំងចូលរួមដាំកូនឈើមកពីអង្គភាព កងការពារព្រំដែនលេខ៤០៣ កងការពារព្រំដែនលេខ៤០២ ផ្នែកសឹករងស្រុក អន្លង់វែង កងពលតូចថ្មើរជើងលេខ៤១ និងក្រុមការងារយុវជនបក្សស្រុកអន្លង់វែង។
លោក ហោជិន វីរៈយុទ្ធ អភិបាលស្រុកអន្លង់វែង បានមានប្រសាសន៍ថ្លែងអំណរ គុណដល់ស្ថាប័នដែលបានចូលរួមដាំកូនឈើជាប្រវត្តិសាស្ត្រ នៅលើតំបន់ប្រ វត្តិសាស្ត្រយោធាស្រុកអន្លង់វែង ដែលក្រសួងការពារ ជាតិ ក៏ដូចជាក្រុមការងារប្រវត្តិសាស្ត្រនៃប្រទេសយើង បានខិតខំយកចិត្តទុកដាក់ ដើម្បីឈានទៅដល់ការកំណត់តំបន់ ក្នុងការថែរក្សាអភិរក្ស និងការពារជាលក្ខណៈប្រវត្តិសាស្ត្រហើយសំរាប់ស្រុកអន្លង់វែងនឹងក្លាយជាគោលដៅមួយកំណត់ជាកន្លែងសាងសងវិមានឈ្នះឈ្នះ នៃយោធភូមិភាគ
ទី៤។
លោកអភិបាលក៏បានសំណូមពរដល់បងប្អូនប្រជាពលរដ្ឋដែលរស់នៅក្បែរទីតាំងដាំកូនឈើ និងនៅជិតតំបន់ប្រវត្តិសាស្ត្រយោធា ក៏ដុចជា អាជ្ញាធរ កងកម្លាំងប្រដាប់អាវុធ ចូលរួមថែរក្សាការពារ កុំអោយភ្លើងឆេះ និងការកាប់បំផ្លិចបំផ្លាញព្រៃឈើ ព្រោះកូនឈើទាំងនេះ ទៅថ្ងៃមុខនឹងបានជួយលំអរដល់តំបន់ប្រវត្តិសាស្ត្រយោធា បានទាក់ទាញដល់ភ្ញៀវទេសចរណ៍ជាតិ និងអន្តរជាតិមកទស្សនាកម្សាន្ត និងស្វែងយល់ពីស្ថានភាពនៃសង្គ្រាមនិវត្តន៍ចុងក្រោយរបស់ប្រទេសកម្ពុជានៅតំបន់អន្លង់វែង ៕
ចែករំលែកព័តមាននេះ