ខេត្តព្រះវិហារ ៖ កាលពីព្រឹកថ្ងៃទី២៤ ខែកញ្ញា ត្រូវនឹងថ្ងៃ១រោច ខែភទ្របទ លោក ស ថាវី អភិបាលរងខេត្ត ប្រចាំការទិសស្រុកជាំក្សាន្តបានមូលមតិគ្នាជាមួយពុទ្ធបរិស័ទរស់នៅក្បែរតំបន់ប្រាសាទព្រះវិហារ និងមានការចូលរួមពីអង្គភាពមួយចំនួនឈរជើងនៅក្នុងតំបន់ប្រាសាទព្រះវិហាររួមមានអាជ្ញាធរជាតិព្រះវិហារ បញ្ជាការដ្ឋានកងអង្គរក្ស ក្រុមការងារ ពិសេសថ្នាក់ជាតិ និងភូមិធម្មជាតិសម្តេចតេជោបានអញ្ជើញទៅកាន់បិណ្ឌវេនទី១នៅវត្តកែវសិក្ខាគិរីស្វារៈដោយនាំយកទេយ្យទាន មានថវិកា ទឹកបរិសុទ្ធ១៤កេស មី១២កេស ស្ករស១០គីឡូក្រាម អង្ករ២បាវ ទឹកក្រូច៧កេស នំអន្សម៦០០ ទឹកសីុអីុវ១ឡូ ទឹកត្រី២ឡូ បារីសេក៤សុង ប្រេងកូឡា១ឡូ កាហ្វេ១កញ្ចប់ធំ តែ៥កញ្ចប់ ប្រគេនថវិកាព្រះសង្ឃចៅអធិការវត្ត១៦ម៉ឺនរៀល ប្រគេនព្រះសង្ឃគង់ក្នុងវត្ត២១អង្គ ក្នុង១អង្គៗ បច្ច័យ៥ម៉ឺនរៀល តាជី យាយជី១៥នាក់ ក្នុងម្នាក់១ម៉ឺនរៀល និងប្រគេនវត្តជិត៣លានរៀល ។
ពិធីកាន់បិណ្ឌទី១នេះ ពុទ្ធបរិស័ទ ព្រមទាំងកងកំលាំងប្រដាប់អាវុធជាច្រើនដែលកំពុងឈរជើងនៅលើសមរភូមិទិសទី១ប្រាសាទព្រះវិហារបានចូលរួមក្នុងពិធីរាប់បាត្រ និងបរិច្ចាគធនធានតាមសទ្ធារៀងៗខ្លួនដើម្បីរំលឹកដល់បុព្វការីជនដែលបានចែកឋានទៅកាន់លោកខាងមុខ ។ បន្ទាប់ពីរាប់បាត្រ បង្សុកូល និងវេរប្រគេនទេយ្យវត្ថុ គ្រឿងបរិក្ខារ និងបច្ច័យទាំងអស់ជូនដល់ព្រះសង្ឃ តាជី យាយជី ដែលកំពុងគង់ចាំព្រះវស្សានៅក្នុងវត្តកែវសិក្ខាគិរីស្វារៈរួចមកលោក ស ថាវី អភិបាលរងខេត្តបានថ្លែងអំណរគុណដល់វត្តមានពុទ្ធបរិស័ទទាំងអស់រស់នៅក្បែរតំបន់ប្រាសាទព្រះវិហារដែលសុទ្ធសឹងជាពុទ្ធសាសនិកជនមានសទ្ធាជ្រះថ្លាបរិច្ចាគធនធានយកទៅប្រគេនព្រះសង្ឃ និងតាជី យាយជីដែលកំពុងគង់ចាំព្រះវស្សានៅក្នុងវត្តកែវសិក្ខាគិរីស្វារៈ ។
លោក ស ថាវី បានរៀបចំកម្មវិធីជាបន្តចាប់ពីកាន់បិណ្ឌ១រហូតដល់ភ្ជុំបិណ្ឌ គឺឱ្យប្រជាពលរដ្ឋ និងបណ្តាអង្គភាពកងកំលាំង និងស្ថាប័នរបស់អាជ្ញាធរជាតិព្រះវិហារ ដោយចែកវេនគ្នាជាបន្តបន្ទាប់ ដើម្បីញ៉ាំងឱ្យកម្មវិធីបុណ្យប្រពៃណីដ៏ធំរបស់ជាតិនេះកាន់តែអធិកអធមដើម្បីឧទ្ទិសកុសលផលបុណ្យដល់បុព្វការីជនគ្រប់ៗគ្នា ។ វត្តកែវសិក្ខាគិរីស្វារៈរបស់ខ្មែរដែលសង់ឡើងនៅលើកំពូលភ្នំដងរែកក្បែរបរិវេណប្រាសាទព្រះវិហាររបស់ខ្មែរនៅឆ្នាំនេះ បន្ទាប់ពី មានការស្ងប់ស្ងៀមអំពីស្ថានការណ៍យោធានៅ តំបន់នោះ គេសង្ឃឹមថា នឹងមានពុទ្ធបរិស័ទទៅពីគ្រប់ទីជិតឆ្ងាយចូលរួមក្នុងពិធីកាន់បិណ្ឌជាបន្តបន្ទាប់ ៕
ចែករំលែកព័តមាននេះ