ខេត្តព្រៃវែង ៖ បារាយណ៍អណ្តែត គឺជាទួលបុរាណមួយ ស្ថិតក្នុងសង្កាត់កំពង់លាវ ក្រុងព្រៃវែង បច្ចុប្បន្នមិនត្រឹមតែជាកន្លែងកម្សាន្តប៉ុណ្ណោះទេ តែបានក្លាយទៅជាទីតាំងមួយ សម្រាប់បន់ស្រន់
ខេត្តព្រៃវែង ៖ បារាយណ៍អណ្តែត គឺជាទួលបុរាណមួយ ស្ថិតក្នុងសង្កាត់កំពង់លាវ ក្រុងព្រៃវែង បច្ចុប្បន្នមិនត្រឹមតែជាកន្លែងកម្សាន្តប៉ុណ្ណោះទេ តែបានក្លាយទៅជាទីតាំងមួយ សម្រាប់បន់ស្រន់ និងធ្វើពិធីសាសនា ផ្សេងៗព្រោះអ្នកស្រុកជឿថា មានបារមីស័ក្តិសិទ្ធិ ហើយរាល់ការបន់ស្រន់តែងតែបានសម្រេចដូច បំណង ។
លោកអ៊ុន ហៃ ប្រធានមន្ទីរវប្បធម៌និងវិចិត្រសិល្បៈខេត្តព្រៃវែង ឲ្យដឹងកាលពីពេល ថ្មីៗនេះថា បច្ចុប្បន្នទួលបារាយណ៍អណ្តែតបានក្លាយទៅជាទួលដ៏ពេញនិយម និងមានអ្នកទេសចរទៅលេងកម្សាន្តរៀងរាល់ថ្ងៃ អ្នកខ្លះទៅស្រូបយកខ្យល់បរិសុទ្ធ ជាមួយនឹងការគយគន់ទេសភាពធម្មជាតិដ៏ត្រជាក់ភ្នែក និងខ្លះទៀតទៅបន់ស្រន់បារមីស័ក្តិសិទ្ធិឲ្យសម្រេចបំណងអ្វីមួយ ។
លោកហាស់ សារ៉េត អភិបាលខេត្តព្រៃវែងឲ្យដឹងថា ដោយមើលឃើញពីសក្តានុពលដ៏សំបូរបែបនៃទួលបុរាណមួយនោះ ទើបលោកដឹកនាំមន្ត្រីជំនាញពាក់ព័ន្ធក្នុងខេត្តត្រួតពិនិត្យ ដើម្បីរៀបចំផែនការកែលំអឲ្យក្លាយទៅជារមណីយដ្ឋានធម្មជាតិសម្រាប់ឲ្យអ្នកទេសចរជាតិ និងអន្តរជាតិទៅទស្សនាកម្សាន្ត ។
ដោយសារអ្នកស្រុកមានជំនឿទៅលើបារមីវត្ថុស័ក្តិសិទ្ធិនៅលើទួលបារាយណ៍អណ្តែត ដូច្នេះអាជ្ញាធរខេត្តបានរៀបចំឲ្យមានទីសក្ការបូជាមួយ ហើយនៅថ្ងៃទី១៧ កុម្ភៈ ខេត្តនឹងនាំយករូបសំណាកព្រះអង្គគោកធ្លក និងព្រះអង្គជេត្តពុទ្ធមហានាថ ចំនួន២ព្រះអង្គធ្វើពិធីអភិសេកតម្កល់ទុកនៅទីនោះសម្រាប់ឲ្យអ្នកស្រុកគោរពបូជា ។
ទួលបារាយណ៍ក្រៅពីមានអាស្រមជាច្រើនសម្រាប់ឲ្យអ្នកទេសចរជាតិ និងអន្តរជាតិ បន់ស្រន់ និងគោរពបូជា មានដើមឈើ កម្រៗជាច្រើនប្រភេទ ដែលបិទស្លាកឈ្មោះរួចជាស្រេចសម្រាប់ឲ្យអ្នកទស្សនាបានស្គាល់ ជាពិសេសនៅលើដើមឈើទាំងនោះមានហ្វូងសត្វស្វាជាច្រើនក្បាលសម្រាប់ឲ្យអ្នកទេសចរទស្សនា និងថតរូបកម្សាន្ត ៕
ចែករំលែកព័តមាននេះ