ខេត្តប៉ៃលិន ៖ បន្ទាប់ពីប្រជាពលរដ្ឋឮសម្លេងសត្វមាន់ចិញ្ចឹមរបស់ខ្លួន នៅក្នុងទ្រុងផ្អើលស្រែកយំទាំងយប់ ដោយស្មានតែចោរចូលចាប់លួចក៏នាំគ្នាបញ្ចាំងភ្លើងពិលមើាលលុះទៅដល់ជិតស្រាប់តែឃើញសត្វពស់ថ្លាន់ឈ្មោលដ៏ធំ១ក្បាល ទម្ងន់១៣គីឡូក្រាម ក៏ស្រែកប្រាប់ឱ្យអ្នកភូមិនាំគ្នាជួយចាប់តែម្តង ។ ហេតុការណ៍ពស់ថ្លាន់ឈ្មោល១ក្បាល ចូលចាប់មាន់ប្រជាពលរដ្ឋនេះបានកើតឡើង…
ខេត្តប៉ៃលិន ៖ បន្ទាប់ពីប្រជាពលរដ្ឋឮសម្លេងសត្វមាន់ចិញ្ចឹមរបស់ខ្លួន នៅក្នុងទ្រុងផ្អើលស្រែកយំទាំងយប់ ដោយស្មានតែចោរចូលចាប់លួចក៏នាំគ្នាបញ្ចាំងភ្លើងពិលមើាលលុះទៅដល់ជិតស្រាប់តែឃើញសត្វពស់ថ្លាន់ឈ្មោលដ៏ធំ១ក្បាល ទម្ងន់១៣គីឡូក្រាម ក៏ស្រែកប្រាប់ឱ្យអ្នកភូមិនាំគ្នាជួយចាប់តែម្តង ។
ហេតុការណ៍ពស់ថ្លាន់ឈ្មោល១ក្បាល ចូលចាប់មាន់ប្រជាពលរដ្ឋនេះបានកើតឡើង កាលពីវេលាម៉ោង៣និង៣០នាទីទាបភ្លឺ ថ្ងៃទី១៨ ខែសីហា ឆ្នាំ២០២០ ស្ថិតនៅក្នុងភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីប្រជាពលរដ្ឋម្នាក់ឈ្មោះ រ័ត្ន រ៉ាត់ ភេទស្រី អាយុ៤២ឆ្នាំ រស់នៅភូមិខាងលើ បានឱ្យដឹងថា នៅពេលយប់ថ្ងៃកើតហេតុ គាត់បានឮសម្លេងមាន់យំ និងផ្អើលពេញទ្រុងលុះនាំកូនចុះទៅបញ្ចាំងភ្លើងពិលមើល ស្រាប់តែប្រទះឃើញពស់ថ្លាន់ឈ្មោល១ក្បាល កំពុងរឹតមេមាន់របស់គាត់ចំនួន២ក្បាលបម្រុងនឹងលេបទើបគាត់ស្រែកប្រាប់អ្នកជិតខាងឱ្យចូលទៅចាប់តែម្តង ។
គាត់បន្តទៀតថា រាល់ដងគាត់តែងតែបាត់សត្វមាន់ក្នុងទ្រុងដែរ តែស្មានថា ជាចោរចូលលួច ព្រោះមានបាក់មែកឈើខាងក្រោយផ្ទះផងដែរ ។ គាត់បញ្ជាក់ថា សត្វពស់ថ្លាន់នេះពិតជាកាចខ្លាំងណាស់ គ្រាន់តែឃើញប្រជាពលរដ្ឋចូលទៅក្បែរវា គឺស្ទុះបម្រុងខាំតែម្តង ។
បើតាមលោក អៀវ រ៉ា ជានាយកតំបន់ប្រើប្រាស់ បានរៀបរាប់ ឱ្យដឹងថា លោកនឹងយកសត្វពស់១ក្បាលនេះ ទៅព្រលែងនៅក្នុងព្រៃភ្នំខៀវ ដើម្បីទុកអភិរក្សបន្តទៀត ។ លោកបន្តទៀតថា កាលពីប៉ុន្មានខែមុនលោកក៏ធ្លាប់ព្រលែងសត្វពស់៤ក្បាលរួចមកហើយ ។
លោកបញ្ជាក់ថា សត្វពស់ថ្លាន់ឈ្មោល១ក្បាលនេះ ជាពស់ប្រភេទពណ៌ក្រហម ជាសត្វពស់ដែលកាចជាងសត្វពស់ថ្លាន់ដទៃទៀត បើមិនប្រយ័ត្នអាចនឹងខាំ តែវាគ្មានពិសនោះទេ ។ លើសពីនេះបើសិនជាចង់ចាប់ពស់ថ្លាន់ទាំងនេះ ត្រូវប្រយ័ត្នផងដែរ ក្រែងមានគ្រោះថ្នាក់កើតឡើង ។ លោកបញ្ជាក់ថា ដោយសារតែអស់ព្រៃឈើបណ្តើរៗទើបសត្វទាំងនេះវារចេញមកតាមអូរ ក្បែរៗផ្ទះប្រជាពលរដ្ឋ លុះមានឱកាសក៏ចាប់មាន់ស៊ីតែម្តង ៕
ចែករំលែកព័តមាននេះ