ខេត្តសៀមរាប ៖ មន្ត្រីបម្រើការងារនៅក្រសួងសាធារណការ និងដឹកជញ្ជូនម្នាក់បានសាងសង់សំណង់អគារដ៏ស្កឹមស្កៃមួយនៅតំបន់ឧទ្យានអង្គរនោះ ពេលនេះត្រូវបានវាយកម្ទេចចោលទៅវិញ។ ទីតាំងសំណង់ដ៏ធំនេះ ត្រូវបានគេអះអាងថា បានសាងសង់ជាយូរណាស់មកហើយ ស្ថិតក្នុងភូមិគោកដូង សង្កាត់ស្រង៉ែ…
ខេត្តសៀមរាប ៖ មន្ត្រីបម្រើការងារនៅក្រសួងសាធារណការ និងដឹកជញ្ជូនម្នាក់បានសាងសង់សំណង់អគារដ៏ស្កឹមស្កៃមួយនៅតំបន់ឧទ្យានអង្គរនោះ ពេលនេះត្រូវបានវាយកម្ទេចចោលទៅវិញ។ ទីតាំងសំណង់ដ៏ធំនេះ ត្រូវបានគេអះអាងថា បានសាងសង់ជាយូរណាស់មកហើយ ស្ថិតក្នុងភូមិគោកដូង សង្កាត់ស្រង៉ែ ក្រុងសៀមរាប ហើយត្រូវបានគេប៉ាន់ប្រមាណថា មានទំហំ៣០ម៉ែត្រគុណ១០០ម៉ែត្រ និងមានតម្លៃប្រមាណជាង២លានដុល្លាអាមេរិកឯណោះ។
តាមប្រភពពីមន្ត្រីអាជ្ញាធរអប្សរា បានឱ្យដឹងនៅថ្ងៃទី១៦ ខែសីហា ឆ្នាំ២០២០នេះថា សំណង់ដ៏ធំរបស់មន្ត្រីជាន់ខ្ពស់មួយរូបនៅក្រសួងសាធារណការ និងដឹកជញ្ជូនត្រូវបានខាងអាជ្ញាធរអប្សរាឱ្យរុះរើទាំងបង្ខំតាមការកំណត់របស់អាជ្ញាធរជាតិអប្សរា។
ប្រភពបានឱ្យដឹងថា ដើមចមដែលនាំឱ្យមានសំណង់ធំត្រូវរុះរើនេះ គឺដំបូងឡើយ គេបានយក ឈ្មោះក្រសួងសាធារណការ និងដឹកជញ្ជូន មកសុំការសាងសង់ជារោងសម្រាប់ដាក់សម្ភារបម្រើការជួសជុលផ្លូវជាតិលេខ៦ ប៉ុន្តែបន្ទាប់ពីបានការអនុញ្ញាតហើយស្រាប់តែម្ចាស់ទីតាំងបានលួចសាងសង់សំណង់ដ៏ធំស្កឹមស្កៃខុសពីការស្នើសុំ ហើយក៏ត្រូវបានរុះរើដោយខ្លួនឯងវិញ ក្រោយពីអាជ្ញាធរជាតិអប្សរា បានបញ្ជាក់ថា ពុំសាងសង់តាមការអនុញ្ញាតរបស់អាជា្ញធរជាតិអប្សរាឡើយ។
ប្រភពដដែលបានបន្ថែមថា បន្ទាប់ពីមានការចាត់វិធានការនេះរួចមក ម្ចាស់សំណង់ក៏បាន សម្រេចចិត្តទាំងបង្ខំសុំធ្វើការរុះរើសំណង់នេះដោយខ្លួនឯង ដោយបានចំណាយពេលជា ច្រើនថ្ងៃ ទើបការរុះរើសំណង់នេះបានចប់ជាស្ថាពរនារសៀលថ្ងៃទី១៤ ខែសីហា ឆ្នាំ២០២០។
បើតាមពលរដ្ឋជាច្រើនបានលើកឡើងថា ការសាងសង់សំណង់នៅក្នុងតំបន់ឧទ្យានអង្គរគ្រប់គ្រងដោយអាជ្ញាធរជាតិអប្សរា មានកម្លាំងការពារយ៉ាងរឹងតឹងពីសំណាក់មន្ត្រីអាជ្ញាធរជាតិអប្សរា សូម្បីតែប្រជាពលរដ្ឋជួសជុលលំនៅដ្ឋានបន្តិចបន្តួច ក៏ត្រូវបានកម្លាំងរបស់អាជ្ញាធរជាតិអប្សរាចុះទៅដល់ភ្លាមៗ និងវាយកម្ទេចចោល ដោយគ្មានការយោគយល់ឡើយ។
ពលរដ្ឋបានលើកឡើងបន្ថែមថា បើទោះបីជានៅក្នុងតំបន់គ្រប់គ្រងដោយអាជ្ញាធរជាតិអប្សរាបានហាមឃាត់មិនឱ្យមានការសាងសង់សំណង់យ៉ាងណាក៏ដោយ ក៏ប៉ុន្តែគេសង្កេតឃើញនៅក្នុងតំបន់រមណីយដ្ឋានឧទ្យានអង្គរ មានផ្ទះសាងសង់ធំៗជាច្រើនផងដែរ មិនដឹងថា មានលិខិតអនុញ្ញាតឬយ៉ាងណានោះទេ?
ចែករំលែកព័តមាននេះ