រាជធានីភ្នំពេញ ៖ ជនជាតិណេប៉ាល់ចំនួន២៧នាក់ ដែលលើកគ្នាទៅតវ៉ានៅផ្ទះមេការ សំណង់ ដែលជាជនជាតិណេប៉ាល់ដូចគ្នា និងជាមេខ្យល់នាំមកធ្វើការ ត្រូវបានអាជ្ញាធរ សមត្ថកិច្ចខណ្ឌសែនសុខ រួមជាមួយមន្ត្រីស្ថានទូតជួបដោះស្រាយហើយ…
រាជធានីភ្នំពេញ ៖ ជនជាតិណេប៉ាល់ចំនួន២៧នាក់ ដែលលើកគ្នាទៅតវ៉ានៅផ្ទះមេការ សំណង់ ដែលជាជនជាតិណេប៉ាល់ដូចគ្នា និងជាមេខ្យល់នាំមកធ្វើការ ត្រូវបានអាជ្ញាធរ សមត្ថកិច្ចខណ្ឌសែនសុខ រួមជាមួយមន្ត្រីស្ថានទូតជួបដោះស្រាយហើយ ដោយមេការបានយល់ព្រមបើកប្រាក់ និងចេញថ្លៃសំបុត្រយន្តហោះជួនពលករត្រឡប់ទៅស្រុកវិញ។
ការជួបដោះស្រាយខាងលើនេះបានធ្វើឡើងនាព្រឹកថ្ងៃទី ១៦ខែ សីហា ឆ្នាំ ២០២០នៅភូមិដីថ្មី ផ្លូវបេតុង សង្កាត់គោគឃ្លាង ខណ្ឌសែនសុខ រាជធានីភ្នំពេញ។
គួររំលឹកថា ពលករជាជនជាតិណេប៉ាល់ចំនួន ២៧នាក់ ក្នុងនោះមានប្រុសចំនួន២៥នាក់ ស្រីចំនួន២នាក់ បានធ្វើការតវ៉ា ដោយនាំគ្នាមកឈរនៅមុខផ្ទះមេការជនជាតិណេប៉ាលដូចគ្នាកាលពីវេលាម៉ោងប្រមាណ១១យប់ថ្ងៃទី១៥ ខែសីហា ដើម្បីទាមទារប្រាក់ខែ។
តាមប្រភពព័ត៌មានអោយដឹងទៀតថា ក្រុមជនបរទេសខាងលើជាពលករមកពីប្រទេសណេប៉ាល មកបំរើការនៅកម្ពុជាក្នុងការដ្ឋានសំណង់មួយ ។ នៅមុនពេលនាំមកធ្វើការ មេការជាជនជាតិណេប៉ាល់ដូចគ្នាបានអោយបង់ប្រាក់ចំនួន៥០០០ដុល្លារអាមេរិក បន្ទាប់ពីមកដល់កម្ពុជា មេកានោះបានដកយកលិខិតឆ្លងដែនរបស់ពួកគេទាំងអស់។
តាមប្រភពព័ត៌មានបានឱ្យដឹងបន្តទៀតថា នៅពេលធ្វើការអស់រយៈពេល៧ខែមកហើយនោះ ស្រាប់តែមេការនោះមិនបានបើកប្រាក់ខែអោយពួគាត់ ទើបពួកគាត់មកឈរតវ៉ានៅមុខផ្ទះដែលមេការជួលស្នាក់នៅតែម្តង។ បន្ទាប់ពីធ្វើការតវ៉ា ទើបនៅព្រឹកថ្ងៃទី១៦ ខែ សីហា ឆ្នាំ២០២០ តំណាងស្ថានទូតណេប៉ាល់ រួមជាមួយរដ្ឋបាលខណ្ឌសែនសុខ និងសមត្ថកិច្ចមូលដ្ឋានបានជួបសម្របសម្រួល ហើយមេការក៍បានយល់ព្រមតាមការទាមទាររបស់ពលករចំនួន៣ចំណុចរួមមាន ៖
១-ចេញថ្លៃសំបុត្រយន្តហោះអោយពលករត្រឡប់ទៅប្រទេសណេប៉ាល់វិញ, ២-ចេញថ្លៃបន្តទិដ្ឋាការដល់កម្មករដែលហួសសុពលភាព, ៣-យល់ព្រមបើកប្រាក់ខែអោយពលករទាំងអស់។ ដោយសារបញ្ហាផ្ទុះជំងឺកូវីដ-19 ជើងហោះហើរត្រូវបិទ ដូចច្នេះសម្រាប់ថ្លៃស្នាក់នៅបណ្តោះអាសន្ន និងអាហាររបស់ពលករនៅកម្ពុជាគឺភាគីមេការជាអ្នកទទួលខុសត្រូវ។
នៅក្នុងការពិភាក្សាររកដំណោះស្រាយនោះ ក្នុងករណីដែលភាគីមេការមិនអនុវត្តន៍ ឬគេចវេសមិនអនុវត្តន៍គឺស្ថានទូតណេប៉ាល់ជាអ្នកទទួលខុសត្រូវ៕ (កែសម្រួលដោយ ៖ ធិតា)
ចែករំលែកព័តមាននេះ