ខេត្តបន្ទាយមានជ័យ បុរសម្នាក់ធ្វើកម្មករសំណង់មិនសូវកាក់កប ក៏បែកគំនិតប្រព្រឹត្តអំពើជួញដូរថ្នាំញៀន តែត្រូវបានកម្លាំងនគរបាលក្រុងប៉ោយប៉ែត ធ្វើការឃាត់ខ្លួន រួមទាំងវត្ថុតាងមាន ម្ស៉ៅក្រាមពណ៌សថ្លាចំនួន៤កញ្ចប់តូច និងប្រភេទគ្រាប់មានអក្សរ WY ពណ៌ក្រហមចំនួ១១គ្រាប់ ដែកកេះចំនួន៣ ព្រមទាំងថង់សម្រាប់ច្រកគ្រឿងញៀនមួយចំនួនទៀតផង។
ជនសង្ស័យមានឈ្មោះ លួត ធឿន ភេទប្រុស អាយុ១៦ឆ្នាំ មុខរបកម្មករ ស្នាក់នៅផ្ទះសំណាក់៩៩ បន្ទប់លេខ១០៥ ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
អធិការនគរបាលក្រុងប៉ោយប៉ែតលោកវរសេនីយ៍ឯក ធិន ស៊ិនដេត បានបញ្ជាក់ឲ្យដឹងទៀតថា មុនពេលការបង្ក្រាបបាននោះ នគរបាលចុះល្បាតនៅផ្សារយួន ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ក៏បានប្រទះឃើញជនសង្ស័យម្នាក់ ដែលពេលឃើញសមត្ថកិច្ចព្យាយាមរត់គេចខ្លួន ដោយមានការសង្ស័យ កម្លាំងនគរបាលក៏ដេញតាមចាប់ខ្លួនបាននៅវេលាម៉ោង១១យប់ ថ្ងៃទី១៣ ខែ សីហា ឆ្នាំ ២០២០។
លោកអធិការបានឲ្យដឹងបន្តទៀតថា ក្រោយពេលពីឃាត់ខ្លួន និងឆែកឆេរ ស្រាប់តែរកឃើញវត្ថុតាងក្នុងខ្លួនមួយចំនួន ទើបកម្លាំងជំនាញបាននាំមកសាកសួរ និងកសាងសំណុំរឿងបញ្ជូនទៅការិយាល័យជំនាញប្រឆាំងគ្រឿងញៀននៃស្នងការដ្ឋានខេត្ត ដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ