ខេត្តសៀមរាប ៖ លោក លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្ត សៀមរាបបានមានប្រសាសន៍យ៉ាងដូច្នេះ ក្នុងពិធីបើក និងបិទវគ្គបណ្តុះបណ្តាល ការសរសេរព័ត៌មានបែបសន្តិភាពនៅសាលប្រជុំនៃមន្ទីរព័ត៌មានខេត្តសៀមរាបធ្វើឡើងរយៈពេលពេញ១ ថ្ងៃ នាថ្ងៃទី១៤ ខែ សីហា ឆ្នាំ២០២០ ។
លោកបានអះអាងថា ការសរសេរព័ត៌មានបែបសន្តិភាព គឺជាការលាតត្រដាងនូវការពិត និង ការពង្រឹងវប្បធម៌អហិង្សាលើវិស័យព័ត៌មាន ខណៈបច្ចេកវិទ្យាកាន់តែទំនើបការចេញផ្សាយព័ត៌មានក៏មានភាពរហ័ស ជាពិសេសបានជួយឱ្យអ្នកសារព័ត៌មាន កំណត់បាននូវប្រភេទនៃព័ត៌មាន សិក្សាពីកត្តាប្រឈមរបស់អ្នកសារ ព័ត៌មាន និងតម្រូវការអតិភាពសំខាន់ៗ បានយល់ដឹងអំពីឧបករណ៍មិនបង្កទំនាស់ រួមទាំងជួយអភិវឌ្ឍ និងពង្រឹងសមត្ថភាព ស្តីពីការកសាងសន្តិភាព និងបំប្លែងទំនាស់ ដោយផ្អែកលើការវិភាគរឿងរ៉ាវនាពេលបច្ចុប្បន្ន ដើម្បីកំណត់យកនូវយុទ្ធសាស្ត្រសមស្របក្នុងពេលបច្ចុប្បន្ន ដែលចូលរួមចំណែកក្នុងដំណើរឆ្ពោះទៅរកសន្តិភាព ជៀសវាងបង្កផលប៉ះពាល់ និងបង្កជាទំនាស់ក្រោយពេលចុះផ្សាយ ។
លោក លីវ សុខុន បានឱ្យដឹងទៀតថា កន្លងមកមន្ទីរព័ត៌មានខេត្តសៀមរាប បានបំពេញតួនាទីយ៉ាងខ្ជាប់ខ្ជួន ហើយសម្រេចលទ្ធផលបានយ៉ាងល្អប្រសើរ ទៅតាមគោលការណ៍ និងផែនការណែនាំរបស់ក្រសួង និងអាជ្ញាធរខេត្តក្នុងកិច្ច សហការ សម្របសម្រួលជាមួយអ្នកសារព័ត៌មានជាតិ និងអន្តរជាតិសម្របសម្រួលដល់អ្នកសារព័ត៌មានក្នុងខេត្តទាំងអស់ ក្នុងការមកចុះបញ្ជីនៅមន្ទីរ ដើម្បីងាយស្រួលទំនាក់ទំនងការងារ ផ្តល់ព័ត៌មានឲ្យគ្នាទៅវិញទៅមក និងរៀបចំប្រជុំ សិក្ខាសាលាដោយប្រមូលអ្នក សារព័ត៌មានក្នុងខេត្តទាំងអស់ ដើម្បីផ្សព្វផ្សាយអំពីតួនាទីភារកិច្ច និងច្បាប់នានាពាក់ព័ន្ធនឹងការធ្វើប្រតិបត្តិការរបស់អ្នកអ្នកសារព័ត៌មាន ។ល។
ដូច្នេះតាមរយៈនេះ សូមឱ្យអ្នកសារព័ត៌មានទាំងអស់គោរពឱ្យបានខ្ជាប់ខ្ជួនតាមច្បាប់ និងក្រមសីល ធម៌វិជ្ជាជីវៈអ្នកសារព័ត៌មាន កាន់ឯករាជ្យផ្សាយព័ត៌មានដែលមានប្រភពច្បាស់លាស់ និងមានតម្លាភាព និងព្យាយាមអភិវឌ្ឍន៍សមត្ថភាពស្រប តាមការវិវត្តថ្មីៗនៃបច្ចេកវិទ្យា ។
គួររំលឹកថា ក្រោមកិច្ច សហការជាមួយមន្ទីរព័ត៌មានខេត្តសៀមរាប អង្គការក្រុមការងារ ដើម្បីដោះស្រាយទំនាស់ ដែលហៅកាត់ថា ACT បានបើកវគ្គបណ្តុះបណ្តាលមួយមានរយៈ ពេលមួយថ្ងៃ ស្ថីពីការសរសេរព័ត៌មានបែបសន្តិភាពជូនដល់អ្នកសារព័ត៌មាននៅក្នុងខេត្តសៀមរាប ដោយមានការគាំទ្រពីរដ្ឋបាលខេត្តសៀមរាប ។
បើតាមប្រសាសន៍របស់កញ្ញា ស្រី សុធាវី នាយិកាអង្គការ ACT បានឱ្យដឹងថា ACT គឺជាអង្គការមិនមែនរដ្ឋាភិបាលក្នុងស្រុកដែលមិនរកប្រាក់កម្រៃ មិនមាននិន្នាការនយោបាយ ឬចរិតសាសនាណា មួយឡើដែលបង្កើតឡើងដោយបុគ្គលដែលមានឆន្ទៈក្នុងការធ្វើការងារជាមួយ គ្នាដើម្បីផ្តល់ជំនាញនិងចំណេះដឹង.ក្នុងវិស័យនៃការដោះស្រាយទំនាស់ ការបំប្លែងទំនាស់ និងការកសាងសន្តិភាពផ្តោតជាសំខាន់លើការកសាង និងការពង្រឹងសមត្ថ ភាពផ្នែកសន្តិភាព ដោយយកការវិភាគស្ថានភាពនាពេលបច្ចុប្បន្ន ក្នុងការស្វែងរកសកម្ម ភាពជាយុទ្ធសាស្ត្រ ដើម្បីឆ្លើយតបនឹងបញ្ហាទំនាស់ បង្កើនផលសម្រេចបានដល់កម្រិតអតិបរមាឆ្ពោះទៅរកសន្តិភាពនិងការអភិវឌ្ឍចីរភាព ៕
ចែករំលែកព័តមាននេះ