ខេត្តកំពង់ឆ្នាំង ៖ លោកឧត្តមសេនីយ៍ទោ ខូវ លី ស្នងការនគរបាលខេត្តមានប្រសាសន៍ថា រវាងអ្នកសារព័ត៌មាន និងកងកម្លាំងនគរបាល ត្រូវរួមគ្នាជួយដល់សង្គមជាតិ ព្រោះថាអង្គភាពទាំងពីរនេះ ក៏ជាសេនាធិការរបស់រាជរដ្ឋាភិបាលផងដែរ ។
មានប្រសាសន៍បែបនេះនៅក្នុងពិធីសំណេះសំណាលរវាងស្នងការនគរបាលខេត្ត និងអ្នកសារព័ត៌មានក្នុងខេត្តកំពង់ឆ្នាំងជាង៣០រូបកាលពីរសៀលថ្ងៃទី១១ ខែសីហា ឆ្នាំ២០២០ ។
លោកឧត្តមសេនីយ៍ទោ ស្នងការនគរបាលខេត្តបានបន្តថា ការជួបជុំអ្នកកាសែតនៅពេលនេះគឺចង់ បង្កើតឲ្យមានភាពស្និទ្ធស្នាលរវាងអ្នកសារព័ត៌មានជាមួយកងកម្លាំងនគរបាល ក្នុងការរួមគ្នាទប់ស្កាត់នូវបទល្មើសនានា មានដូចជា ការចរាចរណ៍គ្រឿងញៀន និងបទល្មើសផ្សេងៗ និងជឿជាក់ការផ្សព្វផ្សាយរបស់បងប្អូនជាអ្នកសារព័ត៌មាន ដើម្បីជួយដល់សង្គមជាតិ ។
លោកស្នងការនគរបាលខេត្តកំពង់ឆ្នាំង ក៏បានលើកសរសើរ រយៈការកន្លងមក អ្នកសារព័ត៌មានខេត្តកំពង់ឆ្នាំង ក៏បានជួយប្រឹងប្រែងធ្វើការផ្សព្វផ្សាយនូវស្នាដៃ របស់កងកម្លាំងនគរបាលខេត្តកំពង់ឆ្នាំង ដែលបានអនុវត្តច្បាប់កន្លងមក ។
លោកស្នងការក៏បានសំណូមពរដល់អ្នកសារព័ត៌មានសូមសរសេរដោយវិជ្ជាជីវៈក្រមសីលធម៌និងមានកិត្តិយសផងដែរ ។
ជាមួយនេះគ្នានេះដែរលោក ហីង ចូច អនុប្រធានមន្ទីរព័ត៌មានខេត្ត ក៏បានសំណូមពរដល់ក្រុមអ្នកសារព័ត៌មានទាំងអស់ត្រូវមានភាពសាមគ្គីគ្នា កុំគិតថាសារព័ត៌មានតូចឬធំ នឹងត្រូវសរសេរប្រកបដោយវិជ្ជាជីវៈក្រមសីលធម៌ ទើបយើងមិនប្រឈមចំពោះមុខច្បាប។
សម្រាប់ មន្ទីរព័ត៌មានខេត្តកំពង់ឆ្នាំង ក៏ចង់ឃើញអ្នកសារព័ត៌មានចេះសាមគ្គីគ្នាទៅវិញទៅមកដើម្បីពីគ្រោះយោបល់ព្រោះថាបើយើងនៅឯកឯង អាចនឹងមានគ្រោះថ្នាក់ដោយគ្មានការពិភាក្សាគ្នា រកចំណុចខ្សោយនិងចំណុចខ្លាំងនោះឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ