រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា សមត្ថកិច្ចជំនាញគ្រឿងញៀនរួមសហការគ្នាជាមួយនឹងកម្លាំងជំនាញព្រហ្មទណ្ឌខណ្ឌសែនសុខ បានធ្វើការឆ្មក់ចូលទៅបង្ក្រាប និងឃាត់ខ្លួនជនសង្ស័យលេងថ្នាំក្រវីចំនួន9នាក់ក្នុងបន្ទប់ជួល ក្នុងនោះប្រុស៤នាក់ និងស្រី5នាក់យកទៅសួរនាំនៅអធិការដ្ឋាននគរបាលខណ្ឌសែនសុខ កាលពីម៉ោង2និង30នាទីរំលងអធ្រាត្រឈានចូលថ្ងៃទី14 ខែសីហា ឆ្នាំ2020 តាមបណ្តោយផ្លូវ1974 កែងផ្លូវ1003 នៅចំណុចបន្ទប់ជួលលេខ22 ជាន់ទី២ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
តាមប្រភពពីសមត្ថកិច្ចជំនាញគ្រឿងញៀនសហការគ្នាជាមួយនឹងជំនាញព្រហ្មទណ្ឌខណ្ឌសែនសុខបានឱ្យដឹងថា មុនពេលកើតហេតុ ដោយមានការចង្អុលបង្ហាញផ្ទាល់ពីលោកអធិការនគរបាលខណ្ឌសែនសុខ បានដាក់បទបញ្ជាយ៉ាងម៉ឺងម៉ាត់ឱ្យលោកអធិការទទួលផែនព្រហ្មទណ្ឌ និងគ្រឿងញៀនស្រាវជ្រាវ រហូតធ្វើការបង្ក្រាប និងឃាត់ខ្លួនជនសង្ស័យទាំងប្រុស ទាំងស្រីដែលកំពុងតែអង្គុយលេងថ្នាំក្រវីនៅក្នុងបន្ទប់ជួលជាន់ទី2 បន្ទប់លេខ22។
សមត្ថកិច្ចបន្តថា ក្នុងប្រតិបត្តិការខាងលើនេះ បានធ្វើការឃាត់ខ្លួនជនសង្ស័យទាំងអស់សរុប9នាក់ ក្នុងនោះមានស្រីចំនួន5នាក់ និងប្រុសចំនួន4នាក់ រួមទាំងដកហូតបានថ្នាំញៀនចំនួន2កញ្ចប់ធំល្មម និងថ្នាំគ្រាប់ចំនួនកន្លះគ្រាប់ ភ្លើងក្រវីមួយ រួមនឹងធុងប៉ាស់ម៉ាកJBL ចំនួនមួយទៀតផង ។
ក្រោយពេលកើតហេតុ ជនសង្ស័យប្រុសស្រីទាំង9នាក់ខាងលើ រួមនឹងវត្ថុតាងថ្នាំក្រវី ត្រូវបានសមត្ថកិច្ចជំនាញកសាងសំណុំរឿងបញ្ជូនខ្លួនទៅកាន់តុលាការ ដើម្បីចាត់ការតាមនីតិវិធី ៕
ចែករំលែកព័តមាននេះ