ព័រទុយហ្គាល់ ៖ ក្រុម RB Leipzig បានបន្តឡើងទៅវគ្គពាក់កណ្តាលផ្តាច់ព្រ័ត្រជាលើកដំបូងក្នុងប្រវត្តិសាស្ត្រ បន្ទាប់ពីក្លិបនេះ បានបង្កើតឡើងអស់រយៈពេល១១ឆ្នាំ ក្រោយយកឈ្នះដោយលទ្ធផល ២-១…
ព័រទុយហ្គាល់ ៖ ក្រុម RB Leipzig បានបន្តឡើងទៅវគ្គពាក់កណ្តាលផ្តាច់ព្រ័ត្រជាលើកដំបូងក្នុងប្រវត្តិសាស្ត្រ បន្ទាប់ពីក្លិបនេះ បានបង្កើតឡើងអស់រយៈពេល១១ឆ្នាំ ក្រោយយកឈ្នះដោយលទ្ធផល ២-១ លើក្រុមសិស្សច្បង Atletico Madrid។
ការប្រកួតធ្វើឡើងនៅទឹកដីកណ្តាលក្នុងកីឡដ្ឋាន José Alvalade ដែលមានមូលដ្ឋានក្នុងទីក្រុងលីសបោន ប្រទេសព័រទុយហ្គាល់។ Leipzig បានបើកការនាំមុខមុននៅនាទី៥១ ដែលជាការសម្រេចបានដោយខ្សែបម្រើប្រយុទ្ធ Dani Olmo មុនពេលខ្សែប្រយុទ្ធវ័យក្មេង João Félix តាមស្មើឱ្យ Atletico ដោយបានប៉េណាល់ទីនៅនាទី៧១។ ការប្រកួតជិតបញ្ចប់ទៅហើយ ខ្សែបម្រើ Tyler Adams ក៏បន្ថែមមួយគ្រាប់ទៀត ដែលជាគ្រាប់ជ័យជម្នះសម្រាប់ Leipzig នៅក្នុងនាទី៨៨។
គូសបញ្ជាក់ថា Leipzig ដែលជាក្រុមបង្កើតឡើងកាលពីឆ្នាំ២០០៩ នឹងត្រូវឡើងទៅប៉ះក្រុមអ្នកមានបារាំង PSG នៅវគ្គពាក់កណ្តាលផ្តាច់ព្រ័ត្រ ដោយជំនួបនេះនឹងត្រូវធ្វើឡើងក្នុងក្នុងកីឡដ្ឋាន da Luz នាថ្ងៃទី១៨ ខែសីហាខាងមុខ៕
ចែករំលែកព័តមាននេះ