ខេត្តបាត់ដំបង ៖ ចោរដ៏សកម្មដែលតែងដើរគាស់ទម្លុះទម្លាយលំនៅឋានលួចទ្រព្យសម្បត្តិរបស់ប្រជាពលរដ្ឋឡើងកក្រើកនៅក្នុងឃុំស្នឹង ស្រុកបាណន់ មួយរយៈចុងក្រោយនោះ ពេលនេះត្រូវកម្លាំងការិយាល័យព្រហ្មទណ្ឌកំរិតធ្ងន់នៃស្នងការខេត្ត ធ្វើការស្រាវជ្រាវឃាត់ខ្លួនជនដៃដល់បានម្នាក់ហើយ កាលពីវេលាម៉ោង៩និង២០នាទីព្រឹកថ្ងៃទី១៣ សីហា នៅចំណុចភូមិសំរោង ឃុំស្នឹង ស្រុកបាណន់ ហើយថែមទាំងដកហូតបាននូវវត្ថុតាងមួយចំនួនផង។
នាយការិយាល័យព្រហ្មទណ្ឌកំរិតធ្ងន់ លោក អូន ហ្វៃ ដែលដឹកនាំកិច្ចប្រតិបត្តិការនេះផ្ទាល់បានឲ្យដឹងថា ជនសង្ស័យដែលត្រូវឃាត់ខ្លួនឈ្មោះ ទុំ ដេត ហៅចាក់ដេត ភេទប្រុស អាយុ៣២ឆ្នាំ រស់នៅភូមិ-ឃុំខាងលើ។ លោកថា ជននេះត្រូវបានសង្ស័យថា បានធ្វើសកម្មភាពគាស់ផ្ទះប្រជាពលរដ្ឋម្នាក់ឈ្មោះ ផ្លោក អៀវសេង ភេទប្រុស អាយុ៤២ឆ្នាំ នៅភូមិគរ ឃុំស្នឹង ស្រុកបាណន់ ដែលគេសង្ស័យថា អាចកើតឡើងនៅចន្លោះពីម៉ោង៣និង៤៥នាទីរសៀល ដល់ម៉ោង០៩ និង៤៥នាទីយប់ថ្ងៃទី១០ សីហា ស្របពេលដែលម្ចាស់មិនបាននៅផ្ទះ។
ជនដៃដល់បានលួចយកប្រាក់អស់ជាច្រើនលានរៀល តែក្រោយកើតហេតុ មន្ត្រីការិយាល័យជំនាញ បានធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យរូបនេះតែម្ដង ថែមទាំងដកហូតបានវត្ថុតាងមួយចំនួនផង។ ជនរងគ្រោះ លោក ផ្លោក អៀវសេង បានប្រាប់កោះសន្តិភាព នៅព្រឹកថ្ងៃទី១៣ សីហា ថា នៅថ្ងៃកើតហេតុនោះ នៅពេលរសៀល ក្រុមគ្រួសារលោកបានបិទទ្វារផ្ទះ រួចនាំគ្នាទៅចូលរួមកម្មវិធីផ្ទះបងប្អូននៅភូមិបឹងក្រសាល ឃុំស្នឹង រហូតដល់យប់ជ្រៅបន្តិចក៏នាំគ្នាត្រឡប់មកវិញ ស្រាប់តែត្រូវចោរគាស់ទ្វារផ្ទះចូលលួចប្រាក់អស់គ្មានសល់។
ជនរងគ្រោះបានបញ្ជាក់ថា ជនដៃដល់បានលូកដៃទាញគន្លឹះទ្វារខាងក្រោយ រួចចូលរើកកាយយកប្រាក់អស់គ្មានសល់ ដែលគាត់ទុកនៅក្រោមពូក។ ចំនួនទឹកប្រាក់ដែលត្រូវបាត់បង់ មានប្រាក់ខ្មែរចំនួន៤លានរៀល ប្រាក់ថៃចំនួន៤៨,០០០បាត និង កាតទូរស័ព្ទជាច្រើនប្រព័ន្ធ។ គាត់បានបញ្ជាក់បន្ថែមថា ពេលដឹងថា ផ្ទះគាត់ត្រូវចោរចូលលុយអស់ ភ្លាមៗនោះគាត់ក៏ទូរស័ព្ទប្ដឹងទៅមន្ត្រីនគរបាលប៉ុស្ដ៏រដ្ឋបាល ស្នឹង តែមន្ត្រីប៉ុស្ដ៏នេះមិនបានមកជួយអន្តរាគមន៏ភ្លាមៗទេ ដោយគេបានឆ្លើយតបមកវិញថា « ទៅធ្វើអីទាំងយប់ បើចោរលួចទៅហើយទៅទាំងយប់ក៏រកមិនឃើញវិញដែរ ចាំព្រឹកទៅ ចាំសមត្ថកិច្ចទៅពិនិត្យ»។ លុះព្រឹកថ្ងៃបន្ទាប់ ទើបសមត្ថកិច្ចចុះមកពិនិត្យតាមការសន្យា រហូតដល់ព្រឹកថ្ងៃទី១៣ សីហា ទើបសមត្ថកិច្ចឈានដល់ការឃាត់ខ្លួនជនដៃដល់។ ប៉ុន្តែមិនមែនមន្ត្រីប៉ុស្ដ៏ស្នឹង ឬ មន្ត្រីអធិការស្រុកបាណន់ ជាអ្នកបង្ក្រាបបានទេ គឺកម្លាំងជំនាញ នៃស្នងការខេត្ត ជាអ្នកចុះបង្ក្រាបផ្ទាល់។
ជាមួយនឹងការឃាត់ខ្លួននេះ ជនសង្ស័យឈ្មោះ ទុំ ដេត ហៅ ចាក់ដេត ដំបូងមិនបានសារភាពទេ បើទោះជាមន្ត្រីជំនាញជជីកសួរនាំបែបណាក្ដី។ ប៉ុន្តែនៅពេលមន្ត្រីជំនាញ បង្ហាញរូបថតដែលជននេះកាន់យកកាតទូរស័ព្ទដែលលួចបានយកទៅលក់នៅហាងទូរស័ព្ទនៅផ្សារស្នឹង ទើបជននេះព្រមឆ្លើយសារភាពទទូលស្គាល់ថា «ខ្លួនពិតជាបានប្រព្រឹត្តមែន»។លោក អូន ហ្វៃ នាយការិយាល័យព្រហ្មទណ្ឌកំរិតធ្ងន់ បាននិយាយថា រូបសកម្មភាពជនសង្ស័យឈ្មោះទុំ ដេត នេះ បានជាប់នៅក្នុងកាមេរ៉ាសុវត្ថិភាព នៅពេលជននេះ បានយកកាតទូរស័ព្ទដែលខ្លួនលួចបានយកទៅលក់។ ហើយដោយសារតែជនរងគ្រោះបានសហការល្អ ជាមួយសមត្ថកិច្ចយើងផង ទើបឈានដល់ការឃាត់ខ្លួនជននេះតែម្ដង។
ជាមួយនឹងការឃាត់ខ្លួនជនដៃដល់ មន្ត្រីជំនាញដកហូតនូវវត្ថុតាងមួយចំនួន ដូចជាប្រាក់ខ្មែរ ម៉ូតូម៉ាកវីវ៉ា ពណ៏ខៀវមួយគ្រឿង ដែលជននេះបានទិញក្រោយពីលួចបានលុយ និង ម៉ូតូម៉ាកហុងដាឌ្រីមពណ៏ខ្មៅស៊េរីឆ្នាំ២០១៥ មួយគ្រឿងទៀតដែលជននេះបានជិះធ្វើសកម្មភាព ។ លោក អូន ហ្វៃ បានបញ្ជាក់ថា ពេលនេះយើងបានប្រគល់ជនសង្ស័យឲ្យទៅមន្ត្រីជំនាញ នៃអធិការស្រុកបាណន់ ធ្វើការសួរនាំជនសង្ស័យបន្ត។ ព្រោះជននេះ ទំនងអាចជាប់ព័ន្ធច្រើនករណីទៀត ទៅនឹងសកម្មភាពគាស់ទម្លុះទម្លាយលំនៅឋានប្រជាពលរដ្ឋនៅក្នុងឃុំស្នឹង ដែលអ្នកឃុំស្នឹង កំពុងព្រួយបារម្ភពីបញ្ហាអសន្តិសុខនៅក្នុងមូលដ្ឋាន៕
ចែករំលែកព័តមាននេះ