ខេត្តព្រះសីហនុ ៖ សេចក្តីរាយការណ៍បឋមបានឲ្យដឹងថា មានករណីដាច់ចរន្តអគ្គិសនីពីអនុស្ថានីយក្រុងព្រះសីហនុទ្វារចរន្ត(F9A)និង(F8A) នាវេលាម៉ោង១១និង៣៥នាទីព្រឹកថ្ងៃទី១៣ ខែសីហា ឆ្នាំ២០២០ ។ នេះបើតាមផេក អគ្គិសនីខេត្តព្រះសីហនុ បានចេញផ្សាយនាថ្ងៃទី១៣ ខែសីហានេះ ។
មូលហេតុដោយសារមានភ្លៀងធ្លាក់ខ្លាំង បណ្ដាលឲ្យទឹកហូរច្រោះរលំបង្គោលបណ្ដាញតង់ស្យុងមធ្យម (MV) ២២គីឡូវ៉ុលចំនួន ០៣ដើម ។ ដែលបណ្ដាលឲ្យដាច់ចរន្តអគ្គិសនីនៅតំបន់មួយចំនួន នៅក្រុងព្រះសីហនុ ខេត្តព្រះសីហនុ ។
ដោយក្រុមការងារបច្ចេកទេសបានធ្វើការបង្វែប្រភពចរន្តអគ្គិសនីពីអនុស្ថានីយក្រុងព្រះសីហនុទ្វារចរន្ត (F3A)និង(F9B) រួចរាល់នៅវេលាម៉ោង ១២និង១៥នាទីថ្ងៃត្រង់ ។
ដោយឡែកនៅតំបន់មហោស្របថ្មី និងបន្ទប់ភ្លើងលេខ PMT1368 ក្រុមការងារបច្ចេកទេសកំពុងធើ្វការពិនិត្យ និងជួសជុល ដើម្បីភ្ជាប់ចរន្តអគ្គិសនីជូនអតិថិជនឲ្យឆាប់មានចរន្តប្រើប្រាស់ឡើងវិញ នៅពេលទទួលបានព័ត៌មានបន្ថែមពីការដាច់ចរន្តអគ្គិសនីនេះ ក្រុមការងារនឹងជូនដំណឹងជាបន្តបន្ទាប់ទៀត ។
អគ្គិសនីខេត្តព្រះសីហនុ ក៏សូមអំពាវនាវដល់ប្រជាពលរដ្ឋឲ្យមានការប្រុងប្រយ័ត្នខ្ពស់ នៅពេលបំពេញការងារនៅជិតគន្លងខ្សែបណ្តាញអគ្គិសនី ពីព្រោះអាចបណ្តាលឲ្យមានការរអាក់រអួលក្នុងការផ្គត់ផ្គង់ចរន្តអគ្គិសនី និងគ្រោះថ្នាក់ដល់អាយុជីវិតជាយថាហេតុ ៕
ចែករំលែកព័តមាននេះ