រាជធានីភ្នំពេញ ៖ មានកន្លែងលក់ដូរមួយចំនួន នៅក្នុងរាជធានីភ្នំពេញ មិនទទួលយកក្រដាសប្រាក់១ដុល្លារ និង៥ដុល្លារ ម្តងទៀតហើយ បើទោះបីជាមានការបញ្ជាក់យ៉ាងច្បាស់ថា ក្រដាសប្រាក់បែបនេះ នៅបន្តចរាចរណ៍ធម្មតានោះ ។
លោក វិសាល ពលរដ្ឋម្នាក់នៅភ្នំពេញបាននិយាយថា កន្លែងលក់កាហ្វេមួយនៅម្តុំបឹងកេងកង មិនទទួលយកក្រដាសប្រាក់១ និង៥ដុល្លារ ។ វិសាលថា គាត់បានចូលទទួលទានកាហ្វេ នៅក្នុងហាងនោះនៅព្រឹកថ្ងៃទី១២ សីហានេះ នៅពេលលោកឲ្យក្រដាសប្រាក់៥ដុល្លារ ទៅអ្នកគិតលុយបានបដិសេធមិនទទួលយកប្រាក់នោះឡើយ ។ «ថៅកែខ្ញុំគាត់មិនឲ្យយកក្រដាសប្រាក់១ដុល្លារ និង៥ដុល្លារទេ ។ ថៅកែខ្ញុំថា ក្រដាសប្រាក់នេះយកទៅឲ្យធនាគារក៏គេមិនយកដែរ» ។ លោក វិសាលថា អ្នកលក់គិតប្រាក់នៅហាងកាហ្វេប្រាប់ដូច្នោះ ។
មានពលរដ្ឋមួយចំនួនទៀតបាននិយាយថា អ្នកដឹកជញ្ជួនទំនិញ និងអាហារដល់ផ្ទះខ្លះ មិនទទួលយកក្រដាស១ដុល្លារ និង៥ដុល្លារនេះដែរ ដោយពួកគេសុខចិត្តយកក្រដាសប្រាក់រៀលវិញ ។ អ្នកមិនទទួលយកក្រដាសប្រាក់ដុល្លារប្រភេទតូចៗនេះដោយអះអាងថា ពិបាកចាយ ឬទូទាត់បន្តទៀត ។
គួររំលឹកថា កាលពីចុងខែឧសភា កន្លងមកនេះ ធនាគារជាតិកម្ពុជា និងគ្រឹះស្ថានហិរញ្ញវត្ថុឯកជនធ្លាប់ប្រជុំគ្នាពីបញ្ហាក្រដាសប្រាក់១ដុល្លារ ២ដុល្លារ ៥ដុល្លារ នោះដែរ ។
បើតាមស្មារតីកិច្ចប្រជុំនោះថា ក្រដាសប្រាក់ដុល្លារប្រភេទតូចៗនេះមានផលអវិជ្ជមានដល់ការចាយវាយប្រាក់រៀល ហើយបណ្តាលប្រទេសជាច្រើនក៏មាននិន្នាការឈប់ចាយវាយក្រដាសប្រាក់ដុល្លារតូចៗនេះដែរ ។
តាមស្មារតីកិច្ចប្រជុំរវាងធនាគារជាតិ និងវិស័យឯកជននោះថា ការវាយក្រដាសប្រាក់ជាសិទ្ធិរបស់ស្ថាប័ននីមួយៗ ប៉ុន្តែធនគារជាតិកម្ពុជា ចាប់ពីចុងខែសីហានេះឈប់ចំណាយលើការដឹកជញ្ជួនក្រដាសប្រាក់ដុល្លារប្រភេទតូចៗ ដែលរហែក ឬខូចគុណភាព ទៅសហរដ្ឋអាមេរិកទៀតហើយ ។
ជាមួយគ្នានេះ ចាប់ពីដើមខែសីហានេះ មកផ្សារទំនើបអ៊ីអន របស់ប្រទេសជប៉ុនវិនិយោគនៅកម្ពុជាបានឈប់អាប់ក្រដាសប្រាក់ដុល្លារអាមេរិកប្រភេទតូច ១ដុល្លារ ៥ដុល្លារ និង១០ដុល្លារ ដល់អតិថជនរបស់ខ្លួនដោយជំនួយដោយក្រដាសប្រាក់រៀលវិញ ។ ប៉ុន្តែនៅតែទទួលយកក្រដាសប្រាក់ដុល្លារប្រភេទតូចៗនោះដដែល ។
លោកស្រី ជា សិរី អគ្គនាយកបច្ចេកទេសធនាគារជាតិនៃកម្ពុជា បានគាំទ្រដល់ការប្រកាសរបស់ផ្សារទំនើបអ៊ីអន និងថា អ្វីដែលផ្សារទំនើបនេះធ្វើជាការគាំទ្រដល់ប្រាក់រៀលកម្ពុជា ។ លោកស្រីបានបញ្ជាក់ថា «ជាទូទៅជប៉ុនគាត់តែងតែគាំទ្រប្រាក់រៀល តាមរយៈ ការជួយសិក្សាស្រាវជ្រាវពីការប្រើប្រាស់ប្រាក់រៀលនៅកម្ពុជាតាមរយៈ JICA ការទទួលយកតែប្រាក់រៀលសម្រាប់ទូទាត់ ទិដ្ឋាការនៅស្ថានទូតជប៉ុន ការចេញមុនគេឧបករណ៍ទូទាត់តែប្រាក់រៀលតែ១គត់ របស់ធនាគារឯកទេស Aeon និងសូម្បីតែការដាក់តម្លៃជាប្រាក់រៀលក្នុងផ្សារទំនើបមុនគេ ក្នុងចំណោមផ្សារទំនើបទាំងអស់នៅកម្ពុជា» ៕
ចែករំលែកព័តមាននេះ