ខេត្តសៀមរាប ៖ តាមសេចក្ដីរាយការណ៍បានឱ្យដឹងថា ឈើគ្រញូងមួយដើមដែលដុះនៅក្នុងតំបន់អង្គរដែលគ្រប់គ្រងដោយអាជ្ញាធរជាតិអប្សរា ត្រូវបានជនមិនស្គាល់អត្តសញ្ញាណលួចអារ-កាត់យកទៅបាត់ដោយសុវត្ថិភាព បានបន្សល់ទុកតែគល់ ចុង មែក និងឫសក្នុងដីប៉ុណ្ណោះ ។ហេតុការណ៍ចោរលួចកាប់ឈើគ្រញូងក្នុងតំបន់អង្គរនេះមិនដឹងកាប់ពេលណាទេ…
ខេត្តសៀមរាប ៖ តាមសេចក្ដីរាយការណ៍បានឱ្យដឹងថា ឈើគ្រញូងមួយដើមដែលដុះនៅក្នុងតំបន់អង្គរដែលគ្រប់គ្រងដោយអាជ្ញាធរជាតិអប្សរា ត្រូវបានជនមិនស្គាល់អត្តសញ្ញាណលួចអារ-កាត់យកទៅបាត់ដោយសុវត្ថិភាព បានបន្សល់ទុកតែគល់ ចុង មែក និងឫសក្នុងដីប៉ុណ្ណោះ ។ហេតុការណ៍ចោរលួចកាប់ឈើគ្រញូងក្នុងតំបន់អង្គរនេះមិនដឹងកាប់ពេលណាទេ ប៉ុន្តែអ្នកយាមបានឃើញនៅវេលាម៉ោង៩និង៣០នាទីព្រឹកថ្ងៃទី១១ ខែសីហា ឆ្នាំ២០២០ ត្រង់ចំណុចគោកបាខែង ក្រុមទី៦ភូមិត្រពាំងសេះ សង្កាត់គោចក ក្រុងសៀមរាប ។
យោងតាមសមត្ថកិច្ចបានឱ្យដឹងថា តាមការចុះត្រួតពិនិត្យករណីកាប់ឈើគ្រញូង ដល់ទីតាំងជាក់ស្ដែង ឃើញថាពិតជាមានការលួចកាត់ឈើគ្រញូងដែលមានមុខកាត់ពី៥ទៅ៦តឹក ពិតប្រាកដមែន ដោយជនមិនស្គាល់មុខ ហើយដើមគ្រញូងនេះត្រូវគេអារ-កាត់យកកំណាត់កណ្ដាលអស់ប្រវែងប្រមាណ៦ម៉ែត្រ ដោយបន្សល់ទុកតែគល់និងចុងមែកប៉ុណ្ណោះ ។
បើយោងតាមរបាយការណ៍បានបញ្ជាក់ទៀតថា ករណីនេះក្រុមការងារនិងបន្តស្រាវជ្រាវរកជនដែលប្រព្រឹត្តនោះ យកមកផ្តន្ទាទោសតាមផ្លូវច្បាប់ឱ្យខាងតែបាន ។ នេះមិនមែនជាលើកទី១ទេ ដែលដើមគ្រញូងមានតម្លៃត្រូវគេលួចកាត់យកទៅបាត់អស់ជាច្រើនដើម ក្នុងតំបន់អង្គរតែមិនទាន់ត្រូវបានចាប់ខ្លួនជនសង្ស័យណាម្នាក់បាននៅឡើយទេ ដូចចាប់បានតែខ្យល់ ។
គួររំលឹកថា កាលនៅវលាម៉ោង១៤ នៅថ្ងៃទី១៦ ខែមេសា ឆ្នាំ២០២០ ចំណុចព្រៃឧទ្យានអង្គរ ភូមិក្រវ៉ាន់ សង្កាត់នគរធំ ក្រុងសៀមរាប មានជនពុំស្គាល់មុខបានលួចកាប់ឈេីគ្រញូងអស់ចំនួន៤ដេីមដឹកយកទៅបាត់ដោយសុវត្ថិភាពផងដែរ ។ ទោះយ៉ាងណាពាក់ព័ន្ធទៅនឹងករណីលួចកាប់ឈើគ្រញូងនៅក្នុងតំបន់គ្រប់គ្រងដោយអាជ្ញាធរជាតិអប្សរា ជាបន្តបន្ទាប់បែបនេះ គេនៅមិនទាន់ឃើញអាជ្ញាធរជាតិអប្សរាចាប់បានជនសង្ស័យយកមកផ្ដន្ទាទោសតាមផ្លូវច្បាប់នៅឡើយទេ ។
ខណៈនៅក្នុងតំបន់ឧទ្យានអង្គរគ្រប់គ្រងដោយអាជ្ញាធរជាតិអប្សរា មានកម្លាំងការពារយ៉ាងរឹងតឹងណាស់គឺស្អិតពីសំណាក់មន្ត្រីអាជ្ញាធរជាតិអប្សរា ។ អ្នកសៀមរាបនិយាយថា សូម្បីប្រជាពលរដ្ឋជួសជុលលំនៅឋានបន្តិចបន្តួចតែងត្រូវបានកម្លាំងរបស់អាជ្ញាធរជាតិអប្សរា ចុះទៅដល់ភ្លាមព្រមទាំងវាយកម្ទេចចោលទៀតផង គឺដឹងលឿនណាស់ ។ តែសម្រាប់ចោរលួចដើមគ្រញូងអារ-កាត់រង្គើព្រៃដឹកយកទៅបាត់បន្តបន្ទាប់គ្មាននីតិវិធីណាមួយសម្រាប់ទប់ស្កាត់សោះឡើយ ។
ជុំវិញករណីនេះមជ្ឈដ្ឋាននានានៅក្នុងខេត្តសៀមរាប កំពុងរង់ចាំមើលអាជ្ញាធរជាតិអប្សរា តើអាចមានសមត្ថភាពតាមចាប់ជនសង្ស័យដែលលួចកាប់ឈើគ្រញូងលើកនេះបានដែរឬយ៉ាងណា ? សង្ស័យមនុស្សមុខដដែលៗដែលស៊ីដើមគ្រញូងក្នុងតំបន់នេះ ។
ចែករំលែកព័តមាននេះ