រាជធានីភ្នំពេញ ៖ តារាចម្រៀងប្រុសដែលបាត់មុខលែងឃើញការសម្តែងមួយរយៈធំព្រោះបានធ្លាក់ខ្លួនឈឺ និងធ្លាប់បានចេញទៅព្យាបាលនៅក្រៅប្រទេស ពេលនេះ លោក យូ ឌីស្កូ បានបង្ហាញមុខមាត់ និងរូបរាងថ្មីដល់មហាជន និងអ្នកគាំទ្រឲ្យសប្បាយរីករាយយ៉ាងខ្លាំង ក្រោយពីឃើញរូបរាង និងសុខភាពរបស់លោកកាន់តែល្អប្រសើរឡើងៗ លែងស្គមស្គាំងដូចមុន ។
លោក យូ ឌីស្កូ ថ្មីៗនេះបានបង្ហោះរូបភាពមួយសន្លឹក តាមរយៈបណ្តាញសង្គមហ្វេស ប៊ុក ដែលក្នុងរូបថតនោះ គឺលោកថតចេញពីក្លឹបហាត់ប្រាណមួយកន្លែង ។ តាមរយៈរូបថតនេះ គឺសង្កេតឃើញថា លោកយូ ឌីស្កូ បានប្រែប្រួលរួបរាងទៅរកភាពស្រស់ថ្លា និងសុខភាពរឹងមាំជាងពីមុន ដោយរូបលោកបានបង្ហាញរូបរាងមានមាឌមាំ សាច់ដុំទាំងកង់ៗ ទៅដល់មហាជនទៀត ។ បន្ទាប់ពីឃើញរូបភាពរបស់តារាសម្តែងប្រុសរូបនេះហើយ មហាជនកាន់តែសម្តែងការរីករាយជាខ្លាំង ពីព្រោះតែមិនស្មានថា សុខភាពរបស់លោក លោក យូ ឌីស្កូ ប្រែប្រួលលឿនបែបនេះសោះ ពីព្រោះតែធ្លាប់តែឃើញរូបលោក ស្គមស្គាំងខ្លាំង នៅពេលលោកកំពុងតែមានជំងឺជាច្រើនមុខវាយលុកផ្ទួនៗដូចជា ជំងឺទឹកនោមប្រៃ និងខូចក្រលៀនជាដើម ។
តែកន្លងមកតាមរយៈការវះកាត់ដូរគ្រលៀន លោក យូ ឌីស្កូ បានជួបសំណាងរួចគ្រោះពីមាត់ជ្រោះមរណៈ និងមានជីវិតប្រសើរឡើងវិញ ។ ក្រោយពួបានឃើញរូបភាពមួយសន្លឹករបស់តារាចម្រៀងរូបនេះហើយ មហាជនកំពុងតែសប្បាយចិត្តជំនួសនៅពេលសុខភាព របស់លោកយូ ឌីស្កូ ប្រែប្រួលមកសភាពជាមនុស្សធម្មតាវិញនោះ ។ ព្រមជាមួយគ្នានោះផងដែរ លោកក៏បានប្រើពាក្យលេងសើច និងការខមមិនជាមួយនឹងមហាជនថា «ខំ Edit ចង់ប្រកាច់បានរាងប៉ុណ្ណឹងទេ»។
យ៉ាងណាមិញ នេះក៏ព្រោះតែលោកយូ ឌីស្កូ បានធ្វើការឆ្លងកាត់នូវជំងឺដ៏កាចសាហាវ ស្ទើរតែគ្មានជីវិតរស់ក្រោយពីបានការជួយជ្រោមជ្រែងពីមហាជនជាច្រើន និងទទួលបានការព្យាបាលវះកាត់ក្រលៀននៅប្រទេសឥណ្ឌាទទួលបានជោគជ័យ និងជាសះស្បើយឡើងវិញ រហូតទទួលសុខភាពដូចបច្ចុប្បន្ននេះ។
គួរបញ្ជាក់ផងដែរ បន្ទាប់ពីសុខភាពល្អប្រសើរជាងមុន តារាចម្រៀងប្រុសរូបនេះ បានវិលមកប្រឡូកនៅក្នុងការងារសិល្បៈវិញ ចាប់តាំងពីរូបលោកទទួលបានការវះកាត់ជោគជ័យតាំងពីចុងឆ្នាំ២០១៩មកម្លេះ គ្រាន់តែពេលនេះទីផ្សារសិល្បៈហាក់រាងស្ងប់ស្ងាត់សម្រាប់អ្នកសិល្បៈព្រោះតែការវាយលុកនៃជំងឺកូវីដ១៩ នៅលើពិភពលោក រួមទាំងកម្ពុជាផងនោះ ៕
ចែករំលែកព័តមាននេះ